Konman Dezabilite pou nepli egziste

I MAZIN sa ki pa vwar kler pe vwar, zorey sa enn ki sourd pe antann tou son, lalang sa ki kozpa pe sante avek lazwa, ek lipye sa enn bwate i vin for e kapab marse partou! Nou pa pe koz lo bann dekouvert eksepsyonnel dan domenn lasante, me plito konsernan bann rezilta lentervansyon Bondye dan lentere limanite. Labib i predir: “Sa letan lizye bann aveg pou ganny ouver, e zorey bann sourd pou ganny debouse. Sa letan sa enn ki bwate pou grenpe parey en serf, e lalang sa enn ki kozpa pou pous bann kriye lazwa.” (Izai 35:5, 6) Me konman nou kapab asire ki sa promes vreman enkrwayab pou ganny akonpli?

Premyerman, ler Zezi ti lo later, i ti an realite geri tou kalite maladi ek dezabilite. Deplis, bokou temwen ti vwar laplipar son bann mirak—enkli son bann lennmi. Annefe, dan omwen en ka, bann ki ti opoze e doute ti fer en lanket detaye lo en gerizon afen pour kapab demanti Zezi. Me zot ti bokou dezapwente akoz zot lanket ti zis konfirm son mirak. (Zan 9:1, 5-34) Apre ki Zezi ti’n fer ankor en lot mirak ki zot pa ti kapab demanti, zot ti dir avek fristrasyon: “Ki fodre nou fer? Get sa kantite mirak ki sa zonm pe fer.” (Zan 11:47) Sepandan, bann dimoun ordiner pa ti endiferan, akoz bokou zot ti konmans met lafwa dan Zezi.—Zan 2:23; 10:41, 42; 12:9-11.

Bann Mirak Zezi —En Apersi Gerizon mondyal

Bann mirak Zezi ti fer plis ki zis prouve ki Zezi ti Mesi ek Garson Bondye. Zot ti fourni en baz pour dimoun kapab met lafwa dan bann promes Bondye ki limanite obeisan pou ganny geri dan lavenir. Sa bann promes i enkli sa profesi dan Izai sapit 35 ki ganny mansyonnen dan premye paragraf. Konsernan kondisyon lasante dan lavenir pour bann imen ki annan lakrent pour Bondye, Izai 33:24 i deklare: “Okenn zabitan pa pou dir: ‘Mon malad.’ ” Pareyman, Revelasyon 21:4 i promet: “[Bondye] pou eswiy tou larm dan zot lizye. Lanmor pou nepli egziste. Pou nepli annan ni dey, ni plere, ni soufrans, parski lemonn ansyen in disparet.”

 Souvan-d-fwa, dimoun i priy pour lakonplisman sa bann profesi ler zot repet lapriyer model Zezi, ki annan en porsyon ki dir: “Ki ou Renny i ganny etabli; ki ou lavolonte i ganny akonpli lo later parey dan lesyel.” (Matye 6:10) Wi, lavolonte Bondye i enkli later ek limanite. Kantmenm zot in ganny permet pour en rezon, maladi ek dezabilite pou byento nepli egziste; zot pa pou gat “marspye” Bondye pour touzour.—Izai 66:1. *

Gerizon san Douler e pour nanryen

Nenport kwa ki ti fer dimoun soufer, Zezi ti geri zot san okenn douler, san tarde, e san fer zot peye. Forseman, parol konsernan Zezi ti propaz parey dife brousay, e i pa ti pran bokou letan pour ‘bann lafoul vin kot li. Zot ti anmenn bann dimoun bwete, bann envalid, bann aveg, bann kozpa e en kantite lezot dimoun malad e poz obor lipye Zezi e i ti geri zot.’ Konman ki dimoun ti reazir? Matye ki ti vwar sa bann keksoz ti kontinyen dan son resi: “Bann dimoun ti etonnen ler zot ti war sa bann kozpa koze, bann dimoun bwete marse, bann envalid vin byen, e bann aveg war kler. Zot tou zot ti glorifye Bondye Izrael.”—Matye 15:30, 31.

Remarke ki sa bann ki Zezi ti geri pa ti ganny swazir avek swen parmi lafoul—en trik ki ganny servi par bann ki pe fer krwar zot kapab geri lezot. Plito, bann fanmiy ek zanmi sa bann malad ti “poz [zot] obor lipye Zezi e i ti geri zot.” Annou revwar serten legzanp spesifik abilite Zezi pour geri.

