Jesuh cu mitling a si caah minung tonmi sifah harnak le lungretheihnak tampi kha a tong bal lo. Asinain mi cungah zaangfahnak le zawnruahnak a ngei. An herhmi nakin tam deuh hmanh tuahpiak a duh hna. Zaangfahnak a ngeihmi nih midang kha bawmh awkah a forh. Mah kong kha, Ṭhen 32, 37, 57, 99 ah hlathlai.

Jesuh cu ngakchia, upa dihlak he an i kom kho. Jesuh cu a rian tam tukmi phun in asiloah midang cungah zei rel lo phun in a um bal lo. Mi nih Jesuh lungput kha an hngalh caah a pawngah um kha an duh. Mah kong hngalh awkah, Ṭhen 25, 27, 95 ah zoh.

Jesuh cu a Pa sinah lungtho tein thla a cam peng. Amah lawngin a cam caan a um bantukin midang he zong an camṭi caan a um. Rawl ei caan lawngah thla a cammi a si lo. A dang caan zongah thla a cam. A Pa sinah lawmhnak bia chim awk le a biapimi biakhiahnak a tuah hlan zongah lamhruainak hmuh awkah thla a cam. Mah kong kha, Ṭhen 24, 34, 91, 122, 123 ah hlathlai.

Jesuh nih aa dinh caan hmanhah amahzawn lawng kha aa rak i ruat lo. Midang zawn kha a ruah hna. Keimah cu biapi bik ka si timi ruahnak a ngei lo. Mah kong zongah zohchunhawk ṭha a kan chiahpiak. Mah kong kha, Ṭhen 19, 41, 52 ah hlathlai.

Jesuh nih ngaihthiam a herhnak kong kha cawnpiak sawhsawh lawng si loin a zultu pawl le midang he an i pehtlaihnak ah a tuahsernak in a rak langhter. A tuahsernak kong kha, Ṭhen 26, 40, 64, 85, 131 ah rel law ṭha tein ruat.

Judah mi tam deuh in Jesuh kha Messiah in an cohlang lai lo i ral pakhat bantukin an thah lai tiah chimchung a si. Cucaah mah mi hna ca i rian a ṭuan tikah amah kha i zaangfah a ngah ko nain cutin a rak tuah lo. A hmaanmi biaknak karhter awkah lungtho tein a rak i zuam. A zultu pawl dihlak zong zei rel lonak le ralchanhnak an ton tikah cu bantuk lungthawhnak langhter awkah zohchunhawk ṭha a rak chiahpiak hna. Mah kong kha, Ṭhen 16, 72, 103 ah zoh.

Jesuh cu hngalhnak le fimnak lawng si loin a tling lomi minung nakin zeilei paoh in hngalhnak a ngei deuhmi a si. A tlingmi a si caah a pawngkam ah a ummi hna nakin pumsalei le lungthinlei ah hngalhnak a ngei deuh. Asinain midang rian kha toidor tein a rak ṭuan. Mah kong kha, Ṭhen 10, 62, 66, 94, 116 ah hmuh khawh a si.

Jesuh nih lamkaltu pawl le midang nih a nunning an i zohchunh lo tik le a chimmi ningin an tuah lo tikah lungsaunak a rak langhter. Jehovah he an i naih khawh nakhnga an herhmi kong kha lungsau tein atule atu a rak cawnpiak hna. Jesuh lungsaunak kong kha, Ṭhen 74, 98, 118, 135 ah hlathlai.