Filipi 3:1-21
3 Unau hna, a donghnak ah cah kaan duhmi hna cu Bawipa ah i lawm zungzal ko u. Nan sin i ka ṭial ciami kong nolh ṭhannak nih hin a ka simh lo. Mah cu nanmah huhphenhnak caah a si.
2 Uico* kha i ralring hna u; fahnak a pemi thil a tuahtu kha i ralring hna u; cuarpar tan awkah a forhtu* kha i ralring hna u.
3 Kannih cu cuarpar aa tan taktakmi, Pathian thiang thlarau thawng in a thiangmi rian a ṭuanmi kan si. Khrih Jesuh ruang ah aa uangthlarmi le mi nih an i bochanmi thil aa bochan lomi kan si.
4 Mi nih an i bochanmi thil kha i bochan ka duh ahcun bochan awk a ruang ka ngei ve ko hnga.
Midang nakhmanh in a ruang tam deuh ka ngei ko hnga.
5 Zeicahtiah kei cu a niriatnak ni ah cuarpar tanmi, Israel mi, Benjamin phun, Hebru chungchuak Hebru mi, phung lei in Farasi mi ka si.
6 Ka lung a thawh tuk caah Khrihfabu kha ka hrem i nawlbia felfai tein zulhnak in miding si awkah kaa zuam.
7 Asinain ka caah miaknak a simi thil hna cu Khrih ruang ah sunghnak a simi thil ah ka rel.*
8 Mah leng ah Bawipa Khrih Jesuh kong hngalhnak cu a sunlawi deuh tuk caah zeizong vialte kha pakpalawng ah ka rel. Khrih ruang ah zeizong vialte cu pakpalawng ah ka ruah i hmunthur men ah ka rel. Cucu Khrih kha ka hmuh i,
9 amah he lungthin khat tein kan um khawh nakhnga caah a si. Nawlbia ka zulh ruang ah si loin Khrih ka zumh ruang ah miding tiah ti ka si. Zumhnak thawng in Pathian nih miding ah a kan rel.
10 Kaa tinhmi cu Khrih kong hngalh awk le a thawhtertu i a ṭhawnnak kong hngalh awkah a si. A temhinnak kha i hrawm in a thih bantuk in thih ve awkah timhcia ka si.
11 A si khawh ahcun a hmasa thawhṭhannak ah i tel ka duh.
12 Mah laksawng cu ka hmuh cang i ka tling cang ka ti duhnak a si lo. Khrih Jesuh nih cu laksawng cu hmuh awkah a ka thimmi a si i laksawng hmuh awkah fakpi in kaa zuam peng rih ko.
13 Unau hna, mah laksawng cu ka hmuh cang tiah kaa ruat lo. Asinain ka tuahmi pakhat cu hnulei thil kha philh in hmailei thil banh i zuam kha a si.
14 Laksawng hmuh awkah hmuitinh ka chiah i fakpi in kaa zuam. Mah laksawng cu vancung nunnak a si i Pathian nih Khrih Jesuh thawng in a auhmi kha a pek hna lai.
15 Cucaah kannih nutling, patling a simi nih cu bantuk lungput cu ngei hna u sih. Cu bantuk lungput nan ngeih lo ahcun ngeih awkah Pathian nih aan bawmh hna lai.
16 Zei a si hmanh ah hi tluk in kan ṭhancho cang caah hi lam ning in ningcang tein kal peng ko hna u sih.
17 Unau hna, keimah hi rak ka zohchunh u. Nan caah zohchunh awk ṭha kan chiahmi ning in a nungmi kha ṭha tein zoh hna u.
18 Hremnak tung* cung i Khrih a thihnak zei ah a rel lomi ralchanhtu tampi an um ti kha atu le atu kaan chimh cang hna i atu zong ah mitthli he kaan chimh rih hna lai.
19 An donghnak cu rawhnak a si, an pathian cu an paw a si, ningzak a simi thil ah an i uangthlar i vawlei thil ah an lungthin an chiah.
20 Asinain kannih cu vancung rammi kan si i vancung in a ra dingmi khamhtu Bawipa Jesuh Khrih kha lungtho tein kan hngah.
21 Khrih nih zeizong vialte a ke tang ah chiah khawhnak, a liannganmi a ṭhawnnak kha hmang in a derthawmmi kan pum kha sunparnak in a khatmi amah pum bantuk ah a thlen te lai.
Footnotes
^ Mah cu an cawnpiaknak ruang ah Pathian mithmuh ah a thiang lomi kha an si.
^ Asiloah “an pum aa atmi hna.”
^ Asiloah “lungtho tein ka hlawt” ti zong a si kho.
^ Biafang Fianternak ah zoh.
