Tsaʼ coliyon ti jumpʼejl barrio am bʌ ti jiñi tejclum Los Ángeles (California, Estados Unidos), wen cʌmbil tiʼ caj wen an droga yicʼot an xcolelob motocñayoʼ bʌ ñumel chaʼan miʼ melob mach bʌ weñic. Joñon yicʼot querañob añon lon seis i joñon jiñi i chaʼticlel.

Cheʼ bʌ chutonto jiñi c mamá miʼ pʌyon lon majlel ti jumpʼejl iglesia evangélica. Pero cheʼ bʌ tsʼitaʼ ñucoñix, jiñi muʼ bʌ c ñʌchʼtan yaʼi miʼ yochel ti jumpʼejl c chiquin i miʼ loqʼuel ti yambʌ. Cheʼ ti domingo mic chaʼlen cʼay quicʼot junmojt añoʼ bʌ yaʼ ti iglesia, pero cheʼ ti jiñi yan tac bʌ qʼuin mic majlel ti qʼuiñijel tac, mic ñucʼ droga yicʼot mic mel tsʼiʼlel tac.

Tsʼitaʼ jach chuqui miʼ subeñoñob ora mic michʼan come wen jontolon. Chuqui jach mic taj mij cʼʌn ti jatsʼ chaʼan maʼañic mic sʌt. Tsaʼ bʌ j cʌñʌ yaʼ ti iglesia maʼañic tsiʼ wen coltayon, muʼ bʌ c wen al jiñʌch: «Lac Yum jiñʌch muʼ bʌ caj i yʌqʼuen i xotʼ i mul muʼ bʌ i mel mach bʌ weñic i joñon miʼ mejlel i cʼʌñon». Tiʼ yujtibal majlel jiñi jabil 1960, cheʼ bʌ lʌcʼʌ 18 c jabilel, tsaʼ c mulaj ochel ti jiñi junmojt lac piʼʌlob cʌmbiloʼ bʌ bajcheʼ Panteras Negras, wen cʌmbilob chaʼan miʼ chaʼleñob wersa i coltañob yambʌlob. Cheʼ bʌ añonto ti escuela an junmojt muʼ bʌ i coltañob lac piʼʌlob jaʼel i tsaʼ ochiyon yicʼotob. Jaysujtelic tsaʼ lon c mele huelga i tiʼ caj jiñi maʼañic miʼ yujtel clase.

Pero chaʼan joñon mach jasʌlic jach jiñi. Mach jalic tsaʼ ñumi i cabʌl jax chuqui tsaʼ c mele. Jumpʼejl ejemplo, joñon quicʼot jiñi camigojob mic majlel lon ti cine chaʼan mi lon j qʼuel película tac baqui miʼ wen ticʼlʌntel jiñi chʼoyoloʼ bʌ ti África aj troñelob jach bʌ ti Estados Unidos. Tiʼ caj tsaʼ bʌ lon j qʼuele tsaʼto ñumen michʼayon lon i tsaʼto lon c jatsʼʌyob jiñi xcolelob sʌcoʼ bʌ yaʼ bʌ añob ti cine. Cheʼ jiñi mi lon c loqʼuel majlel chaʼan mi lon c sʌclañob ti yambʌ barrio tac jiñi sʌcoʼ bʌ chaʼan mi lon jatsʼob jaʼel.

Ti jiñi bʌ ora joñon quicʼot querañob wen i cʌñʌyoñix lojon jiñi añoʼ bʌ i yeʼtel chaʼan wen jontolon lojon. Juntiquil quijtsʼin an yicʼot junmojt lac piʼʌlob wen cʌmbiloʼ bʌ chaʼan wen jontolob, i joñon yaʼan quicʼotob jaʼel. Mach weñix chuqui tsaʼ caji c mel.

