Colosenses 1:1-29
1 I chaʼan Pablo, apóstol i chaʼan Cristo Jesús come cheʼʌch yom Dios, yicʼot i chaʼan jiñi la quermañu Timoteo
2 tiʼ tojlel jiñi chʼujuloʼ bʌ yicʼot xucʼuloʼ bʌ hermanojob xcʌntʼañoʼ bʌ i chaʼan Cristo ti Colosas:
Tajala jiñi ñuc bʌ i yutslel yicʼot i ñʌchʼtʌlel Dios jiñi lac Tat.
3 Tiʼ pejtelel ora mi lon cʌqʼuen wocolix i yʌlʌ Dios, jiñi i Tat lac Yum Jesucristo, cheʼ bʌ mi lon c chaʼlen oración ti laʼ tojlel,
4 come an lon cubi chaʼan bʌ jiñi laʼ ñopoñel ti Cristo Jesús yicʼot chaʼan bʌ jiñi laʼ cʼuxbiya tiʼ tojlel pejtelel jiñi chʼujuloʼ bʌ
5 come jatetla woli laʼ pijtan jiñi laʼ majtan chajpʌbil bʌ chaʼañetla yaʼ ti panchan. Jatetla tsaʼix laʼ wubi chaʼan bʌ ili pijtaya cheʼ bʌ tsaʼ subentiyetla jiñi tʼan chaʼan bʌ i sujmlel, jiñi wen tʼan
6 tsaʼ bʌ cʼoti ti laʼ tojlel. Cheʼ bajcheʼ jiñi wen tʼan wolix i yʌcʼ i wut yicʼot i pujquel majlel tiʼ petol pañimil, cheʼʌch woliʼ colel majlel yicʼot woliʼ yʌcʼ i wut ti laʼ tojlel cʼʌlʌl cheʼ bʌ tsaʼ laʼ ñaxan ubi yicʼot tsaʼ laʼ cʌñʌ ti tsʼʌcʌl bajcheʼqui an i sujmlel jiñi ñuc bʌ i yutslel Dios.
7 Jiñʌch tsaʼ bʌ laʼ cʌñʌ tiʼ tojlel jiñi cʼuxbibil bʌ lon c piʼʌl ti eʼtel Epafras, juntiquil xucʼul bʌ xʼeʼtel i chaʼan Cristo muʼ bʌ i mel jiñi eʼtel muʼ bʌ lon c mel cheʼ yaʼic añon lon quicʼotetla.
8 Tiʼ subeyon lon jaʼel chaʼan bʌ jiñi laʼ cʼuxbiya tsaʼ bʌ laʼ wʌcʼʌ ti pʼojlel tiʼ coltaya jiñi i yespíritu Dios.
9 Jin chaʼan, cʼʌlʌl cheʼ bʌ tsaʼ lon cubi jiñi, maʼañic cʌybil lon c chaʼan oración ti laʼ tojlel yicʼot mi lon j cʼajtin chaʼan mi laʼ cʌn ti tsʼʌcal chuqui yom Dios, mi laʼ taj laʼ ñaʼtʌbal yicʼot mi laʼ chʼʌmben i sujm jiñi i chaʼan tac bʌ Dios,
10 chaʼan cheʼ mi laʼ mel laʼ bʌ cheʼ bajcheʼ yom Jehová* i cheʼ bajcheʼ jiñi mi laʼ wʌqʼuen i tijicñʌyel cheʼ bʌ mi laʼ mel pejtelel chuqui wen i miʼ ñumen pʼojlel jiñi tsʼʌcʌl bʌ laʼ ñaʼtʌbal ti Dios.
11 Mi lon j cʼajtin jaʼel chaʼan ti jiñi wen ñuc bʌ i pʼʌtʌlel, mi laʼ pʼʌtʼesʌntel tiʼ pejtelel jiñi pʼʌtʌlel i cʼʌjñibal bʌ laʼ chaʼan chaʼan miʼ laj mejlel laʼ cuch yicʼot laʼ pijt i yicʼot laʼ tijicñʌyel,
12 cheʼ bʌ woli laʼ wʌqʼuen wocolix i yʌlʌ jiñi Tatʌl, tsaʼ bʌ i chajpayetla chaʼan mi laʼ wʌqʼuentel jaʼel jiñi muʼ bʌ caj i yʌqʼuentelob jiñi chʼujuloʼ bʌ añoʼ bʌ yaʼ baqui sʌc jaman.
13 Jin tsiʼ coltayonla loqʼuel tiʼ pʼʌtʌlel jiñi icʼyochʼañiyel i tsiʼ pʌyʌyonla majlel tiʼ yumʌntel jiñi cʼuxbibil bʌ i Yalobil,
14 tiʼ tojlel tsaʼ cojliyonla cheʼ tsiʼ tojo laj coltʌntel, jiñi i ñusʌntel lac mul.
