Dachi aɓabena amiko nibayua, naa kawa baraaɗai ichi saka nii. Ara jãka dachi siɗa, Dachi Akõre amiko nureaɗayua, kawa baraaɗai ichi saka nibabarii. Maucha ichi ʉ̃rʉbena kawaaruubʉrã, ichi kaita nibaɗayua. Ichia dachimaa saka nii unubibariiɗebena, kimare aude mipitaa ãrĩã ɓuu u nia: chi poder, ichia ãrĩãdu kawa nii, ichi jipa nii mauɗe chi kʉ̃ria unubi nii.

“¡Jeowa bʉdu aude jĩa kerabaria! Bichiaburu bajãa iujãa baara asesia bichi poder choromaɗeeba” (JEREMÍAS 32:17).

Chi joma waukaɗa unu kopanuuba dachimaa Dachi Akõre poder unubi ɓua. ¿Dachirãba kãare sentibadaa dachi kakuaɗe awara ãda nureeɗe Ʉmada ãrĩãdu jẽradru kuɓuuɗe? Dachia senti duanuu chi Ʉmada wãsia. Jãu wãsia Jeowaba ichi poderɗeeba aseɗa. ¿Chi Ʉmada poder ãrĩã bara ɓue? Chi wãsia Ʉmadaɗe eɗa kẽsauɗebenaɗe 15.000.000°C wãsia ɓua. Chi Ʉmada segundocha, energía enata nia jãu bomba nuclearna ãrĩãdu barau kĩra ɓua.

Maamina, chi Ʉmada ɓiɗĩika ɓua estrella ichi aude ɓee kãyabarã. Chi cientificorãba chi estrella UY Scuti jãu aude mechibena ɓuu jarabadau, ichira 1.700 veces Ʉmadaɗeebiɗa mechia ɓua. UY Scutiba Ʉmada kĩranabarima neerã, jarabadau ichia dachi iujãa mitai ɓuu mauɗe Júpiter jũi jira nuumaa asta aria neeyu. Nau kuitaaduuba dachi kawabi ɓua Jeremiasba jaraɗabaɗa Jeowaba ichi poder ãrĩã ɓuuɗeeba bajãa, iujãa, mauɗe joma universo aseɗabaɗa.

¿Saka aiɗa ɓua Dachi Akõre poder ãrĩã bara niiɗeeba? Dachirãra bibi duanua Dachi Akõreba joma aseɗabaɗaɗeeba, Ʉmada mauɗe joma biʼia ãrĩã keɗee barau nama iujãaɗe. Maubapeɗa, Dachi Akõreba ichi poder adausia dachi aɓaaɓaa nama iujãaɗe aiɗai baita. Siglo aɓauɗe, Dachi Akõreba Jesusmaa poder deasia milakro asei baita. Bibliaba jara ɓua: “Dau pãriu kirureerã unuyua, mauɗe nʉka nuree waya ãdaɗayua, chi kakua chau nuree jayoaswẽeruu duaneebudauɗe, mauɗe kʉʉrʉba ũriɗakaurã ũriɗayua, mauɗe biupeɗaaɗarãbaɗa waya piradruɗayua” (Mateo 11:5). Mauɗe dachi ewariɗe Bibliaba jara ɓuu: “Ichia karr chaareabi ɓua chi kãsa keɗeerãmaa”. Mauɗe jara ɓuu: “Chi Jeowaɗe ijãa kirureerã ãchi karr chaarea duanaɗayua” (Isaías 40:29, 31). Dachi Akõreba dachirãmaa karr chaarea duanaɗai baita mauɗe poder dea ɓua waaburu choroaɗayua problemarã dachimaa imi duanuu (2 Corintios 4:7). Dachirãba Dachi Akõre jʉ̃kaa aude kaita senti duanua ichi poder deɗeka ɓuu dachi aiɗaɗai baita.

“¡Ãrĩã bichia wauɗa, Jeowa! Bichia kawaaruuba joma waukaɗabaɗa” (SALMO 104:24).

Dachirãba joma Dachi Akõreba aseɗabaɗa ʉ̃rʉbena kawabudauɗe kuitaabadaa, ichia ãrĩãdu kuitaa nii. Chi cienciaɗebena aɓa ichi trʉ̃ biomimética abadau ɓua, aria chi cientificorãba estudia kopanua Jeowaba joma aseɗabaɗa maabea ara nau kĩra chi ɓee kosarã ãchia biʼia aseɗayua. Jari velcro abadau maebʉrã avión kĩra waukaɗayua.