I tatob juntiquil camigo testigojob i tsiʼ pʌyʌyoñob ti jiñi tempa tac bʌ muʼ bʌ i melob. Cheʼ bʌ ñaxan tsajñon tsaʼ c wen qʼuele chaʼan wen qʼuexelobʌch. Luʼ añob i Biblia yicʼot miʼ cʼʌñob. ¡Jinto jiñi xcolelob miʼ ñusañob alʌ discurso tac! Toj sajtel tsaʼ cubi chaʼan i cʼabaʼ Dios jiñʌch Jehová, yicʼot chaʼan mucʼʌch i cʼʌñob cheʼ bʌ miʼ tajob ti tʼan (Salmo 83:18, Traducción del Nuevo Mundo). Anquese mach junlajalic baqui chʼoyolob junlajal miʼ qʼuelob i bʌ.

Ti ñaxan mach comic miʼ yʌqʼueñoñob jumpʼejl estudio, pero mucʼʌch c mulan majlel ti tempa bʌ. Ti jumpʼejl bʌ acʼʌlel, cheʼ bʌ añon ti tempa bʌ, chaʼtiqui uxtiquil camigojob tsajñob yaʼ baqui miʼ yujtel jiñi aj cʼayob i ti tsʌnsayob juntiquil xcolel chaʼan jach miʼ chʼʌmbeñob jiñi i tsuts bujc wen lets bʌ i tojol. Tiʼ yijcʼʌlel wen tijicña woliʼ yʌlob chaʼan tsaʼ bʌ i meleyob. Mi jiñicto cheʼ bʌ yaʼañob ti meloñel mach i wentajobic. Lʌcʼʌ tiʼ pejtelelob tsaʼ otsʌntiyob ti cárcel chaʼan maʼañix miʼ junyajl loqʼuelob. ¡Tijicña tsaʼ cubi cheʼ mach yaʼic an quicʼotob ti jimbʌ ora! Cheʼ jiñi, tsaʼ c ñaʼta j qʼuextan jiñi c melbal yicʼot chaʼan mic chʼʌm jumpʼejl estudio.

Come mach junlajalic mij qʼuel lac piʼʌlob ti ñaxan, toj sajtel tsaʼ j qʼuele chaʼan bajcheʼ yila jiñi testigojob. An junsujtel cheʼ bʌ juntiquil testigo sʌc bʌ tsaʼ majli ti yambʌ país jiñi i yalobilob tsiʼ cʌyʌ tiʼ wenta jumpʼejl familia iʼicʼoʼ bʌ. I yambʌ familia sʌcoʼ bʌ jaʼel tsiʼ pʌyʌyob juntiquil xcolel iʼicʼ bʌ i pʌchʌlel chaʼan miʼ chumtʌlob yicʼot come maʼañic baqui miʼ chumtʌl. Jiñi tsiʼ pʌsbeyon chaʼan jiñi Testigojob mucʼʌch i tsʼʌctesañob jiñi tʼan tsaʼ bʌ i yʌlʌ Jesucristo am bʌ ti Juan 13:35: «Cheʼ bajcheʼ iliyi tiʼ pejtelelob mi caj i ñaʼtañob chaʼan xcʌntʼañetla c chaʼan: Mi mucʼʌch laʼ cʼuxbin laʼ bʌ». Cujil chaʼan tsaʼ c taja i sujm bʌ hermanojob.

Jiñi estudio woli bʌ c chʼʌm tsiʼ yʌqʼuen j cʌn chaʼan yom mij qʼuextan c melbal. Tsaʼ c chaʼle wersa chaʼan mach yomic jach mic pʌs chaʼan utson, pero yom loqʼuem tic pusicʼal (Romanos 12:2). Xucʼu xucʼul tsaʼ caji c tojʼesan majlel c melbal, ti enero ti 1974 tsaʼ c chʼʌmʌ jaʼ i tsaʼ sujtiyon bajcheʼ i testigo Jehová.

