Puuru ichi trʉ̃ estado de Sajonia maɗauɗe mʉ naseɗabasia, chi nau puuru República Democrática Alemana (RDA) basia. Mʉ deeɗe chi kʉ̃ria ãrĩã nureaɗabasia jomaurã, mauɗe mʉ akõrerãba waabenarã ome bi’ia ãrĩã nibai baita jaradeɗekapeɗaaɗabasia. Chi República Democrática Alemanaɗe chi kobiernoba jomaurã ẽbẽrarã ara aɓaudu duanaɗai duanubii kʉ̃riabachia, ni aɓau siɗa poore kiɗibaabapeɗa ni aɓau siɗa ʉriko ɓoobai ɓoosia. Sajoniaɗe chi ẽbẽrarãba relijion ʉ̃rʉbena akawara kʉ̃riaɗakabachia. Mʉa, Dachi Akõreɗe kerekabachia. Mʉ baita kʉ̃risia ome ɓoasia 18 año niiɗaa: maarã mʉ baita bi’ia ãrĩã ɓoosii, aɓara Dachi Akõreɗe kereebai mauɗe chi kobiernoba joma ẽbẽrarã ara aɓaudu duanabiyu kʉ̃risianibasia.

Mʉa ãrĩã bustabachii chi ẽbẽrarã ara aɓau ɗauchia nureaɗayu. Chi ʉrikorã poorerã baare ara aɓau ɗauchia duanaɗayua, mʉa chi nejarra jomaurã baita ara aɓau ɗauchia deɗekaiɗe kereɓoosia. Nau kakua, mʉa kũudrãarã ara mʉ kĩra kʉ̃risianureerã ome trajakoɓeesia. Mʉ 14 año niiɗe, trajakoɓeesia proyeto ome iujãa kuidai baita, mama aria papel bataɗakapeɗaaɗa pebuekapeɗa mau waya junebena kosa aseɗayua. Chi alkalde puuru Aue abadauɗebena, mʉa aseɓuu kakua ãrĩã kĩrajʉʉsiɗau, mauɗeeba ãchia mʉmaa premio deasiɗaa. Mʉ ãrĩãdu kũudrãa nibasmina, mʉa politikorã unubadaurã unukuasia. Mʉa kʉ̃risiaɓoosia joma bi’ia asemaaɓuu mauɗe ara jãarã kĩra wãi ɓuu kawaɓoosia.

Mambeaburu, mʉa kawasii chi mʉa kʉ̃risiaɓooɗabaɗa jãkawẽ basii. Año 1989ɗe chi muro asepeɗaaɗabaɗa Berlínɗe koretasiɗau. Ara mau baara, chi kobierno Europa Esteɗebena siɗa ɓaeruu kĩrakasia. Ẽbẽrarã bi’iawẽ duaneesia kawawẽɗe mʉa kuitaasia ãrĩãdu umiyaduanasii ẽbẽrarã, mau kawaruuba chi bi’ia asepanuuwẽ mauɗe ãrĩãdu umiyaɗapeɗa ãchia ãchi kobierno apoyaɗawẽ kakua kawasia. Maamina, ¿sakayua? Makãrã, ¿chi kobiernoba joma ara aɓau ɗauchia duanaɗai bustaabasee? Makãrã, chi jãu kʉ̃risiapanasii, ¿komakaraa kĩraburu ɓoasme? Joma jãuba mʉ baita ãrĩãdu preokupaɓeesia.

Maka ɓuuɗe mʉa kawasia, chi politika bustawẽ, bari musikadu mauɗe pintura baare ãrĩã bustaɓeesia. Mʉ chi musika estudiayua eskuela ɓuuɗaa wãsia, maamina unibersidaɗaa entraɗe wãñua kʉ̃risiaɓuuɗe; ãrĩãdu kʉ̃risianibasia musika mauɗe pintai baitaburu trajayua. Chi chuburi niiɗeeɗa mʉmaa jaradeapeɗaaɗabaɗa akawara ida ɓuisia mʉa. Chi mʉa ãrĩãdu importaɓoosiira mʉ bi’ia pasaidu kʉ̃risianibasia; wẽra aɓa nii omera saliwẽa kabanaurã omeburu wãbachia. Chi pintura mauɗe chi musikaba chi mʉ bida barikiau kĩra bibinibayuuba, jãuba mʉ bi’ia akubuebasia, mauɗeeba mʉa pintaruuɗe naarã nomaa duaneeruuka paneebachia. Mʉ du aɓa wiɗiɓoosia: ¿Kãare saka pasai bama? ¿Kãare baita nama nia?

Mʉa chi kawa kʉ̃rianii kawaɗe wãsiiɗe, chi sakata aɗabasia mʉa. Bes aɓa, mʉ eskuelaɗe ɓuumisa, estudianterã akuduanuu jʉ̃kaa akuɓeeɗabasia. Ãchirãra beɗeamaaduanaɗabasii chi kãare saka pasaburuu ʉ̃rʉbena. Maarã baara Mandy * akuɓoosia, ichi mauba mʉmaa konsejo biarã mipitaa keɗee deaɓoosia. Ichia mʉmaa naka aɗabasia: “Andreas, bichia jãu joma panaubi kʉ̃riaɓuubʉrã chi bichia wiɗiɓuu, chi dachi bida mauɗe chi kãare pasai ʉ̃rʉbena, makãrã estudias chi Biblia”.

