Tsaʼ coliyon ti Costa Rica ti jumpʼejl tejclum i cʼabaʼ Puerto Limón. Jiñi c papá c mamá an ocho i yalobilob, i joñoñʌch jiñi i sietejlel. Pero jiñi c papá tsaʼ chʌmi cheʼ bʌ an jaxto ocho c jabilel, i bajñel jach c mamá tsiʼ cosayon lojon.

Cʼʌlʌl cheʼ bʌ chutonto mic wen mulan alas i mic wen mulan jiñi béisbol. Cheʼ bʌ chʼitoñonto tsaʼ ochiyon ti jumpʼejl equipo chaʼan béisbol. Cheʼ bʌ 20 c jabilel tsaʼ pʌjyiyon ti alas ti jumpʼejl equipo profesional ti Nicaragua. Pero mach comic majlel ti chumtʌl ti Nicaragua, come ti jimbʌ ora tsaʼ cʼamʼa c mamá i joñon woli j cʌntan. Jin chaʼan maʼañic tsaʼ c jacʼʌ. Ti wiʼil tsaʼ pʌjyiyon ti alas ti jiñi equipo nacional chaʼan béisbol ti Costa Rica, anquese mach jumpʼejlic equipo profesional bʌ. I tsaʼʌch c jacʼʌ. Tsaʼ ajñiyon ti jiñi equipo ti 1949 cʼʌlʌl ti 1952 i tsaʼ c chaʼle alas ti Cuba, México yicʼot Nicaragua. Wen cujil alas ti jiñi equipo, ti 17 partido baqui tsaʼ c chaʼle alas mi junyajlic tsaʼ c sʌtʌ. Mic wen mulan cheʼ bʌ jiñi lac piʼʌlob miʼ yotañob j cʼabaʼ.

Pero tsaʼ caji c mel mach tac bʌ weñic. Anquese añʌch c novia, tiʼ pejtelel ora mic ñochtan yambʌ xʼixicob. Cheʼ jaʼel mic wen jap lembal. Ti jumpʼejl bʌ qʼuin tsaʼ wen yʌcʼayon i maʼañic tsaʼ cubi bajcheʼ tsaʼ cʼotiyon ti cotot. Cheʼ jaʼel, mi cʌsin dominó yicʼot jiñi lotería tiʼ caj taqʼuin.

Ti jimbʌ ora jiñi c mamá tsaʼ sujti tiʼ testigo Jehová. Tsiʼ ñopo i coltañon chaʼan mij cʌn jaʼel jiñi woli bʌ i ñop, pero maʼañic tsaʼ mejli come yaʼ jach an c pusicʼal ti jiñi alas. Cheʼ bʌ añon ti campo, mach jiñic cʼajal c chaʼan jiñi waj anquese wiʼñalon. Mic wen mulan jiñi béisbol.

Cheʼ bʌ 29 c jabilel, tsaʼ xujliyon cheʼ bʌ wolic ñop c chuc jiñi pelota. Anquese tsaʼʌch chaʼ weñʼayon tsaʼ j cʌyʌ jiñi alas yaʼ ti liga profesional. Pero maʼañic tsaʼ j cʌyʌ jiñi béisbol i tsaʼ caji j cʌntesan yambʌ xʼalasob tiʼ tʼejl cotot.

Ti 1957, tsaʼ c jacʼʌ majlel tiʼ colem tempa bʌ jiñi i testigojob Jehová tsaʼ bʌ mejli ti jumpʼejl estadio baqui tsaʼ c chaʼle alas. Cheʼ bʌ yaʼañoñi i tsaʼ j qʼuele jiñi wem bʌ i melbal jiñi Testigojob tsaʼ toj sajti c pusicʼal come mach lajalobic bajcheʼ jiñi lac piʼʌlob muʼ bʌ i cʼotel cheʼ miʼ yujtel jiñi béisbol. Jiñi tsiʼ ñijca c pusicʼal chaʼan mic chaʼlen estudio yicʼot jiñi Testigojob i mic tech majlel ti tempa bʌ tac.

Pejtelel tsaʼ bʌ j cʌñʌ yaʼ ti Biblia tsiʼ yʌcʼʌ ti toj sajtel c pusicʼal. Jumpʼejl ejemplo, Jesús tsiʼ yʌlʌ chaʼan ti jiñi cojix bʌ qʼuin jiñi xcʌntʼañob i chaʼan mi caj i subob jiñi wen tʼan chaʼan i Yumʌntel Dios tiʼ pejtelel pañimil (Mateo 24:14). Cheʼ jaʼel, tsaʼ j cʌñʌ chaʼan jiñi i sujm bʌ xñoptʼañob maʼañic miʼ chʼʌmob i tojol cheʼ bʌ miʼ chaʼleñob subtʼan. Jesús tsiʼ yʌlʌ: «Majtan jach tsaʼ aqʼuentiyetla, majtan jach yom mi laʼ wʌcʼ» (Mateo 10:8).

