•  Biahram Thawknak 2

•  Baibal Ah Thuhmi Ro Hna 3-5

  •  Phungchimnak 3

  •  Thlaraulei Lungvar Hna 4

  •  Baibal Relnak 5

•  Phungchim Rianṭuannak Ah Hmang 6-14

  •  Biahram Thawknak 7

  •  Pehzulh Dingmi 8

  •  Zultu Siternak 9

  •  Zumhnak Kong Fianternak 10

  •  Chim Ding 11

  •  A Chung Ummi 12

  •  Chim Ningcang 13

  •  Video le Cauk hna kha Hmang 14

•  Khrihfa Nunning in Nunnak 15-16

  •  Khrihfabu Baibal Cawnnak 16

•  Bia Donghnak 17

•  Thangṭhatnak le Ruahnak Cheuhnak 18

•  A Caan 19

•  Peng Zohkhenhtu Tlawn Caan 20

•  Peng Civui asiloah Pengkomh Civui Tuah Zarh 21

•  Philhlonak Tuah Zarh 22

•  Nunning le Rianṭuannak Zohkhenhtu 23

•  Nunning le Rianṭuannak Chairman 24

•  Ruahnak Cheutu A Bawmtu 25

•  Tuahchapmi Khaan Dang 26

•  Video 27

1. 1. Khrihfa Nunning le Rianṭuannak Pumhnak ah rian a ngeimi cu an dihlak in mah ah aa telmi lamhruinak nih a bawmh hna lai. Rian pek an simi ca an i timhtuah hlanah Nunning le Rianṭuannak Tuahchunhnak Cauk ah pek an simi rian le mah ah aa ṭialmi lamhruainak hna kha an zoh hmasa awk a si. Thawngthanhtu dihlak kha mah tinṭan ah min cazin pek ding in sawm hna. Khrihfabu ah lungtho tein aa telmi midang zong nih Baibal cawnpiaknak an cohlan i Khrihfa phunglam ning in an nun ahcun mah tinṭan ah min cazin an pek khawh. Thawngthanhtu a si lomi le min cazin pek a duhmi hna kha Nunning le Rianṭuannak Zohkhenhtu nih min cazin pek awkah tlinh a herhmi kha a chimh hna awk a si. Mah hnuah sining an tlinh le tlinh lo kha a theihter hna awk a si. Mah cu amah Baibal a cawnpiaktu (asiloah zumtu a simi nulepa) hmai ah tuah awk a si. Tlinh a herhmi cu tipil a ing rih lomi thawngthanhtu a hung si dingmi hna caah halmi he aa khat.—od-BU ṭhen 8 cat. 8.

1. 2. Minit 1. Zarh fatin a hramthawk hlasaknak le thlacamnak a dih hnuah aa pummi dihlak nih program cung ah hngalh duhnak lungthin an ngeih nakhnga le ṭhatnak an hmuh nakhnga Nunning le Rianṭuannak Pumhnak chairman nih a biapimi a kong hna kha a hlei in a langhter lai.

1.  3. Phungchimnak: Minit 10. A biatlangpi le a biapi bikmi a kong pahnih asiloah pathum hrawng kha Nunning le Rianṭuannak Pumhnak Tuahchunhnak Cauk ah langhter a si. Mah phungchimnak kha Khrihfa upa asiloah sining a tlinhmi bu rianṭuantu pakhat pek awk a si. Zarhtin Baibal relnak ah Baibal a thar ukkhat thawk a si tikah mah Baibal he aa tlaimi biahmaiṭhi video kha piah a si lai. Phungchimtu nih mah video le biatlangpi i aa pehtlaihnak a langhter khawh. Asinain tuahchunhnak cauk ah langhtermi a kong dihlak kha a chim khawh nakhnga ṭha tein aa timh awk a si. Tuahchunhnak cauk ah aa telmi hmanthlak hna kha a caan a um chung paoh ṭha tein a hman awk a si. Outline ah aa telmi a kong hna a fian chin nakhnga a dang a kong hna zong a chim khawh.

