Titas 2:1-15
2 Nang tu cu man a ngeimi cawnpiaknak he aa tlakmi kong kha chim peng.
2 Kum upami pa pawl cu mahle mah aa uk khomi, aa biatakmi, thleidan khawhnak a ngeimi, a zumhnak a fekmi, dawtnak le inkhawhnak a ngeimi an si awk a si.
3 Cu bantuk in kum upami nu pawl zong ziazalei ah hmaizah awk a tlakmi le thilṭha a cawnpiakmi an si awk a si. Mi thangchiat a hmangmi le zu nih a leemmi an si awk a si lo.*
4 Mah lawng ah a no deuhmi nu pawl kha an vale le an fale a dawmi,
5 thleidan khawhnak a ngeimi, ziazalei ah a thiangmi, a innchungkhar ṭha tein a zohkhenh khomi, zawnruahnak a ngeimi le an vale tang ah aa dormi si awkah ruahnak an cheuh khawh hna lai.* Cuticun Pathian bia cu thangchiat a si lai lo.
6 Cu bantuk in a no deuhmi pa pawl kha thleidan khawhnak a ngeimi si awkah forh peng hna.
7 Rian ṭha ṭuannak ah lam phun kip in zohchunh awk ṭha si i zuam. Lungtak tein a hmaanmi kong kha cawnpiak hna.*
8 Soi awk a um lomi, man a ngeimi bia kha chim. Cuticun ralchanhtu hna cu kan kong he aa tlaiin a chiatnaklei in zeihmanh chim awk an ngei lai lo i an ning a zak lai.
9 Salle cu zeizong kip ah an bawile nawl a ngaimi le an lungton awkah aa zuammi an si awk a si. An bia an leh lakmak hna awk a si lo.
10 An thil an fir awk a si lo, zumhawk a tlakmi an si kha an langhter awk a si. Cuticun kan Khamhtu Pathian cawnpiaknak kha a lam kip in an dawhter khawh lai.
11 Mi phun vialte* khamhnak a hmuhtermi Pathian vel cu langhter a si cang.
12 Pathian vel nih Pathian zei rel loin umnak le hi vawlei i a ṭhalomi duhnak kha hlawt awkah a kan cawnpiak. Cun atu chan* ah thleidan khawhnak ngeih awk, ding tein nun awk le Pathian lei i pekchanh awk zong ah a kan cawnpiak.
13 Mah caan chung ah a sunglawimi kan i ruahchannak kha siseh, a liannganmi Pathian le Khamhtu Jesuh Khrih sunparnak in an langh lainak kha siseh kan hngak.
14 Khrih nih ṭhatlonak a phunphun tuahnak in kan luat nakhnga,* a hleikhun in amah ta a simi miphun si awkah thiantermi le rian ṭha ṭuannak ah a lung a thomi kan si nakhnga a nunnak kha a pek.
15 Hi thil hna hi cawnpiak hna law forh peng hna. A tlingmi nawlngeihnak he chimhring hna. Ahohmanh nih in zawmhtaih hna hlah seh.
Footnotes
^ Asiloah “zu sal an si awk a si lo.”
^ Asiloah “an cawnpiak khawh hna lai.”
^ Asiloah “a hmaan ning tein cawnpiak hna” ti zong a si kho.
^ Mah cu miphun, hnulei sining le zatlang nunning a phunphun in a rami hna kha a chim duhmi a si.
^ Biafang Fianternak ah zoh.
^ A hrampi, “tlanh kan si nakhnga.”
