Lekel Moiz?
LO KOUVERTIR: KI NOU APRANN AVEK MOIZ?
Lekel Moiz?
Kwa ki vin dan ou lespri ler ou tann sa non Moiz? Eski ou mazin . . .
▪ sa pti baba ki son manman ti kasyet dan en pannyen dan Larivyer Nil?
▪ sa garson ki fiy Faraon ti elve e annan en lavi deliks Lezip, me ki pa ti zanmen oubliye ki i ti en Izraelit?
▪ sa zonm ki ti en berze pour 40 an Madyann?
▪ sa zonm ki ti fer en konversasyon avek Zeova * devan en brousay ki ti pe brile?
▪ sa zonm ki ti annan kouraz ek lardyes pour demann lerwa Lezip pour liber bann Izraelit?
▪ sa zonm ki Bondye ti servi pour anons sa Dis Fleo lo Lezip kan lerwa sa pei ti refize obeir sa vre Bondye?
▪ sa zonm ki ti diriz bann Izraelit pandan en gran vwayaz sorti Lezip?
▪ sa zonm ki ti ganny servi pour separ Lanmer Rouz?
▪ sa zonm ki ti donn bann Izraelit sa Dis Komannman sorti kot Bondye?
MOIZ ti pas atraver tousala e plis ankor. I pa drol ki sa zonm fidel i ganny byen respekte parmi bann Kretyen, Zwif, ek Mouslim!
San dout, Moiz ti en profet ki ti fer bann keksoz vreman enkrwayab. (Deterononm 34:10-12) I ti les Bondye servi li pour fer bann keksoz ekstraordiner. Pourtan, Moiz ti en senp imen. Zis parey profet Eliya, ki ti aparet ansanm avek Moiz dan en vizyon kan Zezi ti lo later, Moiz osi ti en zonm ki ti “annan menm natir ki nou,” setadir annan bann santiman parey nou. (Zak 5:17; Matye 17:1-9) Moiz ti rankontre menm kalite problenm parey sa ki nou rankontre ozordi, e i ti reisi sirmont zot.
Eski ou ti a kontan konnen ki mannyer i ti fer sa? Annou vwar trwa bon kalite ki Moiz ti demontre e vwar ki nou kapab aprann atraver son legzanp.
[Not anba lo paz]
^ par. 7 Dapre Labib, Zeova i non Bondye.
[Portre lo paz 3]