15 I yejtalʌch* jiñi Dios mach bʌ tsiquilic, jiñi ñaxam bʌ tiʼ pejtelel chuqui melbil,
16 come tiʼ tojlel tsaʼ mejli pejtelel jiñi yan tac bʌ am bʌ ti panchan yicʼot ti pañimil, jiñi tsiquil bʌ yicʼot mach bʌ tsiquilic, mach yʌlʌyic mi trono, mi jiñi añoʼ bʌ i pʼʌtʌlel tiʼ tojlel yañoʼ bʌ, mi yumʌlob o añoʼ bʌ i yeʼtel. Pejtelel jiñi yan tac bʌ tsaʼ mejli tiʼ tojlel yicʼot i chaʼañʌch.
17 Cheʼ jaʼel, wʌn añix cheʼ bʌ maxto añic jiñi yan tac bʌ, i tiʼ tojlel tsaʼ mejli pejtelel jiñi yan tac bʌ,
18 yicʼot i jolʌch jiñi bʌcʼtalʌl, ili jiñʌch jiñi congregación. Jiñʌch jiñi i tejchibal, jiñi ñaxam bʌ tsaʼ chʼojyi* yaʼ baqui an chʌmeñoʼ bʌ, chaʼan jiñʌch jiñi ñaxam bʌ tiʼ pejtelel,
19 come Dios wen tsiʼ qʼuele chaʼan pejtelel chuqui an tsʼʌcʌl miʼ yajñel tiʼ tojlel,
20 i tiʼ coltaya Cristo, chaʼan jiñi i chʼichʼel tsaʼ bʌ i beqʼue yaʼ ti teʼ chaʼan bʌ wocol,* Dios tsiʼ yʌcʼʌ chaʼan miʼ yutsʼan yicʼot pejtelel jiñi an tac bʌ ti pañimil yicʼot an tac bʌ ti panchan.
21 Tiʼ sujm, wajali jatetla ñajt añetla tiʼ tojlel Dios yicʼot i contrajetla come jiñi laʼ ñaʼtʌbal yaʼ jach an ti chuqui mach bʌ weñic,
22 pero wʌle tsaʼix i yutsʼesayetla tiʼ tojlel i bʌcʼtal jiñi tsaʼ bʌ chʌmi, chaʼan chʼujul miʼ pʌsetla, maʼañic miʼ tajtʌl laʼ sajtemal yicʼot maʼañic chuqui miʼ mejlel ti ajlel ti laʼ tojlel tiʼ tojel i wut.
23 Weno, jiñʌch mi mucʼʌch laʼ chʌn ajñel ti laʼ ñopoñel, mi maʼañic chuqui miʼ ñijcañetla loqʼuel yaʼ baqui chuculetla i xucʼuletʌchla, mi maʼañic chuqui miʼ tʌtsʼetla* loqʼuel ti jiñi laʼ pijtaya chaʼan bʌ wen tʼan tsaʼ bʌ laʼ wubi yicʼot tsaʼ bʌ sujbi tiʼ pejtelel pañimil. Joñon, Pablo, tsaʼ waʼchocontiyon chaʼan mic sub jiñi wen tʼan.
24 Tijicña mi cubin c bʌ wʌle cheʼ woli c ñusan wocol ti laʼ caj, i wolito c lʌtʼ jiñi i wocol tac Cristo yomto bʌ mic ñusan tic bʌcʼtal chaʼan i wenlel jiñi i bʌcʼtal, jiñi congregación.
25 Joñon mic melben i yeʼtel jiñi i tejclum Dios come jiñʌch tsiʼ waʼchocoyon chaʼan ili eʼtel. Ili chaʼañʌch laʼ wenlel. Jin chaʼan tsaʼ c subu jiñi i tʼan Dios cheʼ bajcheʼ cʼamel tsaʼ mejliyon,
26 jiñi chʼujul bʌ tʼan mucul bʌ tsaʼ ajñi ti wajali yicʼot tiʼ tojlel lac piʼʌlob ti wajali. Pero wʌle tsaʼix aqʼuentiyob i cʌn jiñi chʼujuloʼ bʌ i chaʼan,
27 Dios wen miʼ qʼuel cheʼ miʼ yʌqʼuen i cʌn jiñi chʼujuloʼ bʌ jiñi ñuc tac bʌ tʼan mucul bʌ i chaʼan Dios, ili tsaʼ aqʼuenti i cʌn jaʼel jiñi tejclum tac. Ili mucul bʌ jiñʌch cheʼ temel mi la cajñel la quicʼot Cristo yicʼot jiñi pijtaya chaʼan mi lac taj jaʼel jiñi i ñuclel.
28 Jiñʌch Cristo woli bʌ la cʌcʼ ti cʌñol, woli lac wʌn subeñob pejtelel lac piʼʌlob yicʼot woli laj cʌntesañob tiʼ sujm bʌ ñaʼtʌbalʌl, chaʼan mi lac pʌs jujuntiquil wiñic tiʼ tojlel Dios bajcheʼ xcʌntʼañob i chaʼan Cristo tsaʼix bʌ i tajayob i colel.
29 Jin chaʼan woliyon ti tsʌts bʌ eʼtel, woli c chaʼlen wersa tiʼ coltaya i pʼʌtʌlel, woli bʌ mel i yeʼtel tic tojlel.
Nota tac
^ Qʼuele jiñi Glosario.
^ O «I cheʼ yilal bajcheʼ».
^ O «tejchi».
^ Qʼuele jiñi Glosario, teʼ chaʼan bʌ wocol.
^ O «choquetla».
