Timote Pakhatnak 5:1-25
5 Kum upami pa pawl kha fak tuk in si hna hlah, na pa bantuk in a nawl in nawl hna. A no deuhmi pa pawl kha na unau bantuk in hmu hna.
2 Kum upami nu pawl kha na nule bantuk in, a no deuhmi nu pawl kha na farle bantuk in hmu hna law lungthiang tein pehtlai hna.
3 Nuhmei taktak a simi* kha upat hna law zohkhenh hna.
4 Asinain tu le fa a ngeimi a si ahcun cu hna nih an innchungkhar an zohkhenhnak thawng in Pathian lei i pekchanhnak kha cawngta hmasa hna seh. An nu le an pa, an pi le an pu kha zohkhenh ṭhan ve hna seh, cucu Pathian mithmuh ah cohlan awk tlak a si.
5 Nuhmei taktak a si i zohkhenhtu a ngei lomi nih cun Pathian kha aa bochan i chun he, zan he Pathian sinah a nawl i thla a cam peng.
6 Nuamhnak lawng a kawlmi nuhmei cu a nung ko nain thlaraulei in a thimi a si.
7 Cucaah soisel an si nakhnga lo mah lamhruainak hi rak pe lengmang hna.
8 A zohkhenh awk a simi, a hleiin a innchungkhar a zohkhenh lomi cu zumhnak a hlawmi a si i zumlotu nakin a ṭha lo deuh.
9 Va pakhat lawng a rak ngei bal i kum 60 cung a simi nuhmei cu nuhmei cazin ah khumh awk a si.
10 Fale zohkhenhnak, khualtlung dawtnak, mithiang mi hna ke ṭawlnak, harnak a tongmi hna bawmhnak le thilṭha tuah i zuamnak ti bantuk rian ṭha ṭuannak ah minṭha a ngeimi a si lai.
11 Kum no deuhmi nuhmei pawl cu nuhmei cazin ah khumh hna hlah. Zeicahtiah an thisa duhnak cu Khrih rianṭuannak ah dawnkhantu a hung si tikah va ngeih ṭhan an duh lai.
12 Cutin a si ahcun a hmasa i an biakamnak kha an hlawtmi a si caah annih cu biaceih an si lai.
13 Mah leng ah rian ṭuan loin inn kip ah a vakmi an hung si kho. Rian an ṭuan lo lawng si loin mi kong a ceihmi, mi kong ah aa thlakmi le chim lo awk a chimmi an hung si kho.
14 Cucaah a no deuhmi nuhmei pawl cu va ngei hna seh, fa ngei hna seh law an innchungkhar kha ṭha tein zohkhenh ko hna seh ti ka duh. Cuticun ralchanhtu cu soisel awk a ruang a ngei lai lo.
15 Atu hmanh ah nuhmei cheukhat cu lam an pial i Satan hnu an zul cang.
16 Zumtu a simi nu nih a rualchan lakah nuhmei an um ahcun amah nih bawm ko seh. Cuticun Khrihfabu caah thilrit a si lai lo i nuhmei taktak a simi* kha Khrihfabu nih a bawmh khawh hna lai.
17 Khrihfabu ṭha tein a hruaitu Khrihfa upa hna cu, a hleiin phungchimnak le cawnpiaknak ah fakpi in aa zuammi hna cu upatnak a let hnih in hmuh awkah aa tlakmi in ruat hna.
18 Zeicahtiah cathiang nih “Facang a cil liomi cawtum kha a hmur va ṭem hlah,” cun “Rianṭuantu cu rian ṭuan man hmuh awk aa tlak” tiah a ti.
19 Kum upa* pakhat cu sualpuh a si tikah tehte pahnih asiloah pathum an um lo ahcun cohlang hlah.
20 Sualnak a tuah lengmangmi kha zapi hmaiah chimhring law midang caah ralrin peknak a si lai.*
21 Mah lamhruainak hi kapkhat lei lawng ṭanhnak le thleidannak um loin zulh awkah Pathian le Khrih Jesuh le thimmi vancungmi hna hmaiah fakpi in kaan nawl.
22 Aho cung hmanh ah khulrang tuk in na kut chuang hlah.* Midang sualnak ah i tel hlah. Ziazalei ah thiang tein um i zuam peng.
23 Na pawpi caah le atu le atu na zawt caah ti lawng si loin mitsur zu zong tlawmpal in rak ding.
24 Mi cheukhat sualnak cu zapi hngalh a si i biaceih an si colh. Asinain mi cheukhat sualnak tu cu a hnu lawng ah a lang.
25 Cu bantuk in rian ṭha ṭuannak cu zapi hngalh a si i an hngalh rih lo zong ah thuh khawh a si hlei lo.
Footnotes
^ Asiloah “Bawmh a herh taktakmi nuhmei,” mah cu cawmtu a ngei lomi kha an si.
^ Asiloah “bawmh a herh taktakmi nuhmei,” mah cu cawmtu a ngei lomi kha an si.
^ Asiloah “Khrihfa upa.”
^ A hrampi, “midang nih an ṭih lai.”
^ Mah cu khulrang tuk in rian pek lo kha a chim duhmi a si.