2.  4. Thlaraulei Lungvar Hna: Minit 10. Mah ṭhen hi cu biahram thawknak le bia donghnak a um lomi, biahalnak le phitnak a si. Khrihfa upa asiloah sining a tlinhmi bu rianṭuantu nih a tlaih awk a si. Caan tlaitu nih biahalnak pahnih kha a hal hna awk a si. Cun cherhchanmi Baibal caang hna rel a herh maw, herh lo ti kha biakhiahnak a tuah awk a si. A phi a pemi hna nih seken 30 asiloah mah nak tlawm in an pek awk a si.

3.  5. Baibal Relnak: Minit 4. Pa siangngakchia kha rian pek a si lai. Rianthiahmi nih biahram thawknak le bia donghnak chim loin a rel awk a si. Chairman cu rianthiahmi nih Baibal an rel tikah hmaan ding, hngalhthiam ding, nal ding, a chim duhmi a hlei in langhter ding, aw thlen ding, aa tlaknak zawn ah dir ding le a sining tein rel ding in bawmh awkah lungthawhnak a ngei lai. Baibal rel dingmi cu a tawi caan asiloah a sau deuh caan zong a um caah Nunning le Rianṭuannak Pumhnak zohkhenhtu nih rianthiahmi unau i an sining kha a tuaktan awk a si.

1. 6. Minit 15. Aa pummi dihlak nih phungchimnak ca an i timhtuah khawh nakhnga, phungchimnak le cawnpiaknak ah biaruah ning an ṭhancho khawh nakhnga caah timhtuahmi a si. A herh ahcun Khrihfa upa pawl zong siangngakchia rianthiah khawh a si. Siangngakchia in rianthiahmi kip nih Nunning le Rianṭuannak Tuahchunhnak Cauk chung i rian pekmi pawng ah a ummi breket chung i Cawnpiaknak asiloah Mi Kha Daw Hna timi brochure i cawn dingmi nambar ning in an tuah awk a si. A caan ah i ruahṭi ding timi ṭhen zong telh a si. Mah kha sining a tlinhmi Khrihfa upa asiloah bu rianṭuantu nih a tlaih lai.—I ruahṭi ding timi ṭhen tlaih ning kong he aa tlaiin  catlangbu 15 ah zoh.

2.  7. Biahram Thawknak: Mah ṭhen hi unaupa asiloah unaunu pakhat kha rianthiah khawh a si. A bawmtu cu anmah he nupa sining aa khatmi asiloah an chungkharmi an si awk a si. Rianthiahmi le a bawmtu nih ṭhut buin asiloah dir buin an tuah khawh.—Mah riahthiahnak kong he aa tlaiin a chung ummi le chim ningcang kong tam deuh in hngalh awkah  catlangbu 12 le  13 ah zoh.

3.  8. Pehzulh Dingmi: Mah ṭhen hi unaupa asiloah unaunu pakhat kha rianthiah khawh a si. A bawmtu cu anmah he nupa sining aa khatmi an si awk a si. (km-BU 5/97 ca. 2) Rianthiahmi le a bawmtu nih ṭhut buin asiloah dir buin an tuah khawh. A hmasa ta biaruah ning a pehzulh tikah rianthiahmi nih zeitindah chim ding a si ti kha hmuhsaknak a tuah awk a si.—Mah rianthiahnak kong he aa tlaiin a chung ummi le chim ningcang kong tam deuh in hngalh awkah  catlangbu 12 le  13 ah zoh.

4.  9. Zultu Siternak: Mah ṭhen hi unaupa asiloah unaunu pakhat kha rianthiah khawh a si. A bawmtu cu anmah he nupa sining aa khatmi an si awk a si. (km-BU 5/97 ca. 2) Rianthiahmi le a bawmtu nih ṭhut buin asiloah dir buin an tuah khawh. Mah ṭhen hi cu Baibal cawnpiaknak ah a ṭhangcho cangmi phun in hmuhsaknak tuah ding a si. Rianthiah a simi nih cuset khaset tiin cawn dingmi nambar pekmi a um lo ahcun biahram thawknak le bia donghnak chim a hau lo. Langhtermi a kong dihlak kha aw thangpi in rel a hau lo. Asinain rel duh ahcun rel khawh a si.

