Moiz​—En zonm ki ti annan limilite

KI SAVEDIR LIMILITE? Limilite i lekontrer avek lorgey oubyen larogans. En dimoun ki annan limilite pa vwar lezot pli enferyer ki li, e menm si i enparfe, i konn son limit.

DAN KI FASON MOIZ TI DEMONTRE LIMILITE? Moiz pa ti vin vantar kan i ti ganny lotorite. Souvandfwa, kan en dimoun i ganny lotorite, se la ki ou pou vwar si i annan limilite oubyen non. Robert Ingersoll, en ekriven dan diznevyenm syek i dir: “Laplipar dimoun i kapab siport bann difikilte. Me si ou vreman anvi konnen ki kalite dimoun sa dimoun i ete, zis donn li pouvwar.” Alor, Moiz in kit en bon legzanp limilite. Dan ki fason?

Moiz ti annan en kantite lotorite. Zeova ti demann li pour diriz pep Izrael. Pourtan, sa lotorite pa ti fer li vin en dimoun vantar. Par egzanp, vwar lafason ki Moiz ti pran desizyon lo drwa konsernan leritaz. (Nonm 27:1-11) Sa desizyon ti enn difisil pour pran akoz i ti pou entrodwir en lalwa ki ti pou annan en lefe lo sa nasyon pour touzour.

Ki mannyer Moiz ti fer sa desizyon? Eski i ti krwar ki i ti kalifye pour fer en tel desizyon lo li menm vi ki i ti dirizan pep Izrael? Eski i ti pou fer sa desizyon baze lo son prop abilite, leksperyans, oubyen lo lafason ki i krwar Zeova ti pou azir?

Petet sanmenm ki en zonm vantar ti pou’n fer. Me pa Moiz. Labib i dir nou ki “Moiz ti anmenn [sa] ka devan Zeova.” (Nonm 27:5) Zis mazin sa! Menm apre ki i ti’n diriz pep Izrael pour 40 an, i pa ti depan lo son prop lekor, me lo Zeova. Pa Moiz ti en zonm ki ti vreman annan limilite!

Moiz pa ti krwar ki zis li ki merit ganny lotorite. I ti tre kontan kan Zeova ti donn lezot Izraelit privilez pour travay konman profet ansanm avek li. (Nonm 11:24-29) Par egzanp, Moiz ti demontre limilite e aksepte pour rod led avek lezot dimoun kan son boper ti konsey li. (Egzod 18:13-24) Ver lafen son lavi, Moiz ti demann Zeova pour apwent en sikseser menm si i ti ankor fizikman for. Kan Zeova ti apwent Zozye, Moiz ti siport sa zenn onm avek tou son leker, e demann tou dimoun pour les Zozye diriz zot ziska Later Promiz. (Nonm 27:15-18; Deterononm 31:3-6; 34:7) Moiz ti konsider li konman en privilez pour diriz bann Izraelit e osi pour ansenny zot lo Zeova, me pour Moiz, byennet lezot ti pli enportan ki annan lotorite.

KI LESON NOU TIRE? Annou pa zanmen les pouvwar, lotorite, oubyen abilite fer nou vin vantar. Pour kapab fer travay Zeova byen, mazinen ki limilite i pli enportan ki abilite. (1 Samyel 15:17) Kan nou vreman annan limilite, nou pou determinen pour aplik sa bon konsey Labib: “Met ou konfyans dan Zeova avek tou ou leker e pa apiy lo ou prop konprenezon.”​—Proverb 3:5, 6.

Legzanp Moiz i osi ansenny nou ki nou pa devret met tro bokou lenportans lo pozisyon oubyen lo lotorite.

Eski nou ganny okenn byenfe kan nou imit legzanp limilite Moiz? Byensir! Si nou devlop limilite, nou pou fer lavi pli fasil pour bann dimoun otour nou e zot pou kontan nou. Pli enportan ankor, Zeova pou kontan nou akoz li menm i annan sa zoli kalite. (Psonm 18:35) “Bondye i opoz sa ki annan lorgey, me i donn son lagras sa ki annan limilite.” (1 Pyer 5:5) Pa nou annan bon rezon pour imit limilite Moiz!

[Portre lo paz 5]