Efesa 3:1-21
3 Khrih Jesuh ca le miphun dang a simi nanmah ṭhatnak caah keimah Paul cu thong ka tlakmi a si.
2 Pathian velngeihnak in ṭhatnak nan hmuh nakhnga bawmh awkah rian pek ka si ti kha nan theih cang ko lai.
3 A hmasa ah a tawinak in ka rak ṭial cang bantuk in Pathian nih a thiangmi biathli kha ka sinah a phuan.
4 Mah ca nan rel tikah Khrih he aa tlaimi, a thiangmi biathli kong ka hngalhthiam ti kha nan hngalh ko lai.
5 Hi biathli hi hlan chan mi hna sinah cun hngalhter a rak si lo, asinain atu ah cun a thiangmi lamkaltu hna le profet hna sinah thiang thlarau thawng in phuan a si cang.
6 Mah biathli cu hihi a si: Khrih Jesuh he lungthin khat tein a ummi miphun dang hna cu thawngṭha thawng in kanmah he ro an coṭi lai, pum ṭengnge an hung si lai i biakamnak kha an i hrawm ve lai.
7 Pathian velngeihnak laksawng thawng in mah biathli he aa tlaimi rianṭuantu ka hung si. Mah laksawng cu Pathian nih a ṭhawnnak rianṭuannak thawng in a ka pekmi a si.
8 Mithiang mi hna lak i a hme bikmi nakin a hme deuhmi ka si ko nain mah velngeihnak hi pek ka si. Cucaah Khrih sinin a rami a dong kho lomi thluachuah kong thawngṭha kha miphun dang sinah ka chim.
9 Cun zeizong vialte a ser dihtu Pathian nih kum tampi chung thuhmi, a thiangmi biathli kong he aa tlaiin khua a khaan ning kha mi vialte nih an hngalh nakhnga ka chim.
10 Cuticun van ah a ummi uktu hna le nawlngeitu hna nih Pathian fimnak a phunphun kha Khrihfabu thawng in atu ah an hngalh khawh lai.
11 Mah cu kan Bawipa Khrih Jesuh he aa tlaiin zungzal a rak i tinhmi ning khan a si.
12 Khrih kan zumhnak thawng in zalong tein biachimnak nawl kan ngei i zalong tein Pathian sinah thla kan cam kho.
13 Nan ca i ka tonmi harnak hna ruang ah hin nan lung dong hlah u tiah kaan nawl hna. Mah cu nanmah ṭhatnak caah a si i, i uangthlar ko u.
14 Mah ruang ah hin Pa sinah ka khuk kaa bil i thla ka cam.
15 Amah thawng in vancung le vawleicung i innchungkhar vialte hi an hung ummi a si.
16 Sunparnak in a khatmi Pathian nih a thlarau ṭhawnnak hmang in nan lungthin kha ṭhawnter ko seh tiah thla ka cam.
17 Nan zumhnak thawng in nan lungthin chung ah Khrih um seh law dawtnak zong um seh tiah thla ka cam. A fekmi hram cung ah nan hram sih u law fek tein dir u.
18 Cuticun mithiang mi hna bantuk in biatak a kauh ning, a sau ning, a san ning le a thuh ning kha fiang tein le tling tein nan hngalh khawh lai i,
19 hngalhnak a lonh dihtu Khrih dawtnak kha nan hngalh lai. Mah cu Pathian pekmi sining hna in nan khah nakhnga caah a si.
20 Kan cung ah rian a ṭuanmi a ṭhawnnak kha hmang in kan hal khawh leng le kan ruah khawh lengpi in thil a tuah khotu Pathian cu,
21 Khrihfabu thawng in le Khrih Jesuh thawng in chankhat hnu chankhat, zungzal in zungzal tiang sunparnak pek si ko seh. Amen.
