¿I SUJMLEL chuqui? I sujmlel chaʼpʼej uxpʼejl ñumen ñuc tac bʌ cʼajtiya am bʌ i melbeyob i bʌ jiñi wiñicob xʼixicob (quixtañujob). Tajol am baʼ melbe a bʌ jaʼel ili cʼajtiya tac:

• ¿Mucʼʌch ba i qʼuelonla ti ñuc Dios?

• ¿Muʼ ba caj i jisʌntel ti jumpʼejl bʌ qʼuin jiñi guerra yicʼot jiñi ilaya wocol?

• ¿Chuqui mi lac chaʼlen cheʼ mi lac chʌmel?

• ¿An to ba i pijtaya jiñi tsaʼix bʌ chʌmiyob?

• ¿Bajcheʼ yom mi lac chaʼlen oración chaʼan miʼ ñʌchʼtʌbeñonla Dios?

• ¿Bajcheʼ miʼ mejlel lac taj lac tijicñʌyel?

¿Baqui miʼ mejlel a tajben i jacʼbal ili cʼajtiya tac? An cabʌl mil libro tac muʼ bʌ i poj ñop yʌqʼuen i jacʼbal ili cʼajtiya tac. Pero mucʼ jach i chaʼ contrajin i bʌ ti chuqui tac mi yʌl. Yambʌ libro tac poj weñʌch jumucʼ chuqui mi yʌl, pero maʼañic miʼ jalʼan chaʼan miʼ ñumel i yorajlel i miʼ chaʼ tojʼesʌntel o miʼ tsʼijbuntel yambʌ tsijiʼ bʌ.

Pero an jumpʼejl libro muʼ bʌ yʌqʼuen toj bʌ i jacʼbal jiñi cʼajtiya tac muʼ bʌ mejlel lac chʼujbin yicʼot i sujmlel bʌ. Jesucristo tiʼ sube Dios ti oración: «Isujmʌch jiñi a tʼan» (Juan 17:17). Ti ili ora cʌmbil jiñi Tʼan cheʼ bajcheʼ jiñi Biblia. Jiñi muʼ bʌ caj i pʌstʌl yaʼ ti entʌl, jiñʌch i jacʼbal jiñi cʼajtiya tac tsaʼ bʌ la cʌlʌ cheʼ ti ñaxan, i mi caj i pam tsictesʌntel jiñi toj bʌ i jacʼbal yicʼot muʼ bʌ mejlel lac ñop yaʼ bʌ an ti Biblia.

¿CHUCOCH MI LAC MEL ILI CʼAJTIYA? Come chumulonla ti jumpʼejl pañimil (mulawil) baqui an cabʌl jontolil yicʼot ticʼlʌntel. Cabʌl ñopbalʌl miʼ cʌntesan jiñi wiñicob xʼixicob chaʼan cheʼʌch bi yom Dios cheʼ mi lac ñusan jiñi ilaya wocol tac.

MUʼ BΛ I CΛNTESAÑONLA JIÑI BIBLIA. Dios maʼañic miʼ mel jontolil ti lac tojlel. Job 34:10 mi yʌl: «Tiʼ pejtelel ora maʼañic miʼ wis chaʼlen mulil Dios. Jiñi Pʼʌtʌl bʌ Mach bʌ Añic i Pʼisol i Pʼʌtʌlel mach yujilic jontolil». Jiñi Dios am bʌ i cʼuxbiya wʌn albil bʌ i chaʼan jumpʼejl tʼan tiʼ tojlel jiñi wiñicob xʼixicob, jin chaʼan Jesús tsiʼ cʌntesayonla chaʼan mi laj cʼajtin ti oración ili tʼan: «C Tat lojon añet bʌ ti panchan [...]. Laʼ tilic a yumʌntel. Laʼ mejlic chuqui a wom ti pañimil cheʼ bajcheʼ ti panchan» (Mateo 6:9, 10). Dios i wentajoñʌchla come tsiʼ tojo jiñi mulil chaʼan miʼ tsʼʌctiyel jiñi wʌn albil bʌ i chaʼan (Juan 3:16).

Qʼuele jaʼel Génesis 1:26-28; Santiago 1:13 yicʼot 1 Pedro 5:6, 7.

¿CHUCOCH MI LAC MEL ILI CʼAJTIYA? Come cabʌl woliyoʼ bʌ ti chʌmel tiʼ caj jiñi guerra, i ti jujuntiquilonla an cabʌl bajcheʼ mi lac taj jiñi wocol tac.

