Dominican Republic, Santo Domingo khua ah ka rak chuak. Unau pali lakah a hniang bik ka si. Ka nu le ka pa cu cataang ngeimi an si caah an fale zong mifim, mithiam in ṭhang hna seh ti an kan duh. Keimah ka chuah hlan, kumli lioah ka nu le ka pa cu Mormon missionary pawl he an rak i tong. Thianghlim tein le zohdawh tein thil an i hruk-aihmi kha ka nu le ka pa nih an uar tuk caah Mormon church ah luh dingin biakhiahnak an tuah. Cuticun kan chungkhar cu Dominican Republic ram ah Mormon biaknak i a lut hmasalei ah kan i tel ve.

Ka upat tikah Mormon church i zatlang nunnak he aa tlaimi cawlcanghnak ah ka hun i tel. Mah church nih chungkhar le ziazalei phunglam hna kha biapi an chiah caah ka upat. Mormon biaknak chungtel ka si caah kaa uangthlar tuk. Cucaah Mormon missionary pakhat si dingin hmuitinh ka chiah.

Kum 18 ka si ah a ṭhami sianghleiruun ah ka kai khawh nakhnga kan chungkhar ningin United States ah kan i ṭhial. Kumkhat a rauh hnuah Florida ah a ummi, Jehovah Tehte a simi ka nute le a vapa nih an kan tlawng. Baibal hrambunh in tuahmi civuipi pakhat ah i pumh ve dingin an kan sawm. Civui ah mikip nih Baibal an kau i chingchiahnak ca (note) an i lakmi ka hmuh tikah mah nih ka lung a ka suk tuk. Cucaah cafung le catlap ka hal hna i note kaa lak ve.

Missionary ṭuan ka duhmi kha ka nute le a vapa nih an hngalh caah civui dih in Baibal kan in cawnpiak lai tiah an ka ti. Mah cu a ṭhami ruahnak cheuhnak a si tiah ka ruah. Zeicatiah mah lioah Baibal nakin Mormon Cauk kha ka hngalh deuh caah a si.

Ka nute le a vapa nih phone in Baibal an ka cawnpiak tikah Baibal cawnpiaknak le ka zumhnak kha tahchunh dingin tha an ka pek zungzal. Cun biatak kha keimah theng nih kawl awkah an ka forh.

Mormon zumhnak kong he aa tlaiin ka cohlanmi a kong tampi a um ko nain mah cu Baibal cawnpiaknak he aa tlakmi a si maw ti cu kaa fiang lo. Ka nute nih Jehovah Tehte Hna chuahmi 1995, November 8, I Hlau! mekazin kha a ka kuat. Mah ah Mormon zumhnak kong he aa tlaimi capar cheukhat aa tel. Mah tikah Mormon cawnpiaknak tampi ka hngalh lomi kha ka hun hngalh. Mah a kong pawl cu a hmaan maw, hmaan lo ti kha hngalh ka duh caah Mormon Website ah ka lut i ka hlathlai. Utah khua ah a ummi Mormon thilhlun chiahnak inn ka kal tikah I Hlau! ah langhtermi a kong pawl cu a hmaanmi an si ti kha ka hun hngalh.

Mormon Baibal le Baibal cu aa khat tiah ka rak ruah peng. Asinain Baibal kha ṭha tein ka rel tikah Mormon cawnpiaknak le Baibal cawnpiaknak hna cu aa khat lo ti kha ka hun hngalh.

Mormon zumhnak aa thleidan ruang lawngah si loin miphun ṭanhnak he aa tlaimi an cawnpiaknak ruang zongah ka lung a hung buai. Tahchunhnak ah, Eden dum cu U.S.A, Missouri, Jackson County ah a um tiah an ti. Pathian Pennak nih US cozah kha a hman lai i vawleicung kha a uk lai tiah Mormon profet pawl nih an chim.

Cutin a si ahcun ka chuahkehnak ram le a dang ram hna ah tah zeidah a cang lai ti kha hngalh ka duh. Mormon missionary ṭuan dingin cawnpiak a simi mino pa pakhat nih phone a ka chawnh i mah kong kha kan i ruah. Mormon biaknak a umnak ram hna khi ral i do hna sehlaw na ram caah ral na do lai maw tiah ka hal. Mah tikah ka do lai tiah a ka leh i ka khuaruah a har tuk. Cucaah ka zumhmi Mormon cawnpiaknak pawl kha thukpi in ka hlathlai i Mormon Church hruaitu pawl he kan i ruah. An chimmi ah ka hngalhthiam lomi, a thukmi kong hna aa tel. Ceunak cu duhsah in a ceu bantukin mah kong hna kha nikhatkhat ahcun na hngalhthiam te ko lai tiah an ka ti.

An chimmi nih ka lung a donghter i keimah kong le Mormon missionary si ka duhnak a ruang kha ṭha tein ka ruat ṭhan. Mormon missionary ṭuan ka duhnak a ruang pakhat cu mi pawl bawmh ka duh hna caah a si ti kha ka hun hngalh. Cun midang upatmi si ka duh ca zongah a si. Asinain Pathian kong kha ṭha tein ka hngal lo. A hlanah Baibal kha ka rel lengmang ko nain ka rak sunsak lo. Vawlei asiloah minung ca i Pathian tinhnak zong ka hngal lo.

Jehovah Tehte Hna he Baibal ka hlathlai tikah Pathian min cu ahodah a si, mi pakhat cu a thih tikah zei ah dah a can ti le Pathian tinhnak tlinternak ah Jesuh dirhmun cu zeidah a si? timi kong hna kha ka hun hngalh. A donghnak ah Baibal kong kha ṭha deuh in ka hun hngalh i midang sinah mah kong kha ka chim. Pathian a um ti cu a hmasa tein ka hngalh ko nain atu lawngah ka Hawikom ṭha bik in a sinah thla ka cam kho. 2004, July 12 ah Jehovah Tehte pakhat in tipil ka ing. Thla ruk a rauh hnuah Pathian rian kha caantling in ka rak ṭuan.

New York, Brooklyn i Jehovah Tehte Hna vawleicung pumpi zungpi ah kumnga chung rian ka rak ṭuan. Vawleicung pumpi mi nuai tampi caah ṭhatnak a pemi Baibal cauk le a dang Baibal hrambunhmi cauk pawl chuahnak ah ka si khawh chungin ka rak bawmh hna. Atu zongah mi nih Pathian kong an hngalh nakhnga ka bawmh peng rih hna.