Pa pakhat le kum sarih a simi a fapa cu bia an i ruah tiah na mitthlam ah cuanter hmanh. A pa nih “hlanliopi ah Pathian nih vawlei le a chungah a ummi thil vialte kha a rak ser hna. Cun nika, thlapa le arfi zong kha a ser hna” tiah a ti tikah a fapa nih chikkhat aa ruatta i “a si ahcun ka pa Pathian tah ahonih dah a ser” tiah a hal.

Mah tikah a pa nih “Pathian cu ahohmanh nih an ser lo. Anih cu a um zungzalmi Pathian a si” tiah a leh. Mah a sawhsawhte a simi a phi nih a fapa kha chikkhat chung cu a hna a ngamter. Asinain a upat tikah mah biahalnak kha a hun ruah ṭhan. Pathian cu ahohmanh nih an ser lo ti kha a caah hngalhthiam awkah a har. Van le vawlei hmanh sertu a um ahcun ‘Pathian cu khoika in dah a rat?’ tiah a ruah.

Baibal nih zeitindah a phi a pek? Baibal a phi cu a pa nih a fapa a lehmi a phi he a hrampi aa khat. Moses nih hitin a ti: “Maw BAWIPA, . . . Tlang an sem hlan le vawlei kha na ser hlan in nangmah cu zungzal in, hramthawknak zong um lo donghnak zong um loin Pathian na si.” (Salm 90:​1, 2) Cu bantukin profet Isaiah zong nih hitin a ti: “Nan hngal lo maw? Nan thei lo maw? BAWIPA cu zungzal hmunmi Pathian a si (Isaiah 40:28) Judas Baibal zong ah Pathian cu a “um zungzal ko” tiah a ti.​—Judas 25.

Mah Baibal caang hna nih Pathian cu “zungzal in a hmunmi Siangpahrang” a si ti kha a kan hngalhter. (1 Timote 1:​17) A sullam cu kan ruahnak nih a phanh khawh lomi hnulei caanpi in Pathian cu a um cang i hmailei zongah a um zungzal lai tinak a si. (Biathlam 1:8) Cucaah Pathian cu a um zungzal timi cu Pathian kong he aa tlaiin aa tlakmi a hrampi pakhat a si.

Mah kong ṭha tein hngalh cu zeicah a har? Minung cu kan chan a tawi caah a caan he aa tlaiin minung hmuhning le Pathian hmuhning cu aa lawh lo caah a si. Pathian caah nikhat cu minung caah ni thongkhat he aa lo. (2 Peter 3:8) Mah kong hngalhthiam awkah khaubawk kong kha ruathmanh: Ni 50 lawng a nungmi khaubawk nih minung kum 70 asiloah 80 kong cu a hngalthiam kho lai maw? A hngalthiam kho lai lo. Cucaah Baibal nih a Liannganmi Sertu he tahchunh ahcun minung cu khaubawk bantuk kan si tiah a ti. Cun Pathian ruahning he tahchunh ahcun kan ruahning cu zeihmanh a si lo. (Isaiah 40:22; 55:​8, 9) Cucaah minung nih Pathian kong he aa tlaiin a dihlak in kan hngalhthiam khawh lomi cu khuaruahhar awk a si lo.

Pathian cu a um zungzal timi kong cu hngalhthiam awkah a har ko nain Pathian thil sermi kong kha kan hlathlai ahcun mah kong hna kha hngalhthiam awkah a ruang ṭha kan ngei lai. Pathian cu mi pakhatkhat nih a sermi a si ahcun anih cu Sertu a si lai. Asinain Baibal ah Jehovah Pathian nih “zeizong vialte” kha a ser tiah a ti. (Biathlam 4:​11) Mah lengah a hramthawk ah van le vawlei cu a um lo ti kha kan hngalh. (Genesis 1:​1, 2) Van le Vawlei cu zeitindah a hung um? Van le vawlei a um hlanpi ah a ummi Pathian nih a ser caah a hung ummi a si. Cun mah hlanah Pathian nih a Fapa ngeihchun Jesuh le a dang vancungmi zong kha a ser hna. (Job 38:4, 7; Kolose 1:15) Cucaah zei thil hmanh a um hlanah Pathian cu a rak um ti cu a fiang ko. Pathian nih sernak rian a thawk hlanah ahohmanh an rak um rih lo caah ahohmanh nih Pathian cu an ser kho lai lo.

Cun kanmah theng kan ummi le van le vawlei a ummi nih zungzal hmunmi Pathian a um ti kha a langhter. Van le vawlei Sertu Pathian le van le vawlei uknak nawl a ngeitu Pathian cu a um zungzalmi a si. Cun amah ruangah kannih zong kan nun khawhmi a si.​—Job 33:⁠4.