Thesalon Pakhatnak 4:1-18
4 A donghnak ah unau hna, Pathian lungton awkah zeitindah nun ding a si ti kha kan sinin lamhruainak nan hmuh cang. Cutin nan nung taktak ko. Asinain cutin nun chinchin awkah Bawipa Jesuh min in kan in forh hna i kan in nawl hna.
2 Bawipa Jesuh nawl peknak thawng in hi lamhruainak hi kan in pekmi hna a si ti kha nan hngalh ko.
3 Pathian duhnak cu nupa sualnak* kha hrial in thiang tein nan ummi kha a si.
4 Nan dihlak in a thiangmi le upat awk a tlakmi nan si nakhnga zeitindah nan pum uk ding a si ti kha nan hngalh awk a si.
5 Diriamh hngal loin ningzak a simi an hornak ning in a tuahmi, Pathian a hngal lomi miphun dang bantuk si hlah u.
6 Cu bantuk kongkau ah ahohmanh nih ziazalei phunglam kha lonh hlah seh law a unau cung ah caanṭha i lak hlah seh. Zeicahtiah a hlanah kan in chimh cang hna i fakpi in ralrin kan in pek cang hna bantuk in cu bantuk thil a tuahmi cu Jehovah* nih dan a tat hna lai.
7 Zeicahtiah Pathian nih a thurhnawmmi si awkah si loin a thiangmi si awkah a kan auh.
8 Cucaah hi lamhruainak zei ah a rel lomi cu minung kha si loin thiang thlarau aan petu hna Pathian kha zei ah a rel lomi a si.
9 Asinain unau dawtnak kong he aa tlaiin cun nan sinah caṭial a herh lo. Zeicahtiah pakhat le pakhat i dawt awkah Pathian nih nanmah hrimhrim kha aan cawnpiak cang hna.
10 Masidonia ram i unau dihlak cung ah cu bantuk dawtnak kha nan langhter. Asinain unau hna, langhter chinchin awkah kan in forh hna.
11 Lamhruainak kan in pek cang hna bantuk in dai tein nun awk le midang kong ah i thlak loin teima tein rian ṭuan awkah hmuitinh chia u.
12 Cuticun bu lengmi hna hmaiah hmaizah awk tlak in nan nung kho lai i nan chambaumi zeihmanh a um lai lo.
13 Mah leng ah unau hna, ruahchannak a ngei lomi hna bantuk in nan ngaih a chiat nakhnga lo thihnak ah aa hngilhmi hna i an hmailei kong kha hngalhter kan in duh hna.
14 Jesuh cu a thi i a tho ṭhan ti kha kan zumh ahcun Jesuh zultu in thihnak ah aa hngilhmi hna kha Jesuh he umṭi awkah Pathian nih a nunter ṭhan hna lai ti zong kan zumh a si.
15 Jehovah* bia kha hrambunh in kan in chimh hna lai, Bawipa a rat ṭhan tiang a nung rihmi kannih cu thihnak ah aa hngilh cangmi hna hlanah van ah kan tho hmasa lai lo.
16 Zeicahtiah Bawipa hrimhrim cu van in a rung ṭum lai. Pathian muko kha i put in vancungmi bawi bik aw in nawl a pek hna tikah Khrih zultu in a thimi hna cu an tho hmasa lai.
17 Cu hnuah a nung rihmi kannih cu anmah he umṭi awk le Bawipa he i ton awkah vancung ah minmei in kaipi kan si lai. Cun Bawipa he a zungzal in kan umṭi lai.
18 Cucaah mah bia in pakhat le pakhat i hnem zungzal u.
Footnotes
^ Greek, por·nei′a. Biafang Fianternak ah zoh.
^ Biafang Fianternak ah zoh.
^ Biafang Fianternak ah zoh.
