ZEI kong he aa tlaimi biatak dah a si? Minung nih biahalnak an tuah tawnmi a biapi bik biahalnak cheukhat he aa tlai. Hi biahalnak hna hi na hal tawnmi an si men lai:

• Pathian nih kan zawn a ruat taktak maw?

• Raltuknak le sifah harnak a dong lai maw?

• Kan thih tikah zei ah dah kan can?

• A thimi hna caah ruahchannak a um maw?

• Zeiti thlacam ah dah Pathian nih a theih lai?

• A nuammi nunnak zeitindah hmuh khawh a si?

Mah biahalnak hna a phi kha khuazei ah dah na kawl lai? Library asiloah cauk dawr ah na kal ahcun hika ah a phi a um timi cauk thong tampi kha na hmuh ko lai. Asinain cauk pakhat le pa-khat cu an i khat lo. A cheukhat cauk cu chikkhat chung cu a hmaan ngaimi a lo ko lai nain a rauh hlan ah chan he aa tlak ti lo i remh ṭhan in an chuah asiloah a dang cauk in an chuah ṭhan tawn.

Asinain zumhawktlak a phi a ummi cauk pakhat a um. Cucu biatak cauk a si. Jesuh Khrih nih Pathian sinah hitin thla a cam: “Biatak cu nangmah bia kha a si.” (Johan 17:17) Atu chan ah mah Bia kha Baibal Thiang in kan hngalh. A hnu cahmai ah a cung lei biahalnak hna caah Baibal nih a fiangmi le biatak a chimmi a phi kha na hmuh lai.

BIAHALNAK A CHUAHNAK KONG: Ṭhatlonak le dinlonak in a khatmi vawlei ah kan nung. Biaknak tampi nih sifah harnak kan tonmi hi Pathian duhnak a si tiah an cawnpiak hna.

BAIBAL CAWNPIAKMI: Pathian nih ṭhatlonak kha a chuahter bal lo. “Pathian nih cun ṭhatlonak a tuah naisai lai lo i Lian Ngan Bik nih cun palhnak a tuah naisai lai lo” tiah Job 34:10 nih a ti. Pathian nih dawtnak in minung caah tinhmi a ngei. Mah kha Jesuh nih thlacamnak in hitin a kan cawnpiak: “Vancung khua i a um kan Pa . . . na Pennak cu rung tlung ko seh, vancung khua ah na duhnak an tuah bangin vawlei cungah hin tuah si ve ko seh.” (Matt. 6:9, 10) Pathian nih kan zawn a ruah tuk caah aa tinhmi tlinter hrimhrim awkah aa zuam.—Johan 3:16.

Genesis 1:26-28; Jeim 1:13; le 1 Piter 5:6, 7 zong zoh.

BIAHALNAK A CHUAHNAK KONG: Raltuknak nih rel cawk lo minung nunnak kha a hal peng rih. Sifah harnak nih kan dihlak in a kan hnorsuan.

BAIBAL CAWNPIAKMI: Vawlei pumpi daihnak in a khah lai caan kha Pathian nih a chimchung. Pathian nih vawlei a uk tikah mi cu “ral doh zong an i tim ti lai lo.” Mah canah “an vainam cu tuhmui ah an ser hna lai.” (Isaiah 2:4) Pathian nih dinlonak le sifah harnak vialte a dongter dih cang lai. Baibal nih hitin bia a kan kamh: “[Pathian nih] an mitthli vialte kha a hnawh dih hna lai. Thihnak a um ti lai lo, ngaihchiatnak le ṭahnak le fahnak zong a um ti lai lo. Thil hlun vialte cu an lo dih cang.”—Biathlam 21: 3, 4. 

Salm 37:10, 11; 46:9; le Mikah 4:1-4 zong zoh.

BIAHALNAK A CHUAHNAK KONG: Vawlei cung biaknak tampi nih thih hnuah pum chung in pakhatkhat a nungmi a um rih tiah an cawnpiak. A thimi nih a nungmi kha harnak an pek khawh hna, Pathian nih miṭha lo cu meialh chungah zungzal in a hrem hna tiah a cheu nih an zumh.

BAIBAL CAWNPIAKMI: Minung cu a thih tikah a um ti lo. “A thimi nih cun zeihmanh an hngal lo” tiah Phungchimtu 9:5 nih a ti. A thimi nih hngalhnak, ruahnak an ngei ti lo i hmuhtonnak zong an ngei kho lo. A nungmi kha harnak an pe kho hna lo i a bawmh zong an bawm kho hna lo.—Salm 146:3, 4. 

Genesis 3:19 le Phungchimtu 9:6, 10 zong zoh.

BIAHALNAK A CHUAHNAK KONG: Nun kan duh dih, kan dawtmi hna he nuam tein nun kan duh. Kan dawtmi a thimi hna hmuh ṭhan kan duh cu minung phung a si ko.

