Timote Pakhatnak 2:1-15
2 Hmasa bik ah forh kaan duhmi hna cu Pathian sinah nawl u, thlacam u, midang caah halpiak hna u law mi vialte caah lawmhnak bia chim u.
2 Siangpahrang hna le nawlngeitu hna ca zong ah thlacam u. Cuticun dai tein khua kan sa kho lai i Pathian sinah zumhawktlak tein le lungtak tein kan um kho lai.
3 Kan Khamhtu Pathian nih cu bantuk thlacamnak cu a ṭhami le cohlan awk a tlakmi in a hmuh.
4 Pathian duhnak cu mi phun vialte* nih khamhnak hmu hna seh ti le biatak kha a hmaan ning tein hngal hna seh ti hi a si.
5 Pathian cu pakhat lawng a um i Pathian le minung karah remnak sertu cu minung Khrih Jesuh pakhat lawng a um.
6 Amah cu mi vialte caah aa tlukmi tlanhnak man in amahle amah aa pemi a si. Mah kong kha a caan a phanh tikah mi nih tehte an khaan te lai.
7 Cu kong tehte khaan awkah Pathian nih phungchimtu le lamkaltu in rian a ka pek. Cuticun miphun dang sinah zumhnak le biatak kong a cawnpiaktu ka hung si. Lih ka chim lo, biatak ka chim.
8 Cucaah nan i tonnak hmun kip ah pa pawl nih thinhunnak le bia alnak um loin zumhawk tlakmi lungput he an kut hler in thlacam hna seh ti ka duh.
9 Cu bantuk in nu pawl zong nih aa dawhtlak in le a zatawk in le thleidan thiamnak in i thuam hna seh. An sam kha a hleihluat tuk in i phiar hna hlah seh law sui, lungvar le thilpuan man fak tuktuk in i thuam hna hlah seh.
10 Pathian a biami nu he aa tlakmi lam in thilṭha tuahnak tu in i thuam hna seh.
11 Nu nih cawnpiaknak kha nawlngaihnak lungput he dai tein ngai hna seh.
12 Nu cu mi cawnpiak awk le pa cung i nawlngeih awkah ka awnh hna lo, dai tein um ko hna seh.
13 Zeicahtiah Adam cu ser hmasa a si i mah hnuah Evi cu ser a si.
14 Mah leng ah Adam cu hlen a si lo, nu tu kha hlen cikcek a si i nawl a buarmi a hung si.
15 Asinain nu cu zumhnak, dawtnak, thiannak le thleidan thiamnak a* ngeih peng ahcun fa a ngeihnak thawng in huhphenh a si lai.
Footnotes
^ Mah cu miphun, hnulei sining le zatlang nunning a phunphun in a rami hna kha a chim duhmi a si.
^ A hrampi, “an.”
