Efesa 1:1-23
1 Pathian duhnak in Khrih Jesuh lamkaltu a simi keimah Paul nih Efesa khua i mithiang mi hna, Khrih Jesuh he lungthin khat tein a ummi zumhawk tlakmi nan sinah cakuat ka rak ṭial:
2 Kan Pa Pathian le Bawipa Jesuh Khrih vel le daihnak cu nan cung ah um ko seh.
3 Kan Bawipa Jesuh Khrih i a Pathian le a Pa cu thangṭhat si ko seh. Zeicahtiah Khrih he lungthin khat tein kan um caah vancung ah thlaraulei thluachuah a phunphun a kan pek.
4 Pathian nih vawlei a rak ser* hlan in Khrih he lungthin khat tein um awkah a kan thim cang. Mah cu Pathian kan dawtnak in a hmaiah a thiangmi le soisel awk a um lomi kan si nakhnga caah a si.
5 Aa lawmh ning le a duh ning tein Jesuh Khrih thawng in a fale i ser awkah a hlankan in a rak kan thim cang.
6 A dawtmi a Fapa thawng in a kan pekmi a sunglawimi a vel ruang ah Pathian cu thangṭhat si ko seh.
7 A fapa thawng in tlanh kan si i luatter kan si. A thisen thawng in kan sualnak cu ngaihthiam kan si. Pathian vel cu a va lianngan hringhran dah!
8 Pathian nih a velngeihnak kha fimnak le hngalhthiamnak dihlak he siang ngai in a kan pek.
9 Cuticun a duhnak he aa tlaimi, a thiangmi biathli kha a kan hngalhter. Mah biathli cu a duhnak ning in le aa tinhnak ning in a si.
10 Rikhiahmi caan a tlin tikah Pathian nih vancung i a ummi le vawleicung i a ummi thil vialte kha Khrih ah fonh dih ding in khua a khaan.
11 Kannih cu Khrih he lungthin khat tein a ummi kan si i Pathian nih rocotu a kan siter. Zeizong vialte a duhnak ning in a tuahtu Pathian nih aa tinhnak ning in a hlankan in a kan thim.
12 Cucaah Khrih ah ruahchannak a ngei hmasa bikmi kanmah thawng in Pathian sunparnak cu thangṭhat a si lai.
13 Nannih zong khamhnak kong thawngṭha biatak nan theih hnuah Khrih ah ruahchannak nan ngei ve. Nan zumh hnuah Khrih thawng in biakammi thiang thlarau in hmelchunhnak khenh nan si.
14 Mah thiang thlarau cu ro kan co lai ti aamah khaannak* a si. Cutin hmelchunhnak khenh a si cu Pathian ta a simi hna kha tlanhnak man thawng in luatter awkah le Pathian sunparnak thangṭhat awkah a si.
15 Cucaah kei zong nih Bawipa Jesuh nan zumhnak le mithiang mi hna cung ah nan langhtermi dawtnak kong kha ka theih caah,
16 nanmah ruang ah Pathian kha ka lawmh zungzal i ka thlacamnak ah kaan telh peng hna.
17 Kan Bawipa Jesuh Khrih i a Pathian le sunparnak in a khatmi a Pa nih amah kong he aa tlaiin a hmaanmi hngalhnak nan ngeih khawh nakhnga fimnak le a phuanmi bia hngalhthiam khawhnak in pe ko hna seh.
18 Pathian nih nan lung mit kha a auter caah zei ruahchannak caah dah aan auh hna ti le mithiang mi hna caah a khonmi ro cu zeitluk in dah a sunlawi ti le,
19 zumtu a simi kanmah cung ah a langhtermi a ṭhawnnak cu zeitluk in dah a ngan ti kha nan hngalh cang. Mah a ṭhawnnak a lianhngan ning cu a rianṭuannak ah a lang.
20 Pathian nih mah ṭhawnnak in Khrih kha thihnak in a thawhter i vancung ah a orhlei kam ah a ṭhutter.
21 Atu chan* ah siseh, a ra laimi chan ah siseh a um dingmi cozah vialte, nawlngeihnak vialte, ṭhawnnak vialte, uknak vialte le min vialte nakin sang deuhpi ah a hlorh.
22 Pathian nih zeizong vialte kha Khrih ke tang ah a chiah dih i Khrihfabu he aa tlaimi zeizong vialte lu ah a ser.
23 A pum a simi Khrihfabu cu Khrih in a khat. Anih cu zeizong vialte kha lam phun kip in a tlintertu a si.
Footnotes
^ Adam le Evi fa an ngeih caan.
^ Asiloah “pek chungmi tangka.”
^ Biafang Fianternak ah zoh.