Mau kawaamaa ɓoosia, maamina mʉa du aɓa mʉ kʉ̃risiaɗe neeawakuɓuuba mauba ochiabisia mʉa. Mandyba mʉmaa chi kapitulo 2 Danielɗe unubisira leasiiɗe, mʉa waya nau kãareba aɗabasia. Bibliaba kobiernorã importante ãrĩã nuree asta iɗiɗaabenarã ʉ̃rʉbena jaraɓua. Mau kaaɗe, Mandyba waaburu mʉmaa chi propesiarã ʉ̃rʉbena jaraɓee unubisia, mauɗe kãare pasai ʉ̃rʉbenaɗeeɗa. Jambeaburu, mʉa unusia chi mʉa wiɗiɓooɗa panauɓee. Maamina, ¿kaiba propesiarã ɓʉɗabasaa? ¿Kaiba jaraɗabasaa chi pasai ʉ̃rʉbena arikʉɗe deaburuu? ¿Jãuba Dachi Akõre nii unubiɓoosee?

Mandyba mʉmaa Horst Angelika baare unubiasia, naarã kimarã Jeowa ɗebena jaranũrẽ. Ãchia mʉ aiɗasiɗau Biblia ʉ̃rʉbena kawai baita. Ara mama mʉa kawasii chi Jeowa ɗebena jaranũrẽrã maaradu chi aɓa ɓuu relijion Dachi Akõre trʉ̃, trʉ̃ jarabadau mauɗe waabenarãmaa jaradeabadaa (Salmo 83:18; Mateo 6:9). Mʉa kawasii Jeowaba jaraɓuu dachirã biubariɗawẽa nureaɗai ɓuu chi iujãa aude kĩrawãrea kiruuɗe. Salmo 37:9ɗe naka aɓua: “Chi Jeowaɗe esperaduanuurãba iujãa adauɗayua”. Mʉa ãrĩãdu bustasii kawayu chi dachirã joma naka bibiduanaɗai ɓuu chi Dachi Akõreba jaraɓuu aseduubʉrã.

Pasilwẽ basia kambiayu chi Bibliaba jaraɓuu kĩra nureaɗaika. Mʉ chi musika mauɗe pintai baita bi’ia ãrĩãdu asebarii bas bẽe, waabenarã ẽbẽrarãba mʉa aseɓuu bi’ia ochiabachiɗaa. Mauba mʉ aude juakaya nibaɗe wãɓoosia, mauɗeeba mʉa aude juakayawẽa nibaɗe wãsia. Mauɗe, chaarea ãrĩã ɓoosia chi kosa miaɗaarã waubarii ɓuiyu siɗa. Mʉa Jeowamaa ara kiruma abaria ichia bikãa esperaniiɗeeba, mauɗe joma dachia jaraɓuu kawapeɗa, maubapeɗa waabenarã kʉ̃ria uanii chi Bibliaɗe jaraɓuu bereka aseduanuurã.

18 añoɗaa mʉa chi kobiernoba ara aɓau ɗauchia duanabii baita esperaɓoosia mauɗe Dachi Akõreɗe kerekabachia, maka ɓuumina makaeɗeeɗabena chi Bibliaba mʉ ãrĩãdu kambiabikãria. Chi mʉa kawasiiba bibinibai baita ãrĩãdu aiɗasia mauba mʉ preokupawẽa ɓoi baita, chi naeɗe kʉ̃risiaɓooɗa kãare saka pasaruuɗebena waaburu kʉ̃risiawẽa ɓeesii. Año 1993ɗe mʉ bautisaɗe wãsia mambea Jeowa ɗebena jaranibabariiɗe basia, mauɗe año 2000ɗe mʉ Tabitha ome kimabaraasia, ichira chokekea mauɗe kĩrajʉʉ jaradeapeɗa kawania mʉ kĩrachaa. Dai omerãba jaradeɗekaɗe wãbadaa ẽbẽrarãmaa Bibliaba jaraɓuu ʉ̃rʉbena. Mʉchi kĩra ẽbẽrarã ãrĩãrãba kerenurea mʉa naeɗe kerenibaɗa. Mʉ ãrĩãdu kĩrajʉʉ nibabaria ẽbẽrarãmaa Jeowa ʉ̃rʉbena jaradeɗekaniiba.

Jeowa ɗebena jaranũrẽ ome meraaɓeesiiɗe, mʉ akõrerã ãrĩãdu perasiɗaa. Bikãa ãchia unukãribaɗe wãsiɗaa nau mʉ baita bi’ia ãrĩã ɓuu. Jambera mʉ ãrĩãdu kĩrajʉʉ ɓuu ãchi Bibliaɗebena kawaɗapeɗa mambea reunion Jeowa ɗebena jaranũrẽɗeɗaa wãbadauɗeeba.

Tabitha mʉ omeba ãrĩãdu berekabadaa chi konsejo Bibliaɗebena kimabaraaduanuu baita deaɓuu aseɗayua, jãuba dai ãrĩãdu kĩrajʉʉ nibabiɓua. Jari chi konsejo dachi kima aɓa kiɗii omeburu nibai jaraɓuu ãrĩãdu aiɗaɓua dairã kimabaraa niɗau bẽe (Hebreos 13:4).

Mʉ mambera ãrĩãdu preokupaɓuuwẽ dachi nii kakua mauɗe chi kãare pasaburuu ʉ̃rʉbena kakua. Jeowa ɗebena jaranũrẽ deeɗe ɓua ãchirãra kĩrajʉʉ duanaɗapeɗa ambua mauɗe peleaɗawẽa duanuu baara. Joma dairã ara aɓau ɗauchia duanua, jãdu kʉ̃rianibaɗa mʉa mauɗe jãuɗe kerenibaɗa mauɗe jãka unu kʉ̃rianibasia mʉa.