“I . . . Bondye bann vivan”
APROS AVEK BONDYE
“I . . . Bondye bann vivan”
Eski lanmor i pli for ki Bondye? Definitivman non! Ki mannyer lanmor oubyen okenn lezot “lennmi” i kapab pli for ki “Bondye Tou pwisan?” (1 Korentyen 15:26; Egzod 6:3) Bondye i annan pouvwar pour retir lanmor. I’n promet ki bann mor pou resisite pour viv dan nouvo lemonn. * Ki mannyer nou kapab konnen si sa promes i vre? Zezi, Garson Bondye li menm i asir nou, e sa ki i dir i kapab ranpli nou leker avek lespwar.—Lir Matye 22:31, 32.
Kan Zezi ti koz avek bann Sadiseen ki pa ti krwar dan rezireksyon, i ti dir: “Kot i konsern larezireksyon, eski zot pa’n lir sa ki Bondye ti dir zot? ‘Mwan menm Bondye Abraam, Bondye Izaak e Bondye Zakob.’ I pa Bondye bann mor, me Bondye bann vivan.” La Zezi ti pe refer avek sa konversasyon ki Bondye ti fer avek Moiz kot sa brousay ki ti pe brile lannen 1514 Avan Nou Lepok (A.N.L.). (Egzod 3:1-6) Dapre Zezi, sa ki Zeova ti dir avek Moiz konmkwa “mwan menm Bondye Abraam, Bondye Izaak e Bondye Zakob,” i montre ki sa promes konsernan rezireksyon pou definitivman ganny realize. Dan ki fason?
Annou premyerman vwar konteks sa parol. Kan Zeova ti koz avek Moiz, i ti annan 329 lannen depi ki Abraam ti’n mor, Izaak 224 lannen, e Zakob 197 lannen. Pourtan, Zeova ti dir “mwan menm,” pa “mon ti” zot Bondye. (Nou ki’n met an italik.) Zeova ti koz lo sa trwa zonm ki ti’n mor konmsi zot ti ankor vivan. Akoz?
Zezi ti eksplike: “I [Zeova] pa Bondye bann mor, me Bondye bann vivan.” Esey reflesir lo ki sa parol i enplike. Si ti napa rezireksyon, alor Abraam, Izaak, ek Zakob ti pou reste pour touzour dan lemonn lanmor e pa zanmen resisite. Si sa ti vre, Zeova ti pou en Bondye bann lekor mor. Sa ti pou osi vedir ki lanmor i pli for ki Zeova, konmsi Zeova napa pwisans pour delivre son bann serviter fidel dan lanmor.
Alor, ki nou kapab dir lo Abraam, Izaak, Zakob ek tou bann serviter fidel Zeova ki’n mor? Zezi ti fer sa deklarasyon: “Pour li tou i vivan.” (Lik 20:38) Lefet ki Zeova i mazin zot konmsi zot vivan, sa i montre ki Son plan konsernan rezireksyon son bann serviter fidel pou sirman realize. (Romen 4:16, 17) Zeova pou gard zot tou dan son memwar ziska sa letan fikse kot i pou redonn zot lavi.
Eski ou’n deza reflesir lo sa posibilite pour revwar en dimoun ki ou kontan ki’n mor? Si wi, mazinen ki Zeova i bokou pli for ki lanmor. I napa nanryen ki kapab anpes li akonpli son promes pour resisit bann dimoun mor. Akoz ou pa aprann plis lo rezireksyon ek sa Bondye ki pou realiz sa promes? Sa pou definitivman fer ou vin pli pros avek Zeova, “Bondye bann vivan.”
Mon lektir Labib
[Not anba lo paz]
^ par. 1 Pour aprann plis lo promes Bondye konmkwa bann mor pou resisite e viv dan en nouvo lemonn kot pou annan lazistis, vwar sapit 7 dan liv Ki Labib i vreman dir? pibliye par Temwen Zeova.
[Ekstre lo paz 7]
Zeova i bokou pli for ki lanmor
