Titas 1:1-16
1 Pathian sal le Jesuh Khrih lamkaltu a simi Paul nih ca kaan kuat. Kei cu Pathian thimmi hna nih an ngeihmi zumhnak bantuk a ngeimi ka si. Cun Pathian lei i pekchanhnak he aa tlaimi biatak kong hmaan tein a hngalmi ka si.
2 Mah cu lih a chim kho lomi Pathian nih hlanliopi in bia a kan kamhmi zungzal nunnak ruahchannak cung ah aa hngat.
3 A caan a phanh tikah thawngṭha chimnak thawng in a bia kha a phuan. Kei cu kan Khamhtu Pathian nawl peknak thawng in thawngṭha chim awkah rian pek ka si.
4 Kan zumhnak aa khah leng ah ka fa taktak bantuk a simi Titas, ca kaan kuat:
Pa Pathian le kan Khamhtu Khrih Jesuh vel le daihnak cu na cung ah um ko seh.
5 Krit tikulh i kaan chiahtaknak a ruang cu a chambaumi thil kha remh awk le lamhruainak kaan pek ning in khua kip ah Khrihfa upa rian pek awkah a si.
6 Khrihfa upa cu soisel awk a um lomi le nupi pakhat lawng a ngeimi a si lai. A fale zong zumtu an si lai i duh paoh in a tlonglengmi le ralchanh a hmangmi tiah mi nih soisel lomi an si lai.
7 Pathian thilri zohkhenhtu a simi Khrihfabu zohkhenhtu cu soisel awk a um lomi, amah lung lawng aa rinh lomi, a thin a tawi lomi, zu a ri lomi, velh a hmang lomi, a miak hmuh awkah a hak a kau lomi,
8 khual a dawmi, ṭhatnak a duhmi, thleidan khawhnak a ngeimi, a dingfelmi, zumhawk a tlakmi, amahle amah aa uk khomi a si lai.
9 Cawnpiak thiamnak kha a hman tikah zumhawk tlakmi bia kha fek tein aa tlaihmi a si lai. Cuticun man a ngeimi cawnpiaknak in tha a pek khawh hna leng ah cawnpiaknak a ralchanhtu kha a chimhhrinh khawh hna lai.
10 Ralchanh a hmangmi, pakpalawng biachim a hmangmi le mi hlen a hmangmi tampi an um. A hleiin cuarpar tan a hau tiah a chimmi kha an si.
11 Annih nih a ding loin a miak hmuh duh ah cawnpiak awk a si lomi kong kha an cawnpiak hnanak thawng in innchungkhar cheukhat kha an zumhnak an hrawh hna caah an kaa phih a hau.
12 Anmah lak i profet pakhat nih “Krit tikulh mi, lihchim hmang, sahrang bang ṭihnungmi, mi thathu le mi orkhu” tiah a ti.
13 A chimmi cu a hmaan taktak. Cucaah fakpi in chimhhrinh peng hna. Cuticun an zumhnak a fek lai i,
14 Judah mi hna tuanbia menmen le biatak a mertakmi hna i nawlbia kha zei ah an rel ti lai lo.
15 A thiangmi caah cun zeizong vialte hi a thiang dih ko; asinain a thurhnawmmi le zumhnak a ngei lomi caah cun a thiangmi zeihmanh a um lo. Zeicahtiah an ruahnak le an chiaṭha thleidannak lungthin cu a thurhnawm.
16 Pathian kan hngalh tiah zapi hmaiah an ti nain an tuahsernak in cun Pathian kha an hlawt. Zeicahtiah annih cu fihnungmi le nawlngai lomi an si i zei bantuk thilṭha tuah awk hmanh ah an i tlak lo.
