Baibal Nih An Nunning A Thlen

SCOTLAND ram ah a ummi pa pakhat nih chawlehnak rian ah hlawhtlinnak hmuhnak nakin a biapi deuhmi thil kha zeitindah a hmuh? Brazil ah a ummi pa pakhat cu ziaza rawhralnak le ritnak sii hmannak ngol khawh awkah zeinihdah a bawmh? Slovenia ah a ummi pa pakhat nih zu tam tuk in dinnak kha zeitindah a ngol khawh? An chimmi bia kha rel hmanh hna u sih.

“Ka Nunnak Cu A Ṭha Tukmi A Lo.”​—JOHN RICKETTS

CHUAH KUM: 1958

CHUAHKEHNAK RAM: SCOTLAND

TUANBIA: CHAWLEHNAK AH HLAWHTLINNAK A HMUMI

HLANLIO: Thilri chawva tampi a ngei i nuam tein khua a sami pakhat ka si. Ka pa cu British ralbawi a si caah kan chungkhar in atu le atu kan i ṭhial. Scotland ram lengah England, Germany, Kenya, Malaysia, Ireland le Cyprus tikulh zongah kan rak um. Kum riat ka si in Scotland boarder sianginn ah ka um. A donghnak ah Cambridge Sianghleiruun in degree ka la.

Kum 20 ka si ah zinan rianṭuannak ah ka ṭuan i kum riat chung ka rak ṭuan. A hmasa ah Thlanglei America, cun Africa le a donghnak ah Nitlaklei Australia ah ka ṭuan. Australia kaa ṭhial hnuah company pakhat ka dirh i a hnuah ka zuar ṭhan.

Mah ka zuarmi in a miak tampi ka hmuh. Cuticun kum 40 ka si ah zei rian hmanh ṭuan hau loin ka um kho. Cucaah ka caan kha khualtlawnnak caah ka hman. Motorcycle in Australia kha voihnih ka hel i vawleicung pumpi ah khual ka tlawng. Ka nunnak cu a ṭha tukmi a lo.

BAIBAL NIH KA NUNNAK A THLEN NING: Rian kaa dinh hlan hmanhin thadam tein le nuam tein ka nun khawh caah Pathian cung kaa lawmhnak kha lamkhatkhat in langhter ka duh. Cucaah ka ngakchiat lioah ka rak i pumhnak Anglican Church ah kaa pum. Asinain mah biakinn ah Baibal kong kha an cawnpiak tuk hna lo. Cucaah Mormon biaknak kha ka hlathlai. Asinain mah biaknak zong nih Baibal kha biapi ah an chiah lo caah hlathlai ka huam ti lo.

Nikhat cu Jehovah Tehte Khrihfa hna nih ka inn kha an rak kingh. Baibal kha direct in an cherhchan i an chimmi kha ka hmuh. Baibal caangkhat an ka relpiak. Mah cu 1 Timote 2:​3, 4 kha a si. Mah Baibal caang ah “mi vialte nih khamhnak hmu hna seh ti le biatak kha hngal hna seh” tiah Pathian nih a duh ti kha a langhter. Jehovah Tehte Hna nih Baibal cungah hram aa bunhmi biatak kong kha a bik in an chim caah ka lung a ka suk.

Jehovah Tehte Hna he Baibal ka hlathlai caah Baibal kong biatak kha ka hun hngalh. Tahchunhnak ah, Pathian le Jesuh cu hngalh awkah a harmi Thumkomh pathian an si lo; aa dangmi mi pahnih an si ti kha ka hun hngalh. (Johan 14:28; 1 Korin 11:3) Mah bantuk a fiangmi biatak kong kha ka duh. Lung a buaitermi Thumkomh pathian kong hlathlainak caah a caan tampi ka rak pekmi kha ka pamter tuk.

Tlawmpal ah Jehovah Tehte Hna pumhnak ah ka hun i pum colh. Cuka i aa pummi vialte nih pakhat le pakhat panh tein an i chawnhbiakmi le a sangmi phunglam hna an zulhmi nih ka lung a ka suk tuk. Pathian an upat ning le an ṭihzah ning cu khuaruahhar taktak a si. Dawtnak taktak an langhter caah a hmaanmi biaknak ka hmuh cang ti kha ka hun zumh.​—Johan 13:35.

ṬHATNAK KA HMUH NING: Tipil ka in hnuah Diane timi nu pakhat he kan i tong. Anih cu Jehovah Tehte pakhat in a ṭhangmi a si i ka duhmi sining ṭha tampi a ngei. A hnuah kan i um. Diane sinin ka hmuhmi thapeknak le bawmhnak cu Jehovah sinin a rami thluachuah a si.

Diane he a herh deuhnak hmun ah phungchim rian kha ṭuan kan duh. Cucaah 2010 ah Central America i Belize ram ah kan i ṭhial. Pathian a daw i a kong cawn a duhmi hna sinah phung kan chim.

