I’n ‘ranpli nou leker’
APROS AVEK BONDYE
I’n ‘ranpli nou leker’
Eski Zeova i enterese avek nou, oubyen i pa konsernen avek problenm bann imen? Larepons ki Labib i donn nou i vreman rezwir nou leker. Bondye i vreman enterese avek bann imen, e i anvi ki nou annan en lavi ki ere. Tou le zour i fer sir ki bann imen, menm bann ki pa rekonesan, i benefisye avek son labonte leker. Egzamin sa ki Labib i dir.—Lir Akt 14:16, 17.
Ler i ti pe koz avek bann dimoun dan lavil Lis ki pa ti bann adorater Bondye, Pol ti dir: “Dan letan pase, Bondye in les tou bann nasyon fer sa ki fer zot plezir. Me kantmenm sa i’n touzour revel son lekor par bann dibyen ki i’n fer: I’n donn zot son lapli sorti dan lesyel, ek bann rekolt, sakenn dan son sezon. I’n donn zot osi manze e i’n ranpli zot leker avek lazwa.” Eski sa bann dimoun ki ti pe ekout Pol ti konpran son parol?
Sa bann dimoun dan lavil Lis pa ti bezwen kas latet pour vwar ki parol Pol ti vre. Zot ti en kominote agrikol ki ti pe viv dan en rezyon fertil kot i ti annan dekwa delo. Me, parey Pol ti rapel zot, Bondye i Sours lapli ek bann sezon rekolt. Alor, sak fwa ki zot ti fer en bon rekolt e manz en bon repa, zot ti pe benefisye avek labonte Bondye.
Sa bann parol ki Pol ti adres avek bann dimoun Lis i ansenny nou plizyer leson enportan lo Zeova.
Zeova in donn nou sa liberte pour swazir. Remarke ki Zeova ti permet tou bann nasyon ki pa ti Zwif “fer sa ki fer zot plezir.” En liv referans pour bann tradikter Labib i fer resorti ki sa lekspresyon i kapab vedir “fer sa ki zot panse i pli byen.” Zeova pa fors personn pour ador li. I’n donn nou sa liberte pour swazir, sa abilite pour deside ki mannyer pour viv nou lavi.—Deterononm 30:19.
Zeova i anvi nou konn li. Pol i eksplike ki Bondye “i’n touzour revel son lekor.” Sa liv referans ki nou’n mansyonnen pli boner i dir ki sa fraz i kapab ganny tradwir “i’n klerman montre ki kalite Bondye i ete.” Son bann kreasyon i rann temwannyaz lo son “bann kalite envizib” ki enkli labonte, lasazes, pwisans ek lanmour. (Romen 1:20) Zeova in revel li avek nou pli klerman dan Labib. (2 Timote 3:16, 17) Eski pa i kler ki i anvi nou konn li?
Zeova i anvi ki nou ere. Pol ti dir ki ‘i’n ranpli nou leker avek lazwa.’ Menm sa dimoun ki fer pese e ki pa konn Zeova i kapab manze ziska leker kontan e annan en lavi ki ase ere. Me, Bondye i anvi ki nou rezouir vre boner e annan en lavi ere ki dirab. Sa i posib si nou aprann laverite lo li e aplik sa laverite dan nou lavi.—Psonm 144:15; Matye 5:3.
Nou tou nou benefisye avek labonte Zeova tou le zour. Akoz ou pa aprann plis lo ki mannyer pour demontre lapresyasyon pour sa Bondye ki ‘ranpli ou leker avek lazwa’?
Mon lektir Labib
[Ekstre lo paz 13]
Tou le zour Bondye i fer sir ki bann imen, menm bann ki pa rekonesan, i benefisye avek son labonte leker
