Zonas 4:1-11
4 Me Zonas pa ti kontan ditou e i ti vreman ankoler.
2 Alor, i ti priy Zeova: “Ar wi Zeova! Pa sanmenm sa ki mon ti pe mazinen ler mon ti ankor dan mon pei? Sanmenm sa ki premye kou mon ti esey sove pour al Tarsis. Parski mon konnen ki ou en Bondye ki annan konpasyon ek pitye, ou pa ankoler vitman, ou annan en kantite lanmour fidel e ou pa kontan pini dimoun.
3 O Zeova, silvouple pran mon lavi,* plito mon mor ki mon kontinyen viv koumsa.”
4 Zeova ti demande: “Eski ou annan rezon pour ou sitan ankoler?”
5 Alor, Zonas ti kit lavil e i ti al asize dan les lavil. I ti fer en pti tonnel e asiz dan lonbraz pour gete ki pou arive avek sa lavil.
6 Zeova Bondye ti fer en pye kalbas pous par lao latet Zonas, pour donn li lonbraz e soulaz li dan son soufrans. Zonas ti vreman kontan sa pye kalbas.*
7 Me son lannmen ler soley ti pe leve, sa vre Bondye ti fer en lever pik pye kalbas e i ti sek.
8 Ler soley ti konmans tape, Bondye ti osi anvoy en divan so sorti dan les e soley ti tap lo latet Zonas e i ti fer li feb. I ti kontinyelman demande pour mor e i ti dir, “Plito mon mor ki mon kontinyen viv koumsa.”
9 Bondye ti demann Zonas: “Eski ou annan rezon pour ou sitan ankoler akoz sa pye kalbas?”
Zonas ti reponn: “Mon annan rezon ankoler, mon sitan ankoler ki mon oule mor.”
10 Me Zeova ti dir: “Ou’n pran pitye pour en pye kalbas ki ou pa’n plante, ni fer pouse. I’n pouse dan en lannwit e i’n mor dan en lannwit.
11 Pa mon devret osi pran pitye pour Niniv, sa gran lavil ki annan plis ki 120,000 dimoun ki pa ni menm konn sa ki byen ek sa ki mal,* san kont sa kantite zannimo ki zot annan?”
Bann not
^ Ebre, neʹphesh. Vwar Leksplikasyon bann mo.
^ Oubyen posibleman, “pye tantan.”
^ Oubyen “zot lanmen drwat ek zot lanmen gos.“
