Timote Pakhatnak 4:1-16
4 Hmailei caan ah mi cheukhat nih Pathian sinin a ra tiah an ruahmi, a hmaan lomi bia le khuachia cawnpiaknak kha an ngaih lai i zumhnak kha an kaltak lai tiah Pathian thlarau nih fiang tein a chim.
2 Chungthu lengnal hna chimmi lihbia zong an ngaih lai. Chungthu lengnal hna i an chiaṭha thleidannak lungthin cu thir lin nih a kanghmi bantuk in a hit i zeihmanh a hngal lo.
3 Annih nih ṭhitum kha an kham i rawl cheukhat ei kha an thlauh hna. A tak ti ahcun Pathian nih cu rawl cu zumhnak a ngei i biatak kong hmaan tein a hngalmi hna nih lawmhnak bia chim in ei awkah a sermi a si.
4 Pathian sermi thil vialte cu a ṭha dih ko, lawmhnak bia chim in cohlan ahcun hlawt ding zeihmanh a um lo.
5 Zeicahtiah Pathian bia le thlacamnak thawng in mah cu an thiang cang.
6 Unau pawl kha cutin ruahnak na cheuh hna ahcun Khrih Jesuh rianṭuantu ṭha na si lai. Zumhnak he aa tlaimi bia le naih tein na zulhmi cawnpiaknak ṭha in aa cawmmi na si lai.
7 Nutar hna nih an chim tawnmi, Pathian thang a chiattermi tuanbia menmen kha ngai hlah. Mah canah Pathian lei i pekchanh awkah hmuitinh chia law fakpi in i zuam.*
8 Pum cawlcanghnak cu tlawmte lawng a ṭhahnem. Asinain Pathian lei i pekchanhnak cu zeizong kip ah a ṭhahnem. Atu nunnak ah siseh, a ra laimi nunnak ah siseh thluachuah pek ding in Pathian nih bia a kan kamh.
9 Hi bia cu a hmaanmi le zumhawk a tlak taktakmi a si.
10 Mi phun vialte,* a hleiin zumhawk a tlakmi hna a Khamhtu, a nungmi Pathian kha kan i ruahchan caah thazaang chuah in fakpi in kan i zuammi a si.
11 Hi lamhruainak hi chim hna law cawnpiak zungzal hna.
12 Mino na si caah ahohmanh nih in zohchuk hna hlah seh. Mah canah biachimnak, tuahsernak, dawtnak, zumhnak, thiannak ah zumhfekmi hna caah zohchunh awk ṭha va si ko.
13 Ka phanh hlan tiang zapi hmaiah cathiang relnak, thazaang peknak le cawnpiaknak kha fakpi in rak tuah peng ko.
14 Chimchungbia ning in Khrihfa upa phu nih na cung i an kut an chuan lioah na hmuhmi laksawng kha zei rel loin um hlah.
15 Cu thil hna cu ṭha tein ruat hna; mi vialte nih na ṭhanchonak kha fiang tein an hmuh nakhnga cu thil hna ah na lungthin pe.
16 Nangmah theng i ralring law na cawnpiaknak zong i ralring zungzal. Mah thil hna cu tuah peng hna, cutin na tuah ahcun nangmah he, na bia a ngaimi he khamh nan si lai.
Footnotes
^ Hika ah hmanmi a hrampi bia cu zaanglente celhtu hna nih fakpi in pum cawlcanghnak an tuahmi kha a chim duhmi a si.
^ Mah cu miphun, hnulei sining le zatlang nunning a phunphun in a rami hna kha a chim duhmi a si.
