Filipi 2:1-30
2 Khrih he lungthin khat tein nan um ahcun, midang kha dawtnak in thazaang nan pek hna i nan hnemh hna ahcun, an cung ah siaherhnak, dawtnak le zaangfahnak nan ngeih ahcun,
2 lungthin khat tein um u, pakhat le pakhat i daw u, lungrual tein um u law ruahnak khat tein um u. Cuticun kaa lawmhnak kha tlinter u.
3 I sik, i al duhnak lungput le mah zawn ruahnak lungput he zei thil hmanh tuah hlah u. Toidornak tu ngei u law midang kha kanmah nakin an ṭha deuh tiah ruat u.
4 Nanmah ca ṭhatnak lawng ruat loin midang ca ṭhatnak zong kha ruat u.
5 Khrih Jesuh ngeihmi, hi bantuk lungput hi ngei ve u.
6 Khrih cu Pathian mui a keng ko nain Pathian he aa tlukmi sinak dirhmun kha cuh awkah a ruat bal lo.
7 Mah canah a ngeihmi vialte kha a hlawt dih, sal sinak kha aa lak i minung pakhat a hung si.
8 Mah leng ah minung pakhat in a rat tikah aa toidor i hremnak tung* cung ah a thih tiang nawl a ngai.
9 Cucaah Pathian nih a sangmi dirhmun ah a hlorh i min vialte lakah a sang bikmi min kha a pek.
10 Cucaah van ah a ummi, vawleicung ah a ummi le vawlei tang ah a ummi* vialte cu Jesuh min ah an khuk an i bil lai.
11 Pa Pathian kha sunparnak pek awkah Jesuh Khrih cu Bawipa a si tiah mikip nih zapi hmaiah an phuan lai.
12 Cucaah ka dawtle hna, nan sin ka um lioah nawl nan ngaih zungzal bantuk in atu ka um lo lio zong ah rak ngai chinchin u. Khamhnak nan hmuh nakhnga ṭih le therphang buin i zuam peng ko u.
13 Zeicahtiah Pathian cu tuah duhnak lungthin lawng si loin tuah khawhnak ṭhawnnak zong aan pek hnanak thawng in nanmah thazaang pek a duhtu a si.
14 Cucaah zei thil paoh kha phunzai lo tein le bia i al lo tein tuah ko u.
15 Cuticun nannih cu hrokhrolnak le ṭhatlonak chan* ah mawhchiat awk a um lomi, sualnak a ngei lomi le soisel awk a um lomi Pathian fale nan si kho lai. Hi vawlei ah ceunak petu bantuk in nan ceu lai.
16 Nunnak bia kha fek tein nan i tlaih khawh lai. Cuticun ka tlikmi le rian kaa zuammi cu a lak a si lo ti kha hngal in Khrih ni ah i lawmh awk a ruang ka ngei kho lai.
17 Nan zumhnak thawng in nan pekmi raithawinak le a thiangmi rian cung ah thlet thawinak bantuk in toih ding ka si hmanh ah kaa lawm ko i nan dihlak he kaa lawm ko.
18 Cu bantuk in nannih zong i lawm u law keimah he i lawm ve u.
19 Bawipa Jesuh duhnak a si ahcun a rauhhlan ah Timote kha nan sinah ka rak thlah lai tiah kaa ruahchan. Cu lawng ah nan kong ka theih tikah thazaang ka hmu kho lai.
20 Amah bantuk in lungtak tein nan zawn a ruatmi ahohmanh ka ngei hna lo.
21 Midang nih cun Jesuh Khrih ca ṭhatnak kha kawl loin anmah ca ṭhatnak tu kha an kawl.
22 Asinain Timote tu cu sining ṭha hna a ngeimi a si ti le thawngṭha karhter awkah pafa bantuk in keimah he rian fakpi in a ṭuanmi a si ti kha nan hngalh ko.
23 Cucaah ka cung ah a tlung dingmi thil ka hngalhle cangka nan sinah ka rak thlah lai tiah kaa ruahchan.
24 Bawipa duhnak a si ahcun keimah hrimhrim zong a rauhhlan ah ka ra kho lai tiah ka zumh.
25 Asinain nan lamkal a simi unau Epafroditas kha nan sinah thlah ṭhan a hau tiah ka ruah. Anih cu ka rianṭuan hawi le ka ralkap hawi a si leng ah a ka bultawltu zong a si.
26 Nan dihlak in aan ngai tuk hna i a zaw ti thawng nan theih caah a lung a ṭha lo tuk.
27 Anih cu thi dengmang tiang in a zaw; asinain Pathian nih a zaangfah, amah lawng si loin ngaihchiatnak pakhat hnu pakhat ka ton nakhnga lo keimah zong a ka zaangfah.
28 Cucaah amah nan hmuh tikah nan i lawmh nakhnga le ka lungretheihnak zong a zor deuh nakhnga a rannak in ka rak thlah.
29 Bawipa zultu pawl nan cohlan tawn hna bantuk in anih zong lunglawm tein rak cohlang u. Cu bantuk unaupa hna kha rak daw cikcek hna u.
30 Zeicahtiah anih cu Khrih rian a ṭuannak ah a rak thi dengmang i ka caah nan ka tuahpiak khawh lomi kha tuahpiak awkah a nunnak hmanh pek a ngamhmi a si.
Footnotes
^ Biafang Fianternak ah zoh.
^ Mah cu a tho ṭhan dingmi mithi kha an si.
^ Biafang Fianternak ah zoh.