Anquese chʼʌmʌlix c chaʼan jaʼ, tsaʼʌch c bej chaʼle wersa chaʼan maʼañix mic wen michʼan. An junsujtel cheʼ bʌ woliyon lon ti subtʼan ti jumpʼejl barrio tsaʼ j qʼuele chaʼan juntiquil xujchʼ woliʼ chʼʌmben majlel i radiojlel j carro. Ajñel tsaʼ majli cajñesan. Cheʼ bʌ colelix c chuc, tiʼ choco jiñi radio ti lum i tiʼ bej chaʼle ajñel majlel. Cheʼ bʌ tsaʼ c subeyob jiñi c piʼʌlob ti subtʼan chaʼan bajcheʼ tsaʼ c chaʼ taja jiñi c radio, juntiquil hermano wen añix bʌ i ñaʼtʌbal, tsiʼ cʼajtibeyon: «Cheʼ tsaʼic a taja, ¿chuqui tsaʼ tumbe?». Cheʼ bʌ tiʼ cʼajtibeyon jiñi tsiʼ yʌqʼueyon j qʼuel chaʼan machʌxto c ñoj cʌyʌ chaʼan bajcheʼ yilalon wajali.

Ti octubre ti 1974, tsaʼ c teche jiñi subtʼan. Jujumpʼejl uw 100 ora mic mel chaʼan mi cʌqʼueñob estudio jiñi lac piʼʌlob. Ti wiʼil, tsaʼ pʌjyiyon chaʼan mic chaʼlen coltaya yaʼ ti central i chaʼan jiñi Testigojob am bʌ ti Brooklyn (Nueva York). Ti 1978 tsaʼ chaʼ majliyon yaʼ ti Los Ángeles chaʼan mij cʌntan c mamá come cʼam. Tsaʼ ñumi chaʼpʼejl jab, tsaʼ ñujpuñi quicʼot Aarhonda. Tsaʼʌch i wen coltayon chaʼan mij comol cʌntan lojon jiñi c mamá cʼʌlʌl tsaʼ chʌmi. Cheʼ jiñi tsaʼ pʌjyiyon lojon ti jiñi Escuela chaʼan Galaad de la Watchtower. Cheʼ bʌ tsaʼ ujti jiñi cʌntesʌntel tsaʼ chojquiyon lon majlel ti Panamá bajcheʼ misionero i yaʼʌch cʼʌlʌl añon lon ili ora.

Cʼʌlʌl bajcheʼ tic chaʼle chʼʌmjaʼ añʌch baqui wocol mi cubin chaʼan mic ticʼ c bʌ. Muʼ bʌ c mel jiñʌch cheʼ mic ñajtʼesan c bʌ tiʼ tojlelob jiñi muʼ bʌ i cajbeñoñob o mic sʌclan bajcheʼ mic tojʼesan jiñi wocol. Jiñi quijñam yicʼot yambʌlob, miʼ subeñoñob chaʼan weñʌch bajcheʼ mic mel cheʼ maʼañix mic wen michʼan i joñon muʼto i toj sajtel c pusicʼal jaʼel. Maʼan mi cʌl chaʼan tic bajñel jach woliʼ mejlel c mel iliyi. Tiʼ sujm, mic ñop chaʼan jiñi Biblia añʌch i pʼʌtʌlel chaʼan miʼ qʼuextan jiñi lac piʼʌlob (Hebreos 4:12).

Jiñi am bʌ j cʌñʌ yaʼ ti Biblia an i yʌqʼue i sujmlel j cuxtʌlel yicʼot an i coltayon chaʼan mic pʌs cutslel. Ili ora, maʼañic majqui mic jatsʼ, wʌle mij coltan jiñi lac piʼʌlob chaʼan miʼ cʌñob Dios. I tsaʼto cʌqʼue estudio juntiquil j contra bʌ ti escuala ti wajali. Cheʼ bʌ tiʼ chʼʌmʌ jaʼ, tsaʼ jumucʼ chumleyon lon quicʼot i bej lon camigojʌxto lon c bʌ. Cʼʌlʌl ili ora, joñon quicʼot quijñam an lon j colta ñumen ti ochenta lac piʼʌlob chaʼan miʼ sujtelob ti Testigo.

Mic wen aqʼuen wocolix i yʌlʌ Jehová cheʼ tsiʼ yʌqʼueyon c tijicñʌyel yicʼot i sujmlel j cuxtʌlel, i chaʼan joyolon tiʼ sujm bʌ hermanojob.