Timote Pakhatnak 3:1-16
3 Khrihfabu zohkhenhtu si awkah fakpi in aa zuammi cu rian ṭha a duhmi a si timi bia cu a hmaanmi a si.
2 Khrihfabu zohkhenhtu cu soisel awk a um lomi, nupi pakhat lawng a ngeimi, amahle amah aa uk khomi, thleidan khawhnak a ngeimi, ningcang tein khua a sami, khual a dawmi, cawnpiak awkah sining a tlinhmi,
3 zu a ri lomi, velh a hmang lomi, a tlarimi, aa si lomi, tangka a duh tuk lomi,
4 a innchungkhar ṭha tein a hruai khomi a si lai. A fale zong nawl a ngaimi le ziaza ṭha a ngeimi an si lai.
5 (A innchungkhar hmanh zeitindah ka hruai lai ti a hngalh lo ahcun Pathian Khrihfabu cu zeitindah a zohkhenh khawh lai?)
6 Khrihfa a hung sikami a si lai lo. Zeicahtiah porhlaw ruamkai in a um sual lai i Satan inmi biaceihnak bantuk a ing ve sual lai.
7 Cun bu leng mi hna lakah minṭha a ngeimi zong a si lai. Cuticun mawhchiatnak a tong lai lo i Satan rap ah aa foih lai lo.
8 Cu bantuk in Khrihfabu rianṭuantu cu aa biatakmi, bia phun hnih a chim lomi,* zu a ram lomi, a miak hmuh awkah a hak a kau lomi a si lai.
9 Zumhnak he aa tlaimi a thiangmi biathli kha chiaṭha thleidannak lungthin thiang he fek tein aa tlaihmi a si lai.
10 Khrihfabu rianṭuantu in sining an tlinh le tlinh lo hneksak hmasa hna u law soisel awk zeihmanh an um lo ahcun ṭuan ko hna seh.
11 Cu bantuk in nu pawl zong aa biatakmi, mi thangchiat a hmang lomi, amahle amah aa uk khomi le zeizong kip ah zumhtlakmi an si awk a si.
12 Khrihfabu rianṭuantu cu nupi pakhat lawng a ngeimi, a fale le a innchungkhar ṭha tein a hruai khomi a si lai.
13 Zeicahtiah ṭha tein rian a ṭuanmi pa hna cu minṭha an hmu lai i Khrih Jesuh an zumhnak kong kha zalong tein an chim khawh lai.
14 Na sinah rat colh ding in kaa tiim ko nain hi kong ka rak ṭial chungmi cu,
15 ka tlai sual ahcun Pathian innchungkhar ah zeitindah nun awk a si ti kha na hngalh nakhnga caah a si. Pathian innchungkhar cu a nungmi Pathian Khrihfabu, biatak a tungpi le a dirkamhtu a si.
16 Pathian biaknak he aa tlaimi a thiangmi hi biathli hi a lianngan hringhran ti cu al khawh a si lo: ‘Jesuh cu minung pakhat a hung si, thlarau a si ṭhan tikah miding tiah thanh a si i vancungmi hna sinah a lang, miphun dang sinah a kong cu chim a si i vawlei mi hna nih an zumh, vancung ah sunparnak in lak a si.’
Footnotes
^ Asiloah “hlennak bia a chim lomi.”