Dimoun aveg: Pandan ki i ti Zerizalenm, Zezi ti fer en zonm ki ti “aveg depi son nesans” vwar kler. Sa zonm ti byen koni dan sa lavil konman en mandyan aveg. Alor ou kapab imazin sa leksitasyon ek tapaz ler dimoun ti vwar li pe marse e vwar kler! Me, pa tou dimoun ki ti zwaye. Ofanse akoz pli boner Zezi ti’n ekspoz zot mesanste, serten Farizyen, en sekt Zwif enportan e pwisan, ti esey fer tou pour rod levidans ki Zezi ti’n fer trik. (Zan 8:13, 42-44; 9:1, 6-31) Alor, zot ti kestyonn sa zonm ki ti’n ganny geri, apre sa son paran, e apre ankor sa zonm. Me lanket bann Farizyen ti senpleman konfirm mirak Zezi, ki ti fer zot ankoler. Sa zonm ki pa ti pe konpran rezonnman mesan sa bann relizye ipokrit, ti dir li menm: “Depi lemonn in konmanse, personn pa’n deza tann ki en dimoun in fer en aveg war kler. Si sa zonm pa ti sorti kot Bondye i pa ti pou kapab fer nanryen.” (Zan 9:32, 33) Akoz sa zonm ti eksprim son lafwa onnetman e i ti servi son lentelizans, bann Farizyen “ti pous li dan sinagog.”—Zan 9:22, 34.

Dimoun sourd: Ler Zezi ti dan Dekapol, en rezyon les avek Larivyer Zourden, “zot ti anmenn kot li en zonm sourd e ki ti koz avek difikilte.” (Mark 7:31, 32) Zezi pa ti selman geri sa zonm me i ti osi revele ki i ti vreman konpran oprofon santiman dimoun sourd, ki kapab anbarase dan lafoul. Labib i dir ki Zezi ti “tir li andeor lafoul” e i ti geri li. La ankor, bann temwen “ti telman etonnen ki zot ti dir, ‘I fer tou keksoz byen, i fer menm bann sourd tande e bann kozpa koze.’ ”—Mark 7:33-37.

Dimoun paralize: Pandan ki Zezi ti Kapernaoum, dimoun ti anmenn en zonm paralize lo en lanmak kot li. (Matye 9:2) Verse 6 a 8 i dekrir sa ki ti arive. “Zezi ti dir avek sa zonm paralize, ‘Leve, pran ou lanmak e al kot ou!’ Sa zonm ti leve e i ti al kot li. Kan lafoul ti war sa, zot ti ranpli avek lafreyer e zot ti glorifye Bondye ki’n donn zonm en tel lotorite.” Sa mirak osi ti ganny fer dan prezans bann disip Zezi e osi son bann lennmi. Remarke ki bann disip Zezi ki pa ti avegle par laenn ek prezidis “ti glorifye Bondye” pour sa ki zot ti’n vwar.

Dimoun malad: “En lepre ti vin kot Zezi e i  ti tonm azenou, e sipliy li, ‘Si ou oule ou kapab pirifye mwan.’ Zezi ti pran pitye pour li, i ti avans son lanmen e tous li an dizan, ‘Mon oule ganny pirifye.’ Deswit lalep ti disparet lo sa zonm.” (Mark 1:40-42) Remarke ki Zezi pa ti ezite pour geri sa zonm me i ti fer li parski i ti senserman konpran santiman sa zonm. Imazin ki ou ti en lepre. Konman ou ti pou santi si ou ti’n ganny geri toudswit e san okenn douler avek en maladi terib ki ptit-a-pti pe avarye ou lekor e pe fer dimoun rezet ou dan lasosyete? San dout ou kapab konpran akoz ki en lot lepre ki ti ganny geri dan en fason mirakile ti “tonm lafas ater kot lipye Zezi e i ti remersi li.”—Lik 17:12-16.

Dimoun blese: Dernyen mirak Zezi avan ki i ti ganny arete e met lo poto ti en gerizon. Pyer “ki ti annan en lepe dan son kote, ti tire e sot zorey drwat serviter Gran-pret” ler i ti pe defann Zezi kont bann ki ti vin pran li. (Zan 18:3-5, 10) Konsernan sa menm levennman resi Lik i dir nou ki Zezi “ti tous son zorey e geri li.” (Lik 22:50, 51) Ankor enn fwa, sa bon aksyon ti ganny fer devan bann zanmi osi byen ki devan lennmi Zezi—dan sa ka, avek bann ki ti pe al tyonbo li.