Chi aude biʼia ãrĩã unubi ɓua Dachi Akõre aude kawa nii ẽbẽra kakuabʉ. Kawa kʉ̃risiásturu saka waribarii wãwa cheke. Naa ẽpesabarii célula kĩra mama aria eɗaa uru ɓua chi nesitabarii ichi wari baita. Chi mau célula ãrĩãdu dibidi ɗiɗibaria maarã joma aɓaaɓauɗe duaneeɗayua. Maamina mau kaaɗe, chi jãarã celularãbaɗa kambia bara ɓeebadaa mauɗe chi maarãɗebena célula oa baita ba waubadaa, waraa célula dachi nervio baita, mauɗe chi ɓeerã célula dachi bʉʉrʉ baita. Mau kaaɗe dachi kakua joma biʼia wau bari ɓeebaria. 9 mesɗe chi jãu celulabaɗa akawa biʼia wau bari ɓeebaria ẽbẽra cheke wiɗi kiruuɗe mama ichi kakuaɗe celularã ãrĩãdu bara ɓuuɗe. Nau asei baita ãrĩãdu kawa nibayua, mauɗeeba ãrĩãrãba kʉ̃risiabadau jari chi Biblia ɓʉɗabaɗaba kĩra, ichia jarasii: “Mʉa bichi ʉ̃rʉbena biʼia ãrĩã jarayua bichiɗeeburu mʉ biʼia ase nuɓua” (Salmo 139:14).

¿Saka aiɗa ɓua Jeowaba ãrĩãdu kawa nii bẽrã? Dachi waukaɗabaɗaba kuitaa ɓua kãare nesita panuu kĩrajʉʉ nureaɗai baita. Mauɗe ichia ãrĩãdu kuitaa nii bẽrã, dachirãmaa beɗea biarã deɗeka ɓua Bibliaɗeeba. Cha nau kĩra: “Ara machi chiya perdona duanábaɗa” (Colosenses 3:13). ¿Konsejo bia ãrĩã ɓuka? Chi investiga nureabadaurãba kawasiɗaa dachia aɓabena perdonarã ũkuru biʼia ãrĩã kãi noɓeebi ɓua mauɗe presión arterial abadau ãrĩãdu eɗaa bʉi ɓua. Mauɗe ãrĩãdu chaarea ɓeeyua dachirã nomaa ãrĩã akʉ ɓeemaaba mauɗe waabenarã ẽpermedarã dachimaa deaɗaabayua. Dachi Akõre kĩrabara dachi amiko kĩra nia dachi jomaurã kakua ãrĩã preokupa ɓuu mauɗe konsejo biarã ãrĩãdu dea ɓua (2 Timoteo 3:16, 17). ¿Bustai ɓue amiko jãka nii unibayu?

“Jeowaba jipa kirureaɗayu ãrĩãdu kʉ̃riabaria” (SALMO 37:28).

Dachi Akõreba joma jipa ɓuu ase nia. Dachia kʉ̃risiaɗaabai chi aude poder bara ɓuuba ãyaa asebarii (Job 34:10). Dachi Akõreba jipa ase nuɓuubaria chi ãyaa aseɗabaɗa, chi Salmo ɓʉɗabaɗaba naka asia: “Puururãɗebena jipa ɓuekai jipa asebadaurã” (Salmo 67:4). Dachi Akõreba unu kuɓuu bẽrã kãare ase panuu dachi sõɗeeba, ichira dachia ase bara ɓuu unubi panuuba kĩrajʉʉ ɓeeyua. Ichia warãbenadu kuitaa ɓua mauɗe joma jipa ase kuɓua (1 Samuel 16:7). Dachi Akõreba joma chi kachirua nau iujãaɗe ase kopanuu unu kuɓua, mauɗeeba ichia jãra kĩrabara “tõotaaruu kĩra iujãaɗebena” asei jara ɓua (Proverbios 2:22).

Jãuba Dachi Akõre kachirua nii unubiwẽa maebʉrã ẽbẽrarã kastikai kʉ̃ria ɓuuwẽe. Ichia kʉ̃riaburuuɗe, ẽbẽrarã perdona nia. Chi Bibliaba jara ɓuu Jeowaba “iaɗakuakau mauɗe chi chuburia unubibarii”, ichia ẽbẽrarã kachiruarã perdonai ɓua ãchi sõɗeeba arrepentiɗarã. Jãdu jipa nibai jara ɓua (Salmo 103:8; 2 Pedro 3:9).

¿Saka aiɗa ɓua Dachi Akõre jipa niiɗeeba? Chi apóstol Pedroba jarasia: “Dachi Akõreba jomaurã araɓau dauchia kʉ̃ria ua nii, aɓa niidu kʉ̃ria niiwẽe, joma puururãɗe ẽbẽra ũri kiɗii ichia ochiabaria” (Hechos 10:34, 35). Dachi Akõreba dachirã ara ãbua kʉ̃ria ua nii bẽrã, ichia ochiakaa samabena nuree dachi, mauɗe dachi e ni dachi raza ochia niiwẽe, ni dachi chi nejarra ãrĩã bara ɓuu o wãʼãe ɓuu siɗa ochiakaa, mauɗe ida ichi baita trajabi nia.