5.  10. Zumhnak Kong Fianternak: Chim ding a si ahcun unaupa pakhat rianthiah awk a si. Hmuhsaknak a si ahcun unaupa asiloah unaunu pakhat kha rianthiah khawh a si. A bawmtu cu anmah he nupa sining aa khatmi asiloah an chungkharmi a si awk a si. Rianthiahmi nih a biatlangpi biahalnak caah cherhchanmi kong a chim tikah fiang tein le fimkur tein a chim awk a si. Rianthiahmi nih a tlaihmi ṭhen ah cherhchanhmi cauk ka chim lai maw chim lai lo ti kha biakhiahnak a tuah khawh.

6.  11. Chim Ding: Mah ṭhen hi unaupa pakhat rianthiah awk a si. Khrihfabu i phungchimnak phun in a chim lai. Phungchimnak cu Mi Kha Daw Hna timi brochure thlaihhlei A cung ah hrambunhmi a si ahcun Baibal caang hna kha phungchim kal tikah zeitindah hman khawh a si timi kong kha a hlei in a chim awk a si. Tahchunhnak ah, Baibal caang kha zeitik ah dah hman ding, Baibal caang i a sullam le mi pawl he zeitindah i ruah ding timi kong kha a fianter lai. Phungchimnak cu Mi Kha Daw Hna timi brochure i cawn dingmi a kong pakhat cung ah hrambunhmi a si ahcun mah kong kha phungchim kal tikah zeitindah hman khawh a si timi kong kha a hlei in a chim awk a si. Cawn dingmi a kong 1 ah a langhtermi tahchunhnak asiloah bawmtu a si ahcun cawn dingmi ah aa telmi a dang zei bantuk Baibal caang paoh kha a chim khawh.

7.    12. A Chung Ummi: Mah catlangbu ah a ummi kong le a changtu cu “Biahram Thawknak” le “Pehzulh Dingmi” timi riahthiahnak caah hman khawh a si. Cuset khaset timi lamhruainak a um lo ahcun rianthiahmi i a hmuitinh cu bia a ruahmi hna kong he aa pehtlaimi a fiangmi Baibal biatak chimh awk le a hnu ah biaruahnak peh ṭhan awkah bia danhta kha a si awk a si. Cucaah rianthiahmi nih a caan te ah a si i an hmunhma caah hmual a ngeimi kong kha a thim awk a si. Cawnpiaknak Hriamnam chung i kan cauk le video pawl hngalhternak tuah le tuah lo cu amah tein bia a khiah khawh. Chim ningcang kha baihat in chim can ah rianthiahmi nih pumpak siaherhnak langhter awk le aa tlak ning tein chim awkah a tuah chung awk a si.

8.    13. Chim Ningcang: Rianthiahmi nih rian an pekmi kha an hmunhma i chim ning he aa tlak in a tuah awk a si. Tahchunhnak ah:

   1. (1) Innkhat hnu innkhat: Mah chim ningcang ah innkhat hnu innkhat phunghcimnak—pumpak in, phone in asiloah cakuat in—le innkhat hnu innkhat phungchimnak ah bia kan rak i ruahmi, pehzulh dingmi hna zong an i tel.

   2. (2) Tonsaphak phungchimnak: Mah chim ningcang nih biaruah sawhsawhnak in tehte khaan awkah caanṭha kawl kha a chim duhmi a si. Mah ah rianṭuannak, sianginn, innpa, zapi citmi mawṭaw asiloah nifatin na umkalnak ah Baibal kong na chimhmi hna aa tel.

   3. (3) Zapi lak phungchimnak: Mah chim ningcang ah mi an tamnak chawlehnak hmun, lam cung, pangpar dum, mawṭaw chiahnak hmun asiloah mi kan hmuh khawh hnanak hmun paoh ah phungchimnak aa tel.

