Nebʉrʉchãu bichi chuburi niiɗebena.

Mʉ 1943ɗe naceɗa baɗa Italiaɗe. Mʉ ãbarã mʉ baare puuru ɓiɗĩika ɓuuɗe warisiɗau. Mʉ akõre druaɗe ne uubarii bapeɗa mauɗe bakuruba waukabarii basii. Ichi mʉ nawe omeeba dai religión catolicaɗeburu waribipeɗaaɗa.

¿Sakayua bichi sacerdote ba kʉ̃riaɗa basaa?

Chuburi niiɗe bustabachii misaɗaa wãyu chi sacerdote ũriɗe. Ichi beɗearuu mʉa bustabachii mʉa chi awabachii ichi ritual ase koɓeeburuu. Mauɗeeburu sacerdote ba kʉ̃riaɗa. 13 años baburuuɗe, mʉ danaba internadoɗaa odoeɗa baɗa chi warrarãmaa kawabibadaumare chi curso aude sacerdote ba kʉ̃ria nureerã baita.

¿Mama aria estudiaɗa baɗa chi Biblia?

Ãrĩãrãwẽe. 15 años nibasiiɗe, chi mʉ profesor niiba mʉʉmaa deaɗa baɗa libro Evangeliorãɗe —jarai bʉrã, jara ɓuu chi Jesús nibaɗaɗebena​— mʉa ãrĩãdu leaɗa baɗa. 18 años baburuuɗe Romaɗaa ɓooɗe wãɗa baɗa universidad catolicaɗaa wãyua, mau chi papa juaɗeburu ua kuɓuu. Mama estudiasii latín, griego, historia, filosofía, psicología mauɗe teología. Bariara versiculorã Bibliaɗebena leaɗapeɗa mauɗe misaɗe domingo diaɗe Bibliaɗebena leaduu ũribachiɗau adua, biawãrabena chi Bibliara estudiakabachiɗau.

Chi seminario ua koɓeesiiɗe, ¿clase deakabasee?

Chi mʉ trajora oficinaɗeburu baɗaa, maka ɓumina clase decretorã Concilio Vaticano IIɗebena deabachia.

¿Sakayua ãyaa kʉ̃ria noɓeesaa Iglesiaɗebena?

Õbea ɓuuɗeeba: mʉa unubachii chi Iglesia politicaɗe nibaɗaɗeeba, bari ochiabachiɗau chi miadaa asebudau chi sacerdoterã mauɗe chi Iglesiaɗaa wãbadau siɗa mauɗe chi catolicorãba jaradeabadau ariɗewẽe ɓooɗa. Por ejemplo, ¿saka Dachi Akõreba kʉ̃ria niiɗebena ẽbẽra infiernoɗe kastikayu biuburuuɗe? ¿Biawãrabena ichia kʉ̃ria ɓue dachia rosarioba apii ʉrsa ɓeeyu? a

¿Kãare kʉ̃risiasaa aseyu?

Dauɓaa che kuɓuuba wiɗisii Dachi Akõremaa mʉ aiɗabiyua; Biblia de Jerusalén aɓa nedosii, mau eaburu sacapeɗaaɗa baɗa italiano beɗeaɗe, maabea mʉa lea koɓeesii. Domingo dapeɗeeɗa, mʉ sotana ʉtʉ jũi jira nusii misa deaɗakare, mukĩra ome niɗau neesiɗau seminarioɗaa. Mʉʉmaa jarasiɗau ãchi Jeowa ɗebena Jaranũrẽrã maabea dai beɗea paneesii. Hora aude beɗeasiɗau chi Bibliaɗebena mauɗe chi mauba jara ɓuuɗebena chi religión ariɗe jaradea ɓuu ʉ̃rʉbena.

¿Kãare kʉ̃risiasii chi Jeowa ɗebena Jaranũrẽrãɗebena?

Mʉa kʉ̃risiasii ãchi saka jãadua beɗea panasii mauɗe saka jaradea kopaneesii textorã chi Biblia catolicaɗebena. Maaɗakare, Jeowa ɗebena Jara nibabarii chi trʉ̃ Mario mʉ ochia uru koɓeesia. Ichi ẽbẽra bia ãrĩã nibasia mʉ ome, sadocha bariara kue chepeɗa maebʉrã ba toɗoka kuɓuuɗe neebachia seminarioɗaa a las 9 dapeɗeeɗa.

¿Kãare kʉ̃risiabachiɗaa chi waabena sacerdoterãba naka ochia uru kuɓuuɗebena?

Mʉa ãchi kõpaebiaɗa basia, maka ɓumina aɓa biɗa kauwa kʉ̃riaɗaabasia chi Bibliaɗebena kawaaduu. Mʉara kawa kʉ̃ria ɓoosia, mʉa chi awabachia. Mipitaa ɓeeɗebena kawamaa ɓuuba. Kawasii sakayua Dachi Akõreba chi miadaa kuɓuu mauɗe dachi sufri panuu idaarabi ɓuuɗebena, mʉ jãu kawayuswẽa koɓooɗa baɗa.

¿Chi aude jaradeabadaurãɗebena aɓa niiba chi Biblia estudiarã́baɗa aɗa baska?

1975ɗe ɓes ãrĩã wãɗa baɗa Romaɗaa beɗeayua chi kawamaa ɓuuɗebena. Chi mʉ jaradeabadaurãba mʉʉmaa jarasiɗau chi mʉa kawamaa ɓuuɗebena jãu ãyaa ɓuu, maka ɓumina chi aɓa nii biɗa chi Biblia adauwẽebasii. Maaɗakare, 9 de enero 1976ɗe, mʉa karta ɓʉsii Iglesia ida ɓui baita maabea Romaɗaa deebʉeɗa baɗa; ome días baɗakare seminarioɗebena wãsii mauɗe chi Jeowa ɗebena Jaranũrẽrã reunionɗaa wãsii, jãu basii mʉ nabena ɓes. Aria asambleaɗe aribia congregacionɗebena chibʉrʉ duanaɗa baɗa. ¡Joma diwara koɓooɗa! Aɓaaɓaa ãchi chi Biblia baraa duanaɗa baɗa maabea eɗa jʉrʉ panasii chi textorã chi discurso deabadaurãba jaraaduu.

¿Saka unusiɗau chi deɗabenarãmaa chi bichia ase ɓuuɗebena?

Casi joma kĩrukuasiɗau. Maka ɓumina, mʉa kawasii aɓa mʉ ãba Biblia estudiamaa ɓuu Jeowa ɗebena Jaranũrẽrã ome Lombardiaɗe, jãu puuru norte Italiaɗe ɓee ɓua. Mʉ ochiaɗe wãsii, Jeowa ɗebena ariaɗebenarãba mʉʉmaa trajo jʉrʉ deaɗa baɗa mauɗe sama vivii baare. Ara jãu añoɗe mʉ Jeowa ɗebena Jara nibabarii basii.

¿Ɓue bichia jarai baita sakayua jãu asesii ayua?

¡Wãʼãema akawa! Jãabera mʉ Dachi Akõre kaita basii, mʉa kawasiiba kai ichi jari jara ɓuu chi Bibliaba, chi filosofía mauɗe religión catolicaba jara ɓuuwẽeba. Jãabera ẽbẽramaa beɗeai ɓuu kuitaa ɓuu bẽrã kãare chi biawãrabena ɓuu.