Efesa 2:1-22
2 Nawl nan buar ruang le nan sual ruang ah a thimi bantuk nan rak si nain Pathian nih aan nunter cang hna.
2 A hlanah cun hi vawlei kal ning in, thli bantuk in a karhmi lungput a uktu duhnak ning in nan rak nung. Mah lungput cu nawlngai lomi hna lakah atu zong ah hin rian a ṭuan rih ko.
3 Kan dihlak in a hlanah cun anmah bantuk in kan pumsa duhnak ning in kan rak nung. Kan pumsa duhnak le kanmah ruahnak ning in khua kan rak sa. Kan i chuahpimi sining in cun midang bantuk in Pathian thinhunnak a ing dingmi fale kan rak si.
4 Asinain zaangfahnak in a khatmi Pathian nih a kan dawt tuk caah,
5 nawl buar ruang ah a thimi bantuk kan si ko lio hmanh ah Khrih he a kan nunter cang. A velngeihnak ruang ah khamh nan si cang.
6 Mah leng ah Khrih Jesuh he lungthin khat tein kan um caah Pathian nih Khrih he a kan thawhter i vancung ah hmunkhat ah a kan ṭhutter.
7 Mah cu Khrih Jesuh he lungthin khat tein a ummi kanmah kha a ra laimi chan* hna ah mithmai ṭha pek awk le a velngeihnak tampi langhter khawh awkah a si.
8 Vel aan ngeih hna caah zumhnak thawng in khamh nan si. Mah cu nanmah tuahnak thawng in a si lo, Pathian laksawng a si.
9 Kanmah tuahmi ruang ah kan hmuhmi a si lo caah ahohmanh nih i porhlawt awk a ruang a um lo.
10 Kannih cu Pathian kutzung kan si i Khrih Jesuh zultu in thilṭha tuah awkah sermi kan si. Kan tuah dingmi thilṭha kha Pathian nih a hlankan in bia a rak khiah cang.
11 A hlanah cun chuahkehnak lei in miphun dang nan rak si i minung kut in “cuarpar tanmi hna” nih “cuarpar tan lomi” tiah an in auhmi hna kha i cinken u.
12 Cu lioah cun Khrih a hngal lomi, Israel miphun he aa hlatmi, biakamnak he aa pehtlai lomi, hi vawlei ah ruahchannak a ngei lomi le Pathian a hngal lomi nan rak si.
13 A hlanah cun Pathian he nan rak i hlat nain atu cu Khrih thisen thawng in Khrih Jesuh he lungthin khat tein nan um cang i Pathian he nan i naih cang.
14 Khrih cu kan caah daihnak sertu a si. Phu pahnih a ṭhentu vanpang kha a chimh i phukhat ah a ser.
15 Khrih nih phu pahnih kha miphun thar* pakhat in a ser i daihnak umter awk le amah he lungthin khat tein umter awkah a pum a peknak thawng in i huatralnak kha a hrawh. Mah cu nawlbia le phunglam aa telmi Moses Nawlbia kha a si.
16 Mah huatralnak kha Khrih thengte nih a hrawh, hremnak tung cung i a thihnak thawng in phu pahnih kha pum pakhat bantuk a siter i Pathian he a remter ṭhan hna.
17 Khrih cu a ra i Pathian he aa hlatmi nanmah sinah le Pathian he aa naihmi hna sinah daihnak kong thawngṭha kha a chim.
18 Kan phuhnih in thlarau pakhat lawng kan hmuh caah Khrih thawng in Pa sinah zalong tein thla kan cam kho cang.
19 Cucaah nannih cu mising le ramdang mi nan si ti lo. Mithiang mi hna bantuk in rammi nan si cang i Pathian chungkhar nan si cang.
20 Nannih cu a hram a simi lamkaltu hna le profet hna cung ah sakmi nan si. A hrampi i a kil lung cu Khrih Jesuh thengte kha a si.
21 Khrih he lungthin khat tein a um i a tungtlang pawl ningcang tein pehtonh dihmi inn cu a ningpi in Jehovah* i a thiangmi biakinn a hung si.
22 Nannih zong Khrih he lungthin khat tein nan um caah Pathian nih a thiang thlarau in a umnak inn ah midang he hmunkhat ah aan sak hna.