9.  14. Video le Cauk hna kha Hmang: Thil sining cung ah i hngat in rianthiahmi nih video asiloah cauk hman ding in bia a khiah khawh. Rianthiahnak ah video aa tel asiloah video pakhat aa thim ahcun hngalhternak a tuah lai i a ruah hna lai. Asinain video piah a hau lo.

1. 15. Hlasak dih hnuah Baibal kha aa pummi hna nih an nunnak ah an hman khawh nakhnga bawmh awkah minit 15 a raumi mah ṭhen hi timh a si. Mah ah ṭhen, ṭhen khat asiloah ṭhen hnih aa tel lai. Cuset khaset timi lamhruainak a um lo ahcun Khrihfa upa asiloah sining a tlinhmi bu rianṭuantu hna kha rian pek khawh a si. Mahle hmun herhbaunak ṭhen tu cu Khrihfa upa lawng nih an tlaih awk a si. I ruahṭi ding phun in timh a si ahcun rian a ngeimi unaupa nih capar chung i a dang biahalnak hna kha a hman khawh. A biapi bikmi kong chim awk le aa pummi hna nih a phi pek awkah a caan a za in an ngeih nakhnga biahram thawknak kha tawi tein a chim awk a si. Biahalnak tuah ding a si ahcun biahalnak tuah dingmi nih a si khawh ahcun a ṭhutnak in si loin pulpit cung in a chim awk a si.

2.   16. Khrihfabu Baibal Cawnnak: Minit 30. Mah ṭhen hi sining a tlinhmi Khrihfa upa pakhat kha rianthiah awk a si. (Khrihfa upa an tlawmnak Khrihfabu ah a herh ahcun sining a tlinhmi bu rianṭuantu kha rian pek khawh a si.) Khrihfabu Baibal Cawnnak rianthiah awkah ahodah sining a tlinh ti kha Khrihfa upa phu nih bia an khiah awk a si. Rianthiahmi hna nih hmualngei tein an tlaih awk a si. Baibal caang ṭha tein hman a thiammi, rikhiahmi caan chung ah a dih khomi, zulh awk tlak a simi a konglam hna ṭha tein a fianter khomi a si awk a si. Biahalnak le phitnak ṭhen tlaihnak kong he aa tlaimi bupi chuahmi lamhruainak hna rel ṭhannak nih tampi a bawmh hna lai. (w23.04 c. 24, rinli kulh) Rian pek an simi zarh i cawn dingmi ṭha tein i ruahṭi hnuah saupi fianter ṭhan a hau lo. A si khawh ahcun a tlaitu le catlangbu a reltu hna kha zarh fatin an thlen hna awk a si. Khrihfa Nunning le Rianṭuannak Pumhnak chairman nih Baibal cawnnak kha a caan tlawmter deuh awkah a hal ahcun Baibal cawnnak a tlaitu nih a caan zeitindah ṭhumh ding a si kha biakhiahnak a tuah lai. Catlangbu cheukhat kha rel lo awkah biakhiahnak a tuah khawh.

1. 17. Minit 3. Nunning le Rianṭuannak Pumhnak chairman nih pumhnak ah kan theihmi a biapimi a kong cheukhat kha a chim ṭhan lai. Cun a hmaizarh ah cawn dingmi a kong hna kha theihternak a tuah awk a si. A caan a um rih ahcun a hmaizarh pumhnak ah rianthiahmi hna i an min kha a chim khawh. Cuset khaset timi lamhruainak a um lo ahcun bia donghnak a chim lioah chairman nih Khrihfabu ah a herhmi thawngthanhnak hna kha a thanh khawh i a herhmi ca hna zong a rel khawh. Lohmun tonnak, thianhhlimhnak ti bantuk langhter tawnmi a konglam hna kha cu a thanh awk a si lo. Thawngthanhnak ca taarnak ah taar awk a si. A donghnak biachimnak ah a caan a zat lo ruang ah thawngthanhnak hna thanh khawh a si lo ahcun asiloah ca hna rel khawh a si lo ahcun Chairman nih Khrihfa Nunning in Nunnak timi ṭhen kha a tawinak in chim awkah rianthiahmi unaupa hna kha a hal hna awk a si. ( Catlangbu 16 le  19 ah zoh.) Pumhnak cu hlasaknak le thlacamnak in donghter a si lai.

