Titas 3:1-15
3 Cozah le nawlngeitu hna tang ah i dor in an nawl ngaih awk, rian ṭha phun kip ṭuan ding in timhcia si awk,
2 ahohmanh thangchiat lo awk, i sik a zuammi si lo awk, a tlarimi si awk le mi vialte cung ah nemnak langhter peng awkah ralrin pe zungzal hna.
3 Zeicahtiah kannih zong a hlanah khuaruah khawhnak a ngei lomi, nawl a ngai lomi, mi nih hlenmi, duhnak a phunphun sal le nuamhnak lawng a kawlmi, ṭhatlonak a tuahmi, nahchuah a hmangmi, fih a nungmi, pakhat le pakhat aa huami kan rak si.
4 Asinain a kan Khamhtu Pathian nih a zaangfahnak le minung a kan dawtnak kha a langhter cang.
5 (Mah cu a dingmi thil kan tuah ruang ah si loin a zaangfahnak ruang ah a si.) Kan nun nakhnga a kan thianternak* thawng in le a thiang thlarau hmang in mithar ah a kan sernak thawng in a kan khamh.
6 Mah thiang thlarau kha Khamhtu Jesuh Khrih thawng in siang ngai in a kan toih.
7 Velngeihnak thawng in miding ah rel kan si i zungzal nunnak ruahchannak a ngeimi rocotu kan hung si.
8 Hi bia hna cu a hmaanmi an si. Mah kong kha fakpi in chim peng hna ti kaan duh. Cuticun Pathian a zummi hna nih rian ṭha ṭuannak ah lungthin an pek khawh peng lai. Cu thil hna cu a ṭhami le mi caah man a ngeimi an si.
9 San a tlai lomi bia alnak, chuahkehnak min cazin kong i alnak hna kha hrial. Nawlbia kong i alnak le i siknak hna zong hrial. Mah hna cu man a ngei lomi le pakpalawng men an si.
10 Bu ṭhencheunak a chuahtertu kha voikhat, voihnih ralrin na pek hnuah a ngaih duh hlei lo ahcun amah cu hrial ko.
11 Cu bantuk mi cu lam a pial i sualnak a tuahmi a si caah a tuahsernak lila nih sual a phawt ko.
12 Na sinah Artemas maw, Taikhikas maw ka rak thlah tikah a rannak in ka sinah Nikopolis ah rat khawh i zuam. Khuasik chung cuka ah um ding in bia ka khiah.
13 Nawlbia kong ṭha tein a hngalmi Zenas le Apollo kha an khualtlawnnak ah zeihmanh an chambau nakhnga lo na si khawh chung in rak bawm hna.
14 Unau pawl kha rian ṭha an ṭuan khawh peng nakhnga rak cawnter hna. Cuticun a herh taktak tikah bawmtu an si kho lai i thei an tlai kho peng lai.
15 Ka sinah a ummi vialte nih na kut an in tlaih. A kan dawmi zumtukhat pawl zong kha an kut ka tlaihpiak hna.
Pathian vel cu nan dihlak cung ah um ko seh.
Footnotes
^ A hrampi, “a kan kholhnak.”
