Thesalon Pahnihnak 3:1-18
3 A donghnak ah unau hna, Jehovah* bia cu khulrang in a karh nakhnga le nanmah bantuk in midang zong nih upatnak he an cohlan nakhnga thla kan campiak peng u.
2 Pathian nih ṭih a nungmi hna le miṭhalo hna kut in a kan luatter nakhnga zong thla rak kan campiak u. Zeicahtiah zumhnak timi cu mi vialte nih ngeihmi a si lo.
3 Asinain Bawipa cu zumhawktlak a si caah aan ṭhawnter hna lai i miṭhalo pa kut in aan huhphenh hna lai.
4 Lamhruainak kan in pekmi hna kha nan zulh i hmailei zong ah nan zulh rih ko lai ti kha Bawipa zultu kan si bantuk in nan cung ah zumhnak kan ngei.
5 Pathian kha nan dawt i Khrih caah inkhawhnak nan ngeih nakhnga Bawipa nih nan lungthin cu lamhruai zungzal ko seh.
6 Unau hna, Bawipa Jesuh Khrih min in lamhruainak kan in pek hna lai, kan sinin nan* hmuhmi lamhruainak ning in si loin ningcang loin khua a sami unau kha hrial hna u.
7 Kanmah hi zeitindah i zohchunh awk a si ti kha nanmah hrimhrim nih nan hngalh ko. Zeicahtiah nan sin kan um lioah ningcang loin khua kan sa bal lo.
8 Aho rawl hmanh a lak in kan ei bal lo. Ahohmanh thilrit kan in khinh hna nakhnga lo chun he, zan he fakpi in rian kan ṭuan.
9 Nan sinin hmuhnak nawl kan ngeih lo caah si loin zohchunh awk ṭha chiahpiak kan in duh hna caah a si.
10 Nan sin kan um lioah kan in cawnpiak tawnmi hna cu “Rian ṭuan a duh lomi paoh cu a ei zong eiter hna hlah u” ti a si.
11 Zeicahtiah nan lak i cheukhat cu ningcang loin khua an sa, zei rian hmanh ṭuan loin anmah he aa pehtlai lomi kong ah an i thlak ti thawng kan theih.
12 Cu bantuk mi kha dai tein rian ṭuan awkah le anmah tein an paw i cawm awkah Bawipa Jesuh Khrih min in nawl kan pek hna i kan fial hna.
13 Asinain unau hna, nannih tu cu thilṭha tuahnak ah nan lung dong hlah u.
14 Hi kan cakuat chung bia a zul duh lomi an um ahcun i chingchiah u law kom ti hna hlah u, cuticun an ning a zak lai.
15 Asinain ral bantuk in ruat hna hlah u, unau pakhat bantuk tu in chimhring peng hna u.
16 Daihnak Bawi nih a lam kip in daihnak in pe zungzal ko hna seh. Bawipa cu nan dihlak sinah um ko seh.
17 Hi chawnhbiaknak hi keimah Paul nih keimah kut tein ka ṭialmi a si. Ka kut ṭial kha zoh in ka ca a si ti kha nan hngalh ko lai.
18 Bawipa Jesuh Khrih vel cu nan dihlak cung ah um ko seh.