1. 18. Rianthiahmi pakhat cio a dih fatin Nunning le Rianṭuannak Pumhnak chairman nih Cawnpiaknak Brochure ah hrambunh in thangṭhatnak le ruahnak cheuhnak chim awkah minit 1 hrawng caan a hmuh lai. Chairman nih rianthiahmi kha hngalhternak a tuah tikah a tuah dingmi ruahnak cheuhnak kha cu a thanh lai lo. Asinain rianthiahmi nih a chim dih hnuah chairman nih aa tlakmi thangṭhatnak a chim lai, cun zohpiakmi ruahnak cheuhnak kong kha a chim lai i rianthiahmi nih ṭha tein a ṭuan khawhnak a ruang kha a chim khawh, asiloah a kong pakhatkhat ah a hleiin lungthin a pek ahcun zeicah a ṭhat lai ti kha a chim khawh. Chiarman nih rianthiahmi le aa pummi hna caah ṭhatnak a si lai tiah a ruahmi kong kha a chimh khawh hna. Rianthiahmi pakhat cio i an herhmi kha Mi Kha Daw Hna timi brochure, Cawnpiaknak brochure asiloah Rianṭuannak Sianginn cauk ah hrambunh in ruahnak a cheuh khawh hna asiloah pumh dih hnu le caan dang ah a dang tein ruahnak a cheuh khawh hna. An pekmi cawn dingmi nambar asiloah a dang cawn dingmi nambar he aa tlaiin ruahnak a cheuh khawh hna.—Nunning le Rianṭuannak Pumhnak zohkhenhtu le ruahnak cheutu a bawmtu kong he aa tlaimi lamhruainak hna kha  catlangbu 19,  24, le  25 ah zoh.

1. 19. Zei ṭhen hmanh a caan lonh awk a si lo bantuk in Nunning le Rianṭuannak Pumhnak chairman zong nih a caan a lonh awk a si lo. Nunning le Rianṭuannak Tuahchunhnak Cauk ah ṭhenkhat cio caah rikhiahmi a caan aa tel. Ṭhen khat cio ca i rikhiahmi caan ah a dih ahcun caan sau deuh lak a hau lo. Rianthiahmi hna nih a caan an lonh ahcun fimkhur tein a ngolter hna awk a si. Pumhnak i a dang ṭhen hna ah a caan an lonh ahcun Nunning le Rianṭuannak chairman asiloah ruahnak cheutu a bawmtu nih a dang tein ruahnak a cheuh hna awk a si. ( Catlangbu 24 le  25 ah zoh.) Hlasaknak le thlacamnak i telin pumhnak cu suimilam 1 le minit 45 a rauh awk a si.

1. 20. Khrihfabu ah peng zohkhenhtu nih a tlawn tikah a tanglei i a kong hna ruang ah dah ti lo cun program kha Nunning le Rianṭuannak Pumhnak Tuahchunhnak Cauk ah aa telmi ning in tuah awk a si: Khrihfa Nunning in Nunnak timi ṭhen i Khrihfabu Baibal Cawnnak kha peng zohkhenhtu nih a chim dingmi minit 30 a raumi, rianṭuannak phungchimnak in airolh a si lai. Rianṭuannak phungchimnak thawk hlanah Nunning le Rianṭuannak Pumhnak chairman nih tuah cangmi program kha a chim ṭhan lai i a hmaizarh program kha a thanh lai. Mah hnuah a herhmi thawngthanhnak kha a thanh lai, cun rel a herhmi ca hna kha a rel dih in peng zohkhenhtu kha hngalhternak a tuah lai. Rianṭuannak phungchimnak a dih hnuah peng zohkhenhtu nih aa thimmi hla in pumhnak cu donghter a si lai. Cun a donghnak thlacamtu ah unaupa pakhatkhat kha a sawm khawh hna. Peng zohkhenhtu tlawn chung ah tuah chapmi tinṭan a um lai lo. Peng zohkhenhtu nih mahle hmun Khrihfabu sinah a tlawnmi a si ahcun holh dang a hmangmi hna cu anmah an tuah ning in pumhnak kha tuah a si lai. Asinain Peng zohkhenhtu nih rianṭuannak phungchimnak a chim tikah cun an i fonh awk a si.