MUʼ BΛ I CΛNTESAÑONLA JIÑI BIBLIA. Dios tsaʼix yʌcʼʌ i tʼan chaʼan mi caj i chʼʌm tilel i ñʌchʼtʌlel ili Pañimil. Cheʼ bʌ miʼ tilel jiñi Yumʌntel am bʌ ti panchan, «jiñi eʼtijibʌl chaʼan guerra mi caj i sujtel ti eʼtijibʌl chaʼan cholel» i «maʼañix mi caj i chʌn ñopob guerra» jiñi quixtañujob (Isaías 2:4). Cheʼ jaʼel, Dios mi caj i jisan jiñi toʼol ticʼlʌntel yicʼot jiñi ilaya wocol. Jiñi Biblia mi yʌl: «Dios mi caj i sujcubeñob i yaʼlel i wut [jiñi quixtañujob]. Maʼañix majch miʼ caj ti chʌmel. Maʼañix ucʼtaya mi uqʼuel mi wocol tiʼ pejtelel ora. Come tsaʼix ñumi jiñi ñaxan tac bʌ», cheʼ bajcheʼ jiñi toʼol ticʼlʌntel yicʼot jiñi ilaya wocol (Apocalipsis [Revelación] 21:3, 4).

Qʼuele jaʼel Salmo 37:10, 11; 46:9 yicʼot Miqueas 4:1-4.

¿CHUCOCH MI LAC MEL ILI CʼAJTIYA? Come ñumen ti lamital ñopbalʌl tac miʼ cʌntesan jiñi wiñicob xʼixicob chaʼan an to chuqui cuxul miʼ cʌytʌl lac chaʼan cheʼ mi lac chʌmel. An muʼ bʌ yʌlob chaʼan jiñi chʌmeñobix bʌ an to bi chuqui miʼ mejlel i tumbeñob jiñi cuxulob to bʌ, o an muʼ bʌ yʌlob jaʼel chaʼan Dios mi yʌqʼuen i toj i mul ti cʼajc tiʼ pejtelel ora jiñi jontoloʼ bʌ.

MUʼ BΛ I CΛNTESAÑONLA JIÑI BIBLIA. Cheʼ bʌ mi lac chʌmel miʼ jilel tiʼ pejtelel. Eclesiastés 9:5 mi yʌl chaʼan «maʼañix chuqui yujilob jiñi chʌmeñobix bʌ». Jiñi tsaʼix bʌ chʌmiyob maʼañix miʼ chaʼleñob pensar, maʼañix chuqui mi yubiñob yicʼot mi añic to chuqui miʼ mejlel i melob. Jin chaʼan, maʼañic miʼ mejlel i ticʼlan i mi muqʼuic to mejlel i coltan jiñi cuxulob to bʌ (Salmo 146:3, 4).

Qʼuele jaʼel Génesis 3:19 yicʼot Eclesiastés 9:6, 10.

¿CHUCOCH MI LAC MEL ILI CʼAJTIYA? Come mi lac mulan chumtʌl i la com ajñel ti utsʼat la quicʼot jiñi muʼ bʌ laj cʼuxbiñob. Jin chaʼan, i tilelʌch cheʼ mi lac mulan lac chaʼ qʼuel jiñi lac piʼʌlob tsaʼix bʌ chʌmiyob.

MUʼ BΛ I CΛNTESAÑONLA JIÑI BIBLIA. Jiñi tsaʼix bʌ chʌmiyob mi caj i chaʼ aqʼuentelob i cuxtʌlel. Jesús tsiʼ wʌn alʌ chaʼan ‹mi caj i yubibeñob i tʼan jiñi añoʼ bʌ ti mucoñibʌl, i mi caj i chʼojyelob loqʼuel› (Juan 5:28, 29). Jiñi muʼ bʌ caj i chaʼ chʼojyelob wʌʼ ti Pañimil, mi caj i mejlelob ti chumtʌl yicʼot mi caj i qʼuelob cheʼ sujtemix ti paraíso ili Pañimil, cheʼ bajcheʼ tsiʼ ñaʼta Dios ti ñaxan (Isaías 65: 21-25). Mi caj i tajob i cuxtʌlel tiʼ pejtelel ora jiñi xucʼuloʼ bʌ ti Dios i maʼañix miʼ cajel cʼamʌjel tac ti jiñi wen