Mawũã ẽ. Ãyara kʼãrẽ jara ẽ bakunai ʉ̃rʉra, ãya krĩchapanʉ aba abakaʉba jidaibarata ãyi bakunaita, mawũã ẽ bʉrʉ bakuna ẽãta. Jeowa ʉ̃rʉ Kʼawuabipanʉrã mejãchaʉba jidapanʉ ãyi bakunaita.

 Dayirãitara yibia medikoraba akʉza yi siensia ʉ̃rʉ estudiabʉraba, sãwũã opanʉta ẽbẽrarã mejãcha kaya ẽ marẽã. Maʉ̃ba jʉrʉpanʉ medikora audre yibiarata. Maʉ̃ kʼarea maʉ̃ra medikora biga diapanʉ ãyi sãwũã zarea opanʉta kaya zroma zebʉrʉde ẽbẽrarã kʼarebaita.

 Jeowa ʉ̃rʉ Kʼawuabipanʉrãbara ũrĩpanʉ medikoraba jarabʉta akʉza nokʼoraba, kaya ʉ̃rʉ jarabʉdade. COVID-19 jʉ̃drʉsidera Jeowa ʉ̃rʉ Kʼawuabipanʉrãbara ãyi pagina internetʼneba, ũrãgʼa mejãcha diasida ũrĩbarata nokʼora ãyibʉmaebemaba jarabʉta. Ũrãgʼa diasida ãba yi jʉreda ẽ bamarẽã, kuarentenata odamarẽã, jĩgara bʼaita wuabemaraneba, juwa sʉgʉita, tapaboka jʉ̃ĩta akʉza nekʼãrẽ awuarabʉ nokʼoraba zokʼabʉta (Romanos 13:1, 2).

 Dããraba Jeowa ʉ̃rʉ Kʼawuabipanʉrãbara Daizeze Bedʼearadebemaneba ũrãgʼa diapanʉta, maʉ̃ odaita ãyi kartata zokʼa zebʉda:

•   Aba abakaʉba jidaibara kʼãrẽ tratamiento oita (Gálatas 5:6).

   «[Naʉ̃ kartaba] jara ẽ kʼãrẽ tratamientota oibarata akʉza kʼãrẽ tratamientota audre yibiata, awuarabʉrʉ bari jara ũrĩbibʉ mawũã ẽbẽrarã aba abakaʉba kʼawua jidamarẽã kʼãrẽ tratamiento oita» (¡Despertad!, 8 febrero 1987de).

   «Bʉta akʉza bʉ wũãwũãrata bakunakĩrãbʉbʉrʉ bʉyidobaʉba jidaibara» (¡Despertad!, 8 diciembre 1965de).

•   Jʉrʉpanʉ mediko kʼarebata, dayirãitara bebʉra jipa yibia baera (Hechos 17:28).

   «Jeowa ʉ̃rʉ Kʼawuabipanʉrãbara mediko kʼarebata jʉrʉbʉ mawũã zroga bʼaita. Ãyara bebʉra kãga, maʉ̃ba jʉrʉpanʉ kʼarebata ewari bio bʼaita. Mamina Daizeze Bedʼeaba jarabʉ ʉ̃rʉ, wã ẽã» (La Atalaya, 1 mayo 1976de).

   «Yibia medikoma wãira mawũã dayi bebʉ ewari bio erbaita akʉza bia bʼaita. Jeowa ʉ̃rʉ Kʼawuabipanʉrãitara bedʼea neẽ medikoraba tratamiento zokʼabʉ oira. Jeowa ʉ̃rʉ Kʼawuabipanʉrã mejãchaʉta idi ewade medikora Lucasbada kĩrãkʼa, (iyira mediko siglo nããradebemabasi). Jeowa ʉ̃rʉ Kʼawuabipanʉrãbara bia akʉpanʉ medikorata, enpermerarãta akʉza maʉ̃raneba zebʉta, ãya mawũã zarea obʉ baera kʼarebaita» (La Atalaya, 1 febrero 2011de).