Let pour Tit 2:1-15
2 Me ou par kont, kontinyen ansenny sa ki an armoni avek sa bon lansennyman.*
2 Bann zonm pli aze i devret annan kontrol dan tou keksoz, zot devret serye, annan bon zizman, annan en lafwa solid e bokou lanmour ek landirans.
3 Pareyman, bann madanm pli aze i devret annan en konportman ki onor Bondye, zot pa devret kalonmni personn, zot pa devret bwar bokou diven* e zot devret ansenny sa ki bon
4 pour ki zot kapab konsey* bann madanm pli zenn pour kontan zot msye, kontan zot zanfan,
5 annan bon zizman, ki zot pir, ki zot travay kot lakour,* ki zot bon e soumet avek zot msye, pour ki personn pa koz an mal lo parol Bondye.
6 Pareyman, kontinyen ankouraz bann zonm pli zenn pour annan bon zizman.
7 Montre ki ou en legzanp an sa ki konsern fer sa ki byen dan tou laspe. Ou devret serye dan sa ki ou fer e ansenny sa ki pir.*
8 Dir bann bon parol* ki personn pa kapab kritike, pour ki sa bann ki opoz nou i ava onte e pour ki zot napa nanryen mal* pour dir lo nou.
9 Bann lesklav i devret soumet avek zot met dan tou keksoz, esey fer zot met plezir e pa replike.
10 Zot pa devret vol zot met, me demontre ki zot diny konfyans dan tou keksoz, pour ki dan tou sa ki zot fer zot ava anmenn loner lo lansennyman* Bondye nou Sover.
11 Parski Bondye in demontre son labonte ekstraordiner e sa i anmenn delivrans pour tou sort kalite dimoun.
12 Sa labonte ekstraordiner i form nou pour rezet bann kondwit ki dezonor Bondye ek bann dezir sa lemonn. I osi form nou pour viv dan en fason drwat, avek bon zizman ek devosyon pour Bondye dan sa lemonn,* konmela
13 anmezir ki nou pe esper sa lespwar merveye* ek sa letan kot nou Bondye pwisan ek nou Sover, Zezi Kri, pou ganny revele dan laglwar.
14 I’n donn son lavi pour nou, pour liber nou* avek en lavi kot nou ti fer tou sort keksoz mal e pour pirifye en pep ki’n vin zis pour li e ki devoue pour fer bann bon keksoz.
15 Kontinyen koz lo sa bann keksoz, ankouraz* e reprimann avek tou lotorite ki ou’n gannyen. Pa les personn mepriz ou.
Bann not
^ Oubyen “lansennyman ki anmenn byenfe.”
^ Oubyen “vin lesklav diven.”
^ Oubyen “form, fer zot rapel.”
^ Oubyen “okip zot lakour.”
^ Oubyen “ansenny avek lapirte.”
^ Oubyen “parol ki anmenn byenfe.”
^ Oubyen “negatif.”
^ Oubyen “ava anbeli lansennyman.”
^ Oubyen “lepok, sistenm.” Vwar Leksplikasyon bann mo.
^ Oubyen “ere.”
^ Literalman, “donn en ranson pour nou.”
^ Oubyen “konsey.”