BAIBAL CAWNPIAKMI: A thimi tampi cu an thoṭhan lai. “Thlan chung i a ummi mithi vialte . . . an chuak lai” tiah Jesuh nih bia a kan kamh. (Johan 5:28, 29) Pathian nih a hram thawk aa tinhmi ning in minung in a thoṭhanmi hna cu vawlei cung paradis ah zungzal nunnak an hmu lai. (Luka 23:43) Mah hmailei ca biakammi ah nawlngaimi hna cu a tlingmi ngandamnak le zungzal nunnak an hmu lai. Baibal nih hitin a chim: “A dingmi cu ram chungah him tein an um lai i ram cu zungzal in anmah ta a si lai.”—Salm 37:29.

Job 14:14, 15; Luka 7:11-17; le Lamkaltu 24:15 zong zoh.

BIAHALNAK A CHUAHNAK KONG: Biaknak dihlak minung nih thla an cam. Asinain mi tampi cu thlacamnak leh kan si lo tiah an ruah.

BAIBAL CAWNPIAKMI: Thla kan cam tikah phung zulh in nolh ṭhan lengmang kha hrial awkah Jesuh nih a kan cawnpiak. ‘Thla nan cam tikah, nolh ṭhan lengmang hlah u’ tiah Jesuh nih a ti. (Matthai 6:7, NW) Kan thlacamnak Pathian nih thei seh ti kan duh ahcun a cohlanmi lam in kan cam lai. Cu ti tuah awkah Pathian duhnak cu zeidah a si hngalh a hau i mah ningin kan cam lai. Kuat khat Johan 5:14 nih hitin a fianter: ‘[Pathian] duhning in kan hal ahcun, kan halmi paoh kha a kan pek lai.’

Salm 65:2; Johan 14:6, 14; le 1 Johan 3:22 zong zoh.

BIAHALNAK A CHUAHNAK KONG: Mi tampi nih tangka, minthannak asiloah dawhnak nih nuamhnak a kan pek lai tiah an zumh. Cucaah an hmuh lomi nuamhnak caah mah khakha an kawl.

BAIBAL CAWNPIAKMI: Jesuh nih lunglawmhnak tawhfung zei a si kha a chim: ‘Thlarau lei chambaunak aa hngalmi cu, lunglawmmi nan va si dah!’ (Matthai 5:3, NW) Kan caah a herh bik a simi Pathian le kan ca i aa tinhmi kong hngalh duhnak kan ngeih a si ahcun lunglawmhnak taktak kan hmu kho. Biatak cu Baibal ah kan hmuh khawh. Biatak nih zeidah biapimi taktak a si le zeidah a biapi lomi a si hngalh awkah a kan bawmh khawh. Kan biakhiahnak le tuahsernak ah Baibal kha lam kan i hruaiter ahcun sullam ngei deuhmi nunnak kan hmu lai.—Luka 11:28.

Phungchimtu 3:5, 6, 13-18 le 1 Timote 6:9, 10 zong zoh.

 A cunglei biahalnak paruk caah Baibal a phi kha a tawinak in kan zohmi a si. Hi nak tam deuh in hngalh na duh maw? “Mi chambau kan si ti aa hngalmi” na si ahcun hngalh chap na duh lai a fiang ko. ‘Pathian nih kan zawn a ruah taktak ahcun ṭhatlonak le sifah harnak hi kum tampi chung zeicah umnak nawl a pek? Ka innchungkhar nunnak kha zeitindah ka ṭhanchoter khawh?’ timi biahalnak zong hngalh na duh ko lai. Mah biahalnak le a dang biahalnak zong lungtling in a phi a pemi Baibal ah a um.

Asinain atu chan mi tampi cu Baibal rel le hlathlai kha an i cungcang. Baibal hi hlan lio cauk a si, hngalh a har tiah an ruah. Baibal a phi hmuh awkah bawmh na hau maw? An bawm khomi hriamnam pahnih kha Jehovah hngaltu hna nih an timhtuah.

A biapimi biahalnak caah Baibal nih fiang tein a chimmi zoh awkah pakhatnak hriamnam cu Baibal Cawnpiakmi Taktak Cu Zeidah A Si? hi cu a rian a tammi hna caah timhpiak a si. Pahnihnak hriamnam cu man loin inn ah Baibal cawnpiaknak a si. Man loin Baibal an cawnpiak khotu sining a tlinhmi Jehovah Hngaltu pakhat cu na inn ah asiloah aa tlak deuhnak hmun ah a ra lai i Baibal kong i ruah ṭi awkah zarhfate caan tlawmpal na hman khawh. Vawlei pumpi mi nuai tampi cu mah timhtuahnak in ṭhathnemnak an hmu cang. Mi tampi nih “Biatak ka hmuh cang!” tiah lungsi ngai in an ti.

Hmuh khawhnak ro sung a dang a um ti lo. Baibal biatak nih zumhnak hrut, lung tuaitamnak le ṭihphannak in a kan luatter. Hi nih ruahchannak, tinhnak le lunglawmhnak a kan pek. Jesuh nih “Biatak cu nan hngalh lai i biatak nih cun an luatter hna lai” a ti.—Johan 8: 32.