1. 21. Peng civui asiloah pengkomh civui tuah zarh ahcun Khrihfabu pumhnak kha tuah a si lai lo. Khrihfabu nih mah bantuk zarh ahcun cawn dingmi a kong hna kha pakhat cio in siseh, chungkhar ning in siseh hlathlai awkah tha an pek hna awk a si.

1. 22. Philhlonak tuah Ni cu zarhlai ah a si ahcun Nunning le Rianṭuan Pumhnak a um lai lo.

1. 23. Khrihfa upa phu nih an thimmi Khrihfa upa pakhat nih Nunning le Rianṭuannak Pumhnak zohkhenhtu in rian a ṭuan lai. Mah pumhnak hi ṭha tein a timhtuah lai i lamhruainak ning in tuah khawh awkah ṭuanvo a lak lai. Ruahnak cheutu a bawmtu he pehtlaihnak ṭha tein a ngeih awk a si. Nunning le Rianṭuannak Tuahchunhnak Cauk a hmuhle cangka in Nunning le Rianṭuannak Pumhnak zohkhenhtu nih zarhlai pumhnak caah thla hnih ca in rian a thiah hna lai. Mah leng ah siangngakchia rian a si lomi a dang ṭhen le zarhlai pumhnak chairman zong rian a thiah hna lai. Asinain Khrihfa upa phu nih hnatlakpimi lawng kha rian a pek hna awk a si. ( Catlangbu 3-16 le  24.) Rian a thiah hna tikah rian a thiahmi i a kum, a hmuhtonnak le zalong ten bia a chim kho maw timi kong hna kha a ruah awk a si. A dang pumhnak ṭhen ca zong ah mah ning in a tuah awk a si. Rianthiahmi pakhat cio kha Khrihfa Nunning le Rianṭuannak Rianthiahnak (S-89) form kha hmang in rianthiahmi nithla a phak hlan, a tlawm bik zarh thum hlanah a pek hna awk a si. Nunning le Rianṭuannak Pumhnak zohkhenhtu nih rianthiahmi min aa telmi catlap kha thawngthanhnak cataarnak ah a taar awk a si. Amah bawmh awkah a dang Khrihfa upa pakhat asiloah bu rianṭuantu pakhatkhat kha Khrihfa upa phu nih rian an pek khawh. Asinain siangngakchia rian a si lomi a dang rian vialte cu Khrihfa upa lawng nih rian a pek hna awk a si.