Dachi waukaɗaba kãare mau jipa nibayu kawaɗai kʉ̃ria ɓua, maubapeɗa dachirãmaa chi kʉ̃risia deɗekasia. Chi Bibliaba jara ɓuu dachi kʉ̃risia kĩrabara karta ɓʉbarii ɓuu kĩra ɓua dachi sõɗe, mauba ũkuru jaradeɗeka ɓuu chi dachia ase bara ɓuu biʼia ɓuu maebʉrã kachirua ɓuu (Romanos 2:15). ¿Mauba dachi saka aiɗa ɓua? Dachi kʉ̃risia biʼia traja ɓuubʉrã ida ãyaa asebiwẽa, mauɗe dachia ãyaa aseɗarã ũkuru jaradea ɓua kawa kʉ̃risiaɗapeɗa arrepentiɗayua chi miadaa ɓuu ida ɓui baita. Dachi Akõre jipa nii ʉ̃rʉbena kawaɗarã jãuba ũkuru biʼia nureabi ɓua ichi ome.

“Dachi Akõreba ne jomaɗe kʉ̃riakua ɓuu” (1 JUAN 4:8 Biblia chamí, WPS).

Bibliaba jara ɓuu Dachi Akõre poderdu nii, maebʉrã chi kawa ãrĩã nii, jipa nii. Maamina jara ɓua Dachi Akõre ne jomaɗe kʉ̃riakua ɓuu. ¿Sakayua? Ichia joma biʼia ase ɓuu ichi poder bara ɓuuɗeeba, mauɗe ichi jipa niiɗeeba mauɗe kawa ãrĩã niiɗeeba. Maamina chi ichi aude asebi kuɓuu kʉ̃riaburua. Joma ichia ase kuɓuu kʉ̃riaɗeeburu ase kuɓua.

Jeowaba aɓa maucha nesitawẽa ɓosmina, kʉ̃riaɗeeba waabenarã chokae kirureerã asekuasia, ʉtʉ bajãaɗe mauɗe iujãaɗe biɗa, ãchi kĩrajʉʉ duanaɗayua ichia kʉ̃ria niiɗeeba mauɗe ichia kawa ochia ɓuu bẽrã. Ichia iujãa kĩrawãrea ãrĩã kiruu asesia ẽbẽrarã baita. Mauɗe iɗi waaburu kʉ̃ria unubi ɓua joma ẽbẽrarãmaa, “ichia ʉmada jẽradrubi ɓua ẽbẽrarã miadaa nureerã ẽbẽrarã biarã ʉ̃rʉ mauɗe kue siɗa chebi ɓua ẽbẽrarã jipa ase nuree mauɗe kachirua ase nuree ʉ̃rʉ” (Mateo 5:45).

Maubapeɗa, “Jeowaba ẽbẽrarã chi kʉ̃ria mauɗe chi chuburia unubibaria” (Santiago 5:11). Ichia kʉ̃ria unubi nia ichiɗebena kawa kʉ̃ria kirureerãmaa ichi kaita duanaɗayua. Dachi Akõre jãarã ẽbẽrarã aɓaaɓaa ariɗe unu ua nia. Mauɗeeba Dachi Akõre “kaita ɓua dachirã aɓaaɓaarãɗebena” (Hechos 17:27).

¿Saka aiɗa ɓua Dachi Akõre kʉ̃riaaruuba? Dachi Akõreba chi kʉ̃ria nii unubia ɓua, wãwa ʉi kiruuɗeeba, mauɗe deeɗabenarã kʉ̃riaɗeeba, mauɗe kewaraa ʉmada mipitaa koɓeeburuɗeeba… Naka ɓee dachirã ãrĩãdu kĩrajʉʉbii ɓua.

Dachi Akõreba chi kʉ̃ria unubi ɓuu ʉtaa ichimaa wiɗiiruuɗe biɗa. Bibliaba jara ɓuu: “Barikia kakua ãrea jirukaraarã́sturu, maumaarã Dachi Akõremaa ʉtaa iɗísturu, ichimaa chi chuburia iɗísturu, mauɗe ne joma ʉ̃rʉbena ichíturu kiɗibai ásturu”. Dachi Akõreba dachi kʉ̃riakua ɓuu, mauɗe ichia kʉ̃ria ɓuu dachia joma dachi kʉ̃risiaɗe kuɓuu ichimaa jarayua. Ichia jara ɓuu naka aseɗarã “jirukaraayuwãe panaɗai ẽbẽrarãba ãchi du aɓa poyaa kauwa kuitaaɗaabai” (Filipenses 4:6, 7 Biblia chamí, WPS).

Nau articuloɗe Dachi Akõre saka nii kimare unubi ɓuu ʉ̃rʉbena kawasiɗaa: ichi poder bara ɓua, ãrĩãdu kawa nii, ichi jipa nii mauɗe ne jomaɗe kʉ̃riakua ɓuu. Waaburu lea kãriba kawayua kãare Jeowaba bichi kakua ase ɓuu mauɗe kãare waaburu aseeruu.