“Vantung Pasian in a bei thei ngei lo ding kumpi gam a hong phut ding hi.”—Daniel 2:44.

“Eite tungah tapa khat hong kipia hi. Amah pen eite hong ukpa hi ding hi.”—Isaiah 9:6.

• Thumanna tawh hong ki-ukna pan, phattuamna na ngah thei hi.—Isaiah 48:17, 18.

• Hong tungding leithakah, bukim taka cidamna leh lungnopna kingah ding hi.—Maangmuhna 21:3, 4.

Uphuai mah, Ahang a tawmpeen nih om:

• Pasian Gam in hong bawlsak dingte Jesuh in na lakkhol hi. Jesuh in a nungzuite kiangah Pasian Gam hong pai ding leh Pasian deihna leitungah a kicin ding in thungen un, ci-in hilh hi. (Matthai 6:9, 10) Hih thungetnate bangci danin tangtung ding cih, zong Jesuh in na lakkhia hi.

  Jesuh leitungah a om lai-in gilkialte anvak a, cinate damsak in, misite zong hingkik sak hi! (Matthai 15:29-38; Johan 11:38-44) Mailamah Pasian Gam’ kumpi a sem ding Jesuh in hong bawlsak dingte lahkholhna-in a bawl ahi hi.—Maangmuhna 11:15.

• Leitung paiziate in Pasian Gam a sawt lo-in hong tung ta ding cih, kipsak hi. Pasian Gam in leitungah kilemna hong bawlsak ma in, leitungah gal kidona, kialpi tunna, zinlingnate piang masa ding ci-in, Jesuh in na genkhol hi.—Matthai 24:3, 7.

  Tu hunah tua genkholhte kimu ta hi. Tua ahih manin Pasian Gam in hih buainate khempeuh a sawt lo-in hemkhiata ding hi cih, lungmuanna hong pia hi.