1. 24. Zarhkhat ah Khrihfa upa pakhat nih Nunning le Rianṭuannak Pumhnak a hramthawk in a dongh tiang chairman a ṭuan lai. (Khrihfa upa an tlawmnak Khrihfabu ah a herh ahcun sining a tlinhmi bu rianṭuantu kha rian pek khawh a si.) Biahram thawknak le bia donghnak i timhtuahnak caah ṭuanvo a lak lai. Cun pumhnak ṭhen dihlak kha hngalhternak a tuah leng ah Khrihfa upa phu an tlawm, tam cung ah i hngat in a dang ṭhen hna zong tlaih awkah ṭuanvo a lak khawh, a hleiin video lawng piah a hau i ruahṭi chap a hau lomi ṭhen kha a tlaih khawh. Ṭhenkhat le ṭhenkhat kar i ruahnak cheuhnak hna cu a tawinak in a si awk a si. Mah ṭhen ṭuanvo lak awkah Khrihfa upa ah ahodah sining a tlinh ti kha Khrihfa upa phu nih biakhiahnak an tuah lai. Sining a tlinhmi Khrihfa upa hna nih chairman kha aa changchang in an ṭuan lai. Hmunhma cung ah i hngat in Nunning le Rianṭuannak Pumhnak zohkhenhtu nih a dang sining a tlinhmi Khrihfa upa hna nakin atu le atu chairman rian kha a tlaih men lai. Khrihfa upa pakhat cu Khrihfabu Baibal Cawnnak tlaih awkah sining a tlinh ahcun chairman ṭuan awk zong ah sining a tlinh ko lai. Asinain chairman a ṭuanmi Khrihfa upa nih rianthiahmi hna kha dawtnak he thangṭhat le a herh ning in hmualngei tein ruahnak cheuh an herh ti kha aa cinken awk a si. Chairman nih pumhnak kha amahle caan te ah a dih khawh nakhnga ṭha tein ṭuanvo a lak lai. ( Catlangbu 17 le  19 ah zoh.) Chairman nih a duh i a hmun zong a um ko ahcun pulpit cung ah maih chiahpiak khawh a si.  Cuticun chairman nih a hnu ṭhen hna kha hngalhternak a tuah lioah rianthiahmi unaupa cu timhcia in a um kho lai. Cu bantuk in rianthiahmi nih Baibal a rel lio le Phungchim Rianṭuannak Ah Hmang timi ṭhen ah chairman cu cabuai pawng ah ṭhut a duh ahcun ṭhut khawh a si. Mah nih a caan sawksam lo awkah a bawmh lai.

1. 25. A si khawh tik caan paoh ah mah rian ṭuanvo lak awkah hmuhtonnak a ngeimi Khrihfa upa pakhat hman cu a ṭha. Nunning le Rianṭuannak Pumhnak ṭhen hna, zapi ca phungchimnak, Vennak Innsang cawnnak le Khrihfabu Baibal Cawnnak a tlaimi asiloah catlangbu a relmi Khrihfa upa hna le bu rianṭuantu hna nih ruahnak cheuh an herh ahcun ruahnak cheutu a bawmtu nih a dang tein ruahnak a cheuh hna awk a si. ( Catlangbu 19 ah zoh.) Khrihfabu ah phungchim le cawnpiak a thiammi Khrihfa upa an tam ahcun sining a tlinhmi Khrihfa upa pakhat cio nih kumkhat cio in ruahnak cheutu a bawmtu in ṭuan khawh a si. Rianthiahnak pakhat a dih fatin ruahnak cheutu a bawmtu nih ruahnak cheuh a hau lo.

1. 26. Rianthiahmi milu cung ah i hngat in Khrihfabu nih tuahchapmi khaan dang hna an tuah khawh men. Tuahchapmi khaan pakhat cio caah sining a tlinhmi ruahnak cheutu pakhat cio an um awk a si. Ruahnak cheutu cu Khrihfa upa a si ahcun a ṭha deuh. A herh ahcun sining a tlinhmi bu rianṭuantu pakhat zong rian pek khawh a si. Khrihfa upa phu nih mah rian a ṭuan kho hngami kha an thim awk a si i aa changchang in ṭuan a si lai maw, si lai lo timi he aa tlai zong in bia an khiah awk a si. Ruahnak cheutu nih  catlangbu 18 i lamhruainak ning in a tuah awk a si. Tuahchapmi khaan dang a um ahcun Baibal Ah Thuhmi Ro Hna timi ṭhen i Thlaraulei Lungvar Hna timi ṭhen a dih hnuah rianthiahmi hna kha tuahchapmi khaan ah kalter awk an si. Pumhnak i a donghnak siangngakchia rianthiahmi a dih hnuah an i fonh ṭhan awk a si.

1. 27. Mah pumhnak he aa tlaiin thimmi video hna kha hman a si lai. Zarhlai pumhnak caah video hna kha JW Library^® app ah hmuh khawh a si i electronic thilri in zoh khawh a si.

© 2023 Watch Tower Bible and Tract Society of Pennsylvania

S-38-HK 11/23