Filipi 1:1-30
1 Khrih Jesuh sal a simi keimah Paul le Timote nih Khrih Jesuh he lungthin khat tein a ummi Filipi khua i mithiang mi hna, zohkhenhtu hna le Khrihfabu rianṭuantu hna nan sinah cakuat kan rak ṭial:
2 Kan Pa Pathian le Bawipa Jesuh Khrih vel le daihnak cu nan cung ah um ko seh.
3 Nan kong ka ruah tik paoh ah ka Pathian kha ka lawmh zungzal i,
4 nan dihlak caah lunglawmhnak he ka nawl zungzal.
5 Zeicahtiah thawngṭha nan theih ni thawk in nihin ni tiang thawngṭha karhternak ah nan i pe.
6 Pathian nih nan lakah a thawkmi rian ṭha kha Khrih Jesuh ni a phanh hlanah a liim hrimhrim lai tiah ka zumh.
7 Kaan dawt tuk hna caah nan dihlak kong ah cutin ka ruahmi cu aa tlak ko. Thong ka tlak lioah siseh, thawngṭha chimnak nawl kilven awk le upadi ning in fehter awkah kaa zuam lioah siseh nan ka bawmh. Cucaah nannih cu keimah he Pathian vel aa hrawmmi nan si.
8 Nan dihlak in kaan ngai tuk hna ti le Khrih Jesuh nih aan dawt hna bantuk in kaan dawt tuk hna ti kha Pathian nih a hngalh ko.
9 Pathian duhnak kong hmaan tein hngalhnak le ṭha tein thleidan thiamnak he nan dawtnak cu karh chin lengmang ko seh tiah thla ka cam peng.
10 Cun a biapi deuhmi thil kha nan thleidan khawh nakhnga ca zong ah thla ka cam. Cuticun Khrih ni a phanh tiang soisel awk nan um lai lo i midang kha nan tlukrilhter hna lai lo.
11 Jesuh Khrih bawmhnak thawng in dinnak thei tampi nan tlai khawh nakhnga zong thla ka cam. Mah nih Pathian kha sunparnak le thangṭhatnak a hmuhter lai.
12 Unau hna, ka tonmi thil sining cu thawngṭha karhtertu a si lehlam ti kha hngalhter kaan duh hna.
13 Khrih ruang ah thong ka tlakmi a si kha Siangpahrang Inn Cawngtu vialte le midang vialte nih an hngalh dih.
14 Mah leng ah Bawipa rian a ṭuanmi unau tam deuh cu thong ka tlak ruang ah lung ṭhawnnak an hun ngei deuh i Pathian bia kha ralṭha tein le ṭihnak ngei loin an chim.
15 Mi cheukhat nih mi nahchuahnak le mi zuamnak lungput he Khrih kong kha an chim. A cheu tu nih cun a hmaanmi lungput he an chim.
16 A hmanung phu cu dawtnak an ngeih caah Khrih kong an chimmi a si. Zeicahtiah kei cu thawngṭha chimnak nawl kilven awkah rian pek ka si kha an hngalh.
17 A hmasa phu tu cu a hmaanmi lungput he si loin i sik, i al duhnak lungput he an chimmi a si. Zeicahtiah thong ka tlak lioah harnak tonter an ka duh.
18 A phichuak cu zeidah a si? I titernak in a si ah, a hmaanmi lungput in a si ah, Khrih kong cu lam phun kip in chim a si. Cucaah kaa lawm ko i a hnu zong ah kaa lawm peng ko lai.
19 Lungtak in thla nan ka campiaknak thawng in le Jesuh Khrih pekmi thiang thlarau bawmhnak thawng in khamh ka si lai ti kha ka hngalh.
20 Ka duh bikmi le kaa ruahchanmi cu zei ruang hmanh ah ka ning a zak lai lo ti hi a si. Asinain zalong tein biachimnak nawl kha hmang in a hlan bantuk in atu zong ah Khrih kha ka thangṭhat lai. Ka nun ah siseh, ka thih ah siseh ka thangṭhat lai.*
21 Ka nun ahcun Khrih caah a si i ka thih ahcun keimah ṭhatnak caah a si.
22 Hi taksa pum in ka nun ko rih ahcun ka rianṭuannak in thei tam deuh ka tlai kho ko hnga. Asinain zeidah thim ding ti ka hngal lo.
23 Hi pahnih ah zeidah thim ding ti kaa harh ngai. Ka saduhthah cu luatnak hmu in Khrih he umṭi kha a si, cucu a ṭha deuh tukmi a si.
24 Asinain nanmah ṭhatnak caah taksa pum in nun rih hi a herh deuhmi a si.
25 Mah kha ka zumh caah nan ṭhanchonak ca le zumhnak in nan hmuhmi lawmhnak caah taksa pum in ka nung rih lai i nan dihlak sinah ka um rih lai ti kha ka hngalh.
26 Cuticun nan sin ka rat ṭhan tikah Khrih Jesuh zultu nan si ruang ah nan i lawmhnak cu a tam chinchin lai.
27 Khrih kong thawngṭha he aa tlakmi nunning in nung u. Cuticun nanmah ton ding in ka rat ah siseh, ka rat lo ah siseh, lungthin khat tein fek tein nan dir ti le thawngṭha ah hram aa bunhmi zumhnak kilven awkah lungrual tein nan i zuam timi thawng kha ka theih khawh lai.
28 Ralchanhtu kha nan ṭih hrimhrim hna lo timi thawng zong ka theih khawh lai. Mah cu ralchanhtu cu hrawh an si lai i nannih tu cu khamh nan si lai ti langhtertu a si. Cucu Pathian sinin a rami a si.
29 Zeicahtiah nannih cu Khrih zumhnak tinvo sung lawng si loin a caah temhinnak tuar ding tinvo sung zong pek nan si.
30 Nannih cu keimah bantuk in harnak nan tong ve. A hlanah ka rak tonmi kha nan hmuh i atu zong ah ka tong rih ti kha nan theih.
Footnotes
^ A hrampi, “ka pum in ka thangṭhat lai.”