Cheʼ bʌ woli c chʼʌm jiñi estudio, mic lajeʼ majlel bajcheʼ yilal i melbalob jiñi i testigojob Jehová yicʼot jiñi i cʌntesajob. I mic wen qʼuel ti ñuc cheʼ miʼ chaʼleñob wersa chaʼan miʼ subob jiñi wen tʼan chaʼan i Yumʌntel Dios tiʼ pejtelel pañimil. Tsaʼ j qʼuele chaʼan mucʼʌch i pʌsob i yutslel cheʼ bajcheʼ tsiʼ yʌlʌ Jesús chaʼan yom miʼ melob jiñi xcʌntʼañob i chaʼan. I cheʼ bʌ tsaʼ c pejca tsaʼ bʌ i yʌlʌ Jesús ti Marcos 10:21: «Laʼ, i tsajcañon», tsaʼ c mulaj sujtel tiʼ testigo Jehová.

Pero añʌch chuqui wocol tac bʌ tsaʼ cubi. Jumpʼejl ejemplo, cabʌl jab tsaʼ j cʌsi jiñi lotería nacional i an jumpʼejl c número chaʼan bʌ jiñi suerte. Pero yaʼ ti Biblia tsaʼ j cʌñʌ chaʼan Dios maʼañic miʼ mulan cheʼ miʼ chʼujutesʌntel jiñi dios chaʼan bʌ jiñi Buena Suerte yicʼot cheʼ mi laj cʌlʌx mulan chuqui tac an (Isaías 65:11; Colosenses 3:5). Jin chaʼan tsaʼ j cʌyʌ jiñi alas. I ti jiñi ñaxam bʌ domingo cheʼ maʼañic tsaʼ c mʌñʌ jiñi lotería, ¡jiñi c número chaʼan bʌ jiñi suerte jiñʌch yajcʌbil bʌ tsaʼ loqʼui! Jiñi lac piʼʌlob tsiʼ wajleyoñob come maʼañic tsaʼ c chaʼle alas ti jimbʌ semana i tsiʼ wersa xiqʼuiyoñob chaʼan mic chaʼ chaʼlen alas, pero maʼañix tsaʼ c jacʼʌ.

Ti jiñi bʌ qʼuin cheʼ bʌ tsaʼ c chʼʌmʌ jaʼ tsaʼ c taja yambʌ wocol (Efesios 4:24). Cheʼ bʌ tsaʼ cʼotiyon tij cuarto ti acʼʌlel, yaʼ waʼal i pijtañon jiñi c chʼoc bʌ ti wajali, i tiʼ subeyon: «Sammy, laʼ lac jumucʼ ñusan lac bʌ». Ti orajach tsaʼ c sube: «¡Maʼañic!». Tsaʼ c sube chaʼan wolix c jacʼ muʼ bʌ i yʌl jiñi Biblia (1 Corintios 6:18). Toj sajtel i pusicʼal tsiʼ yʌlʌ: «¡Jaa!». Mach i wentajic chuqui miʼ yʌl jiñi Biblia chaʼan bʌ jiñi tsʼiʼlel i tsiʼ wersa subeyon chaʼan mic chaʼ tem ajñel lon. Pero joñon tsaʼ ochiyon tij cuarto i tsaʼ c ñupʼu jiñi c puerta. Wʌle tijicñayon mi cʌl chaʼan cʼʌlʌl cheʼ bʌ tsaʼ sujtiyon ti Testigo ti 1958, chʌn xucʼul añon yicʼot Jehová.

Cheʼ comic c subeñetla pejtelel jiñi wenlel am bʌ c taja cheʼ mic jacʼ muʼ bʌ i yʌl jiñi Biblia, yom mic tsʼijbun jumpʼejl libro. Wʌle an i sujm bʌ camigojob, an i sujmlel j cuxtʌlel yicʼot wen tijicñayon.

Muʼto c bej mulan jiñi béisbol, pero yambʌyix jiñi ñumen ñuc bʌ i cʼʌjñibal chaʼañon. Ti jiñi alas tsaʼ c wen taja taqʼuin, pero cujil chaʼan iliyi maʼañic miʼ jalʼan. Mucʼʌch bʌ caj i jalʼan tiʼ pejtelel ora jin cheʼ i yamigojon Dios yicʼot jiñi quermañujob. Jiñi Biblia miʼ yʌl: «Jiñi pañimil mi caj i jilel, i pejtelel chuqui an ti pañimil muʼ bʌ i mulan jiñi lac piʼʌlob mi caj i jilel jaʼel, pero jiñi muʼ bʌ i mel chuqui yom Dios cuxul miʼ yajñel tiʼ pejtelel ora» (1 Juan 2:17). Wʌle, jiñi muʼ bʌ c wen mulan jiñʌch mic melben i yeʼtel Jehová yicʼot cheʼ añon tiʼ tejclum. Jiñʌch ñumen ñuc bʌ i cʼʌjñibal tij cuxtʌlel.