Thesalon Pahnihnak 1:1-12
1 Paul, Silvanas* le Timote nih Pa Pathian le Bawipa Jesuh Khrih he lungthin khat tein a ummi Thesalonika khua i Khrihfabu sinah cakuat kan rak ṭial:
2 Kan Pa Pathian le Bawipa Jesuh Khrih vel le daihnak cu nan cung ah um ko seh.
3 Unau hna, nanmah kong ah Pathian kha kan lawmh zungzal. Mah cu aa tlakmi a si, zeicahtiah nan zumhnak a ṭhawn chin lengmang caah le pakhat le pakhat nan i dawtnak a ṭhan chin lengmang caah a si.
4 Hremnak le harnak tampi nan tong ko nain inkhawhnak le zumhnak nan langhter caah Pathian Khrihfabu hna sinah nan kong kha uangthlar ngai in kan chim.
5 Mah nih hin Pathian biaceihnak cu a ding ti kha a langhter i Pathian Pennak chung luh awkah aa tlakmi nan hung si. Mah Pennak ruang ah pei harnak cu nan in cu.
6 Pathian cu a dingmi a si caah nan cung ah harnak a tluntertu kha dan a tat hna lai.
7 Bawipa Jesuh cu a ṭhawngmi a vancungmi hna he van in a langh tikah harnak a tongmi nannih cu kanmah he luatnak nan hmu lai.
8 Jesuh cu meizik he a rat tikah Pathian a hngal lomi le Bawipa Jesuh kong thawngṭha a cohlang lomi kha teirul a cham hna lai.
9 Annih cu zungzal hrawhnak in dantat an si lai. Bawipa hmai in ṭhawl an si lai i a liannganmi a ṭhawnnak kha an hmu ti lai lo.
10 Bawipa cu a mithiang mi hna he sunparnak hmuh ding in a rat tikah amah a zummi vialte nih upatnak an pek lai. Nannih zong kan tehte khaannak kha nan zumh caah an lakah nan i tel ve lai.
11 Cucaah Pathian nih auh awkah aa tlakmi in aan rel hna nakhnga nan caah thla kan cam zungzal. Pathian nih tuah a duhmi thilṭha vialte kha a ṭhawnnak in tling tein tuah ko seh. Zumhnak in nan ṭuanmi rian ah hlawhtlinnak in pe ko hna seh.
12 Cuticun Bawipa Jesuh min cu nanmah ruang ah sunparnak a hmu lai i amah he lungthin khat tein nan um ruang ah nannih zong sunparnak nan hmu ve lai. Mah cu kan Pathian le Bawipa Jesuh Khrih vel thawng in a si.
Footnotes
^ Silas ti zong in auh a si.