Thesalon Pahnihnak 2:1-17
2 Unau hna, kan Bawipa Jesuh Khrih a ratnak kong le a sinah hmunkhat te ah pumh kan sinak kong he aa tlaiin nawl kan in duhmi hna cu,
2 Jehovah* ni a phan cang timi bia ruang ah thinphan thlalau in um hlah u law nan khuaruah khawhnak kha fawi tuk in tlauter hlah u. Mah bia cu thlarau in phuanmi, kaa in phuanmi asiloah kanmah cakuat phun in a rami ca zong in a si kho.
3 Ahohmanh zeiti lam hmanh in i hlenter hna hlah u. Zeicahtiah cu ni a phanh hlanah zumhpialnak cu a um hmasa lai. Rawhralnak fapa a simi nawlbuartu pa phuan a si hlanah cu ni cu a phan lai lo.
4 Anih cu ralchanhtu a si i pathian tiah auhmi vialte le mi nih an biakmi vialte cung ah amahle amah aa hlorh. Cuticun Pathian biakinn ah a ṭhu i zapi hmaiah amahle amah pathian in aa langhter.
5 Nan sin ka um lioah hi kong kaan chimh tawnmi hna kha nan i cinken ti lo maw?
6 Cu pa cu a caan a phanh tik lawng ah phuan a si nakhnga aho nih dah a kham ti kha nan hngalh ko.
7 Mah nawlbuartu pa i a ṭhatlonak cu rian a ṭuan cang ko nain a lang rih lo. Asinain atu i a khamtu a um chung tiang lawng cutin a si lai.
8 A khamtu a um ti lo hnuah nawlbuartu pa cu a lang lai. Bawipa Jesuh a ratnak phuan a si tikah a kaa in a chuakmi thaw in cu pa cu a hrawh lai.
9 Nawlbuartu pa a langhmi cu Satan rianṭuannak ruang ah a si. Nawlbuartu pa nih thil lianngan, hlennak hmelchunhnak le khuaruahhar thil a phunphun a tuah lai.
10 Hrawh a si dingmi hna kha ṭhatlonak a phunphun in a hlen hna lai. Hrawh an simi cu khamhnak a hmuhtermi biatak kha an duh lo i an cohlan lo caah a si.
11 A hmaan lomi cawnpiaknak in hlen an si nakhnga Pathian nih a awnh hna caah lihbia kha an zumh.
12 Cuticun biatak a zum lo i ṭhatlonak a duhmi vialte cu biaceih an si lai.
13 Jehovah* dawtmi unau hna, nan caah Pathian kha kan lawmh zungzal. Zeicahtiah a thlarau in aan thianter hnanak thawng in le biatak nan zumhnak thawng in khamhnak hmuh awkah Pathian nih a hramthawk tein aan thim cang hna.
14 Pathian nih aan auh hna cu kan chimmi thawngṭha thawng in a si. Mah cu kan Bawipa Jesuh Khrih sunparnak nan i hrawm ve nakhnga caah a si.
15 Cucaah unau hna, fek tein dir u law kaa in phuanmi bia in siseh, kan cakuat in siseh nan hmuhmi cawnpiaknak hna kha i tlaih peng u.
16 Cun kan Bawipa Jesuh Khrih thengte le a kan daw i a vel thawng in zungzal hnemhnak le ruahchannak ṭha a kan petu kan Pa Pathian nih,
17 nan lungthin kha in hnem hna seh law in fehter ko hna seh. Cuticun a ṭhami kha nan tuah khawh zungzal lai i nan chim khawh zungzal lai.