Wi, pli nou egzamin oprofon bann mirak Zezi, pli nou vwar bann levidans remarkab ki sa bann keksoz ti vreman arive. (2 Timote 3:16) E parey i’n ganny mansyonnen pli boner, en tel letid i devret ranforsi nou lafwa dan promes Bondye pour geri bann imen obeisan. Labib i definir lafwa Kretyen konman “lasirans dan keksoz ki ou pe espere e sertitid keksoz ki ou pa’n war.” (Ebre 11:1) I evidan, ki Bondye i ankouraz lafwa solid baze lo levidans, e non pa zis krwar san okenn laprev oubyen senpleman swete ki bann tel lesperans pou ganny akonpli. (1 Zan 4:1) Anmezir ki nou ganny en tel lafwa, nou trouv nou vin pli for e an bonn sante spirityel, e osi pli zwaye.—Matye 5:3; Romen 10:17.

Gerizon spirityel i devret vin avan!

Bokou dimoun ki fizikman an bonn sante pa zwaye. Serten i menm esey komet swisid akoz zot napa okenn lespwar pour lavenir oubyen akoz zot santi zot akable avek problenm. An realite, zot annan en dezabilite spirityel—en kondisyon pli serye dan lizye Bondye ki en dezabilite fizik. (Zan 9:41) Parkont bokou ki annan dezabilite fizik i viv en lavi satisfezan e ere. Akoz? Parski zot spirityelman an bonn sante e zot ganny kouraz avek en lespwar asire ki baze lo Labib.

Zezi ti refer avek en bezwen inik pour nou bann imen, kan i ti dir: “Zonm pa viv zis lo dipen tousel me lo tou parol ki sorti dan labous Bondye.” (Matye 4:4) Wi, kontrerman avek zannimo, imen i bezwen plis ki keksoz materyel. Vi ki nou’n ganny kree dan “zimaz” Bondye nou bezwen nouritir spirityel—konnesans Bondye e konnen ki plas nou annan dan son plan ensi ki fer son lavolonte. (Zenez 1:27; Zan 4:34) Ler nou annan konnesans Bondye, sa i donn nou lavi en sans e motiv nou pour servi Bondye. Sa konnesans i osi etabli baz pour lavi eternel dan en paradi lo later. “[Lavi eternel, NW ] savedir ki zot konn ou konman sel vre Bondye, ek Zezi-Kri ki ou’n anvoye.”—Zan 17:3.

I vo lapenn note ki bann kontanporen Zezi pa ti adres li konman “Geriser” me konman “Ansennyan.” (Lik 3:12; 7:40) Akoz? Parski Zezi ti ansenny dimoun konsernan solisyon permanan pour problenm limanite—Rwayonm Bondye. (Lik 4:43; Zan 6:26, 27) Sa gouvernman dan lesyel ki dan lanmen Zezi Kri pou diriz later antye e akonpli tou bann promes Labib konsernan reabilitasyon konplet e dirab bann imen drwat e zot lakaz, later. (Revelasyon 11:15) Sa i rezon akoz Zezi, dan son lapriyer model, ti relye larive Rwayonm avek realizasyon lavolonte Bondye lo later.—Matye 6:10.

 Pour bokou dimoun ki annan bann dezabilite, aprann konsernan sa lespwar ankourazan in fer zot larm latristes sanz dan larm lazwa. (Lik 6:21) Annefe, Bondye pou fer plis ki elimin maladi ek dezabilite; i pou efas lakoz soufrans imen—pese li menm. An realite, Izai 33:24 ek Matye 9:2-7 mansyonnen pli boner, i relye maladi avek pese ki dan nou. (Romen 5:12) Alor, avek pese ki ganny konkerir, limanite pou alafendefen rezwir “laliberte ek laglwar bann zanfan Bondye.”—Romen 8:21.

Sa bann ki rezwir en lasante ase bon i kapab fasilman negliz valer en bon lasante. Me pa sa bann ki soufer avek bann move leksperyans akoz bann dezabilite. Zot konnen konman ki lavi ek lasante i sitan presye e konman ki souden e san ekspekte keksoz i kapab sanze. (Eklezyast 9:11) Alor, i nou lespwar ki nou bann lekter ki annan bann dezabilite pou akord en konsiderasyon spesyal anver bann promes merveye Bondye ki’n ganny rikorde dan Labib. Zezi ti donn son lavi pour asir zot lakonplisman. Ki meyer garanti ki nou kapab annan?—Matye 8:16, 17; Zan 3:16.

[Not anba lo paz]