Pathian le Baibal biatak kong ka hngalh hnuin lungdaihnak ka hmu. Phungchim rian ah caantling in ka ṭuan i mi tampi kha Baibal kong ka cawnpiak khawh hna caah lawmhnak ka hmu. Ka hmuhtonnak in ka hngalhmi cu mi pakhat a nunnak a ṭhanchoter khomi cu Baibal biatak hleiin a dang zeihmanh a um lo ti kha a si. A donghnak ah ka nunnak caah Pathian cung kaa lawmhnak langhternak ah a ṭha bikmi lam kha ka hmuh cang.

“Ka Cungah An Ṭha Tuk.”​—MAURÍCIO ARAÚJO

CHUAH KUM: 1967

CHUAHKEHNAK RAM: BRAZIL

TUANBIA: ZIAZA A RAWKRALMI

HLANLIO: Brazil ram, São Paulo peng i Avaré timi khua ah a ṭhangmi ka si. Khuami tam deuh cu rianhrang a ṭuanmi an si.

Ka nu nih a ka pawi lioah ka pa cu a thi. Ka ngakchiat lio tein ka nu a um lo karah a thil kha kaa hruk tawn. Mah caan thawkin nu lungthin ka ngei. Midang zong nih nu dok, pa dok in an ka hmuh. A hnuah pa le pa sualnak ka tuah.

Kum 20 hrawng ka si tikah nu asiloah pa he nupa sualnak tuah duh ah zu zuarnak le nightclub ah ka kal tawn, church hmanhah ka rak kal. Carnival puai caan ah nu bantukin thil kaa hruk i samba-sianginn laamnak phu ah kaa tel ve. Cuka ah minthang mi pakhat ka si.

Ka hawile cu nu dok, pa dok, hlawhhlang rian a ṭuanmi le ritnak sii a hmangmi an si. Ka hawile cheukhat nih ritnak sii kha hramhram in an ka hmanter i cuticun mah nih a ka lem. A caan ah zan khuadei ritnak sii kan hmang i a caan ah keimah lawngin chun nitlak ka hmang. Ka der tuk caah mi nih AIDS a ngei cang tiah an ka ti.

BAIBAL NIH KA NUNNAK A THLEN NING: Cutin ka si lioah Jehovah Tehte Hna he kan i tong. Annih cu ka cungah an ṭha tuk. An ka relpiakmi Baibal caang pakhat cu Rom 10:​13 a si. Hitin a ti: “Bawipa min a aumi paoh cu khamh an si lai.” Mah Baibal caang ruangah Pathian min hman a biapitnak kong kha ka hun hngalh. Zan khuadei ritnak sii ka hman hnuah thlalang awng ka awn i van ka zoh, cun Jehovah Pathian ka bawm tiah ka mitthli he atu le atu thla ka cam.

Ritnak sii hmangin ka nunning a rawhmi kha ka nu nih a ka zoh tikah a ngaih a chia tuk, mah tikah ka nu kha ka zaangfak ṭhan. Cucaah ritnak sii kha hman ti lo awkah bia ka khiah. Mah hnuah Jehovah Tehte Hna he Baibal ka hung cawng. Baibal na hlathlaimi nih ritnak sii hman ti lo ding timi na biakhiahnak kha fehter awkah aan bawmh lai tiah tha an ka pek. Mah cu a hmaan taktak.

Baibal ka hlathlai thluahmah tikah ka nunning thlen a hau ti kha ka hun hngalh. A hleiin pa le pa sualnak tuah ngol kha kaa harh. Zeicahtiah keimahle keimah kaa hngalh in ka rak tuahmi thil a si caah a si. Asinain ka caah bawmtu a simi thil pakhat cu a ṭhalomi pawngkam kaltak kha a si. Ka hawikom hlun pawl kha ka kom ti hna lo i zu zuarnak le nightclub zongah ka kal ti lo.

Cutin thlennak tuah cu a fawi lo nain Jehovah Pathian nih a ka zohkhenh i ka harnak a hngalhthiam ti ka hngalh caah ka hna a ngam. (1 Johan 3:​19, 20) 2002 ah ngeihkhat he nupa sualnak tuah kha ka ngol khawh i mah kum ah Jehovah Tehte pakhat in tipil ka ing.

ṬHATNAK KA HMUH NING: Kaa thlenmi nih ka nu kha a lung a suk tuk i Baibal a cawng ve. Ngaihchiat awk ngai a simi cu Baibal a cawn tlawmpal ah ka nu cu a zeng. Asinain ka nu nih Jehovah a dawtnak le Baibal biatak a sunsaknak cu a zor lo.

Phungchim rian ah caantling in kaa telnak cu kum riat a si cang. Ka caan tampi hmangin midang kha Baibal kong ka cawnpiak hna. A caan ah a ṭha lomi duhnak hna a chuah ṭhan caah fakpi in kaa sum. Asinain mah ka duhnak ningin tuah lo awkah kaa zuammi nih Jehovah lung a lawmhter ti ka hngalh caah thazaang ka ngei ṭhan.

Jehovah kong tam deuh hngalh awk i zuamnak le a duhmi lam in nunnak nih mahle mah upatnak a ka ngeihter. Atu cu aa nuammi mi pakhat ka si cang.

“Zu Nih A Leemmi Ka Si.”​—LUKA ŠUC

CHUAH KUM: 1975

CHUAHKEHNAK RAM: SLOVENIA

TUANBIA: ZU A RAM TUKMI

HLANLIO: Slovenia ram i khualipi, Ljubljana ah ka chuak. Kumli ka si tiang nuam tein khua kan rak sa. Mah hnuah ka pa cu amahle amah aa that. Mah thil sining kan ton hnuah ka nu nih har le fe in ka upa he a kan cawm.

Kum 15 ka si ah ka pi sinah ka um. Ka pi he kan um caah kaa nuam tuk. A ruang cu hawikom tampi ka ngeih khawh caah a si. Mah lengah ka nu he kan um lio nakin ka za a long deuh. Kum 16 ka si tikah Zarhte le Zarhpi ah zu dinṭi a hmangmi hna he ka hun i kom. Ka sam kha saupi in kaa zuah. Ralchanh a hmangmi hna bantukin thil kaa hrukaih i a hnuah kuak zong ka hun zu.

Ritnak sii a phunphun ka hmang bal nain zu nih a ka lem bik. Zu din kha a nuam bik tiah ka ruah. Wine tlawmpal dinnak in a hnuah cun thawl khat leng ka hun din khawh. Ka dinmi zat kha mi nih hngalh khawh lo tiangin zu din zia ka thiam. Ka thaw ka chuah i zu haw ka nam lawngah mi nih zu ka dinmi kha an hngalh. Vodka zu cawhmi wine asiloah beer kha hrai tampi ka din khawh caah mi cu an khuaruah a har tuk!

Disco laamnak inn ah ka hawile nakin zu lethnih tam in ka ding ko nain kan ṭin tikah keimah tu nih ka hruai tawn hna. Nikhat cu ka hawi pakhat nih anih cu zu a ram tukmi a si tiah a ka timi kha a hnaki in ka theih. Slovenia mi nih midang nakin zu a ding kho deuhmi kha nautatnak in cutin an ti tawn hna. Cutin a ka ti caah ka ngaih a chia tuk.

Ka nunning kha ka hun ruat. San ka tlai lo i man zong ka ngei lo timi ruahnak ka hun ngei. Ka nunnak ah sullam a ngeimi zei thil hmanh a um lomi a lo.

BAIBAL NIH KA NUNNAK A THLEN NING: Mah lioah sianginn ka rak kaiṭi hawi pakhat a nunning aa thlenmi kha ka hmuh. A hlan nakin a lung a nem deuh. A kong hngalh ka duh caah lakphak dawr ah i ton dingin ka sawm. Bia kan i ruah lioah Jehovah Tehte Hna he Baibal ka cawng tiah a ka chimh. A cawnmi kong a ka chimh tikah ka theih bal lomi kong lawng te an si. Mah cu zei biaknak hmanhah ka rak um bal lo caah a si. Cuticun Jehovah Tehte Hna pumhnak ah ka hun i pum ve i anmah he Baibal ka cawng.

Baibal ka cawn tikah hmual a ngei tukmi biatak kong tampi ka hun hngalh. Tahchunhnak ah, Baibal nih “ni hmanung bik” tiah a auhmi caan ah kan nung ti kha ka hngalh. (2 Timote 3:​1-5) A rauhhlan ah Pathian nih misual pawl kha hi vawlei in a hloh dih cang hna lai i miṭha pawl lawng a nuam i a daimi hi vawlei ah zungzal in an nung cang lai ti zong ka hun hngalh. (Salm 37:29) Mah bantuk hmun ah um ka duh ve caah ka nunning kha thlen ka duh.

Ka hngalhmi Baibal biatak kong kha ka hawile ka chimh hna. Tam deuh nih cun an ka nihsawh. Asinain cutin an ka lehrulhmi cu ka caah a rak ṭha deuh. Cutin an ka lehrulhmi nih hawikom ṭha an si lo ti kha a langhter caah a si. Zu ka dinmi cu ka hawile ruangah a si ti kha ka hun hngalhthiam. Annih cu zu tampi din khawh caan a simi Zarhte le Zarhpi phanh lai lawng kha an i ngaih.

Mah ka hawile kha ka kaltak hna i Jehovah Tehte Hna he kaa kom. Mah nih thazaang a ka ngeihter. Jehovah Tehte Hna cu Pathian kha a daw i a duhnak ningin nun khawh awkah fakpi in aa zuammi an si. Zu tampi ka dinmi kha duhsah tein ka hun ngol khawh.

ṬHATNAK KA HMUH NING: Kaa nuamh nakhnga zu din a hauh ti lo caah Jehovah cungah kaa lawm tuk. A hlan ka nunning in nung ning law zeidah ka ton lai ti kha ka hngal lo. Asinain atu ahcun ka nunning cu a ṭha deuh tuk cang.

Slovenia ram, Jehovah Tehte Hna i zung ṭengnge ah rian ka ṭuannak cu kum sarih a si cang. Jehovah kong hngalhnak le amah biaknak nawl ka hmuhmi nih ka nunnak kha sullam a ngeihter.