Timote Pakhatnak 1:1-20
1 A kan khamhtu Pathian le kan i ruahchanmi Khrih Jesuh nawl peknak in Khrih Jesuh lamkaltu a simi Paul nih,
2 zumhnak i ka fa taktak a simi Timote,* ca kaan kuat:
Pa Pathian le Bawipa Khrih Jesuh vel le zaangfahnak le daihnak cu na cung ah um ko seh.
3 Masidonia ram ka kal lai ah Efesa khua i taanta ding in thazaang kaan pek bantuk khan atu ah pek ṭhan kaan duh. Mah lawng ah mi cheukhat kha a hmaan lomi cawnpiaknak an karhter ti nakhnga lo,
4 a hmaan lomi tuanbia le chuahkehnak min cazin ah lungthin an pek nakhnga lo ralrin na pek khawh hna lai. Mah bantuk thil hna cu zeihmanh san an tlai lo i ruahdamhnak lawng a chuahter. Zumhnak fehter awkah Pathian nih a kan pekmi thil hna he zeihmanh pehtlaihnak an ngei lo.
5 Hitin lamhruainak kaan peknak a ruang cu lungthin thiang le a thiangmi chiaṭha thleidannak lungthin le titernak a um lomi zumhnak in a chuakmi dawtnak kan ngeih nakhnga caah a si.
6 Mi cheukhat nih cu bantuk thil hna kha an pialtak i sullam a ngei lomi bia tu kha an chim.
7 Annih nih nawlbia cawnpiaktu si kha an duh, asinain an chimmi kong le lungtho ngai in mi an cawnpiakmi kong kha anmah lila hmanh nih an i fiang lo.
8 Ningcang tein* zulh a si ahcun Nawlbia cu a ṭha ti kha kan hngalh.
9 Nawlbia cu miding mi hna caah ser a si lo, nawl a buarmi, ralchanh a hmangmi, Pathian zei ah a rel lomi, misual, zumhawk a tlak lomi,* a thiangmi thil a upat lomi, nulepa a thatmi, lai a nawngmi,
10 nupa sualnak a tuahmi,* pa le pa sualnak a tuahmi, minung a firmi, lih a chimmi, a hmaan loin chiatserh a hmangmi le man a ngeimi cawnpiaknak he aa ralkahmi thil paohpaoh a tuahmi hna caah sermi a si ti kha kan hngalh.
11 Mah cawnpiaknak cu aa nuammi Pathian sinin a rami, sunparnak in a khatmi thawngṭha cung ah hram aa bunh. Cu thawngṭha cu thanh awkah rian pek ka si.
12 Ṭhawnnak a ka petu Bawipa Khrih Jesuh cung ah kaa lawm. Zeicahtiah zumhawk tlakmi in a ka hmuh i a rian ṭuantu ah a ka ser.
13 Hlanah cun Pathian thangchiattu, hremtu le a puarhrangmi ka rak si. Asinain zumhnak ka ngeih lo ca le hngalh loin ka rak tuahmi a si caah a zaangfahnak ka hmu.
14 Bawipa vel kha tampi in ka hmuh i Khrih Jesuh zultu ka si caah zumhnak le dawtnak ka hun ngei.
15 Khrih Jesuh cu misual mi hna khamh awkah vawleicung ah a ra timi bia cu a hmaanmi le zumhawk a tlak taktakmi a si. Keimah cu misual mi lakah a sual bik ka si.
16 Asinain ka cung ah zaangfahnak langhter a si. Khrih cung ah zumhnak a ngei i zungzal nunnak a hmu dingmi hna caah zohchunh awk ka si nakhnga Khrih Jesuh nih misual bik a simi keimah thawng in a lungsaunak kha tling tein a langhter.
17 A thi kho lomi le mit in hmuh khawh lomi zungzal Siangpahrang, pakhat lawng a simi Pathian cu upatnak le sunparnak zungzal in zungzal tiang hmu ko seh. Amen.
18 Ka fa Timote, na kong he aa tlaiin profet hna nih an rak chimchungmi ning in hi lamhruainak hi kaan pekmi a si. Mah chimchungbia ning in a ṭhami raldohnak kha do peng ko.
19 Zumhnak le a thiangmi chiaṭha thleidannak lungthin kha kilveng peng. A cheu nih mah kha zei rel loin an um caah an zumhnak tilawng cu a rawk.
20 Cu hna lakah Himanias le Alexander an i tel. Pathian thang an chiat nakhnga lo chimhhrinhnak caah Satan kut ah ka chanh hna.
Footnotes
^ A sullam “Pathian A Thangṭhattu.”
^ A hrampi, “Phung ning tein.”
^ Asiloah “a fekmi dawtnak a ngei lomi.”
^ Biafang Fianternak ah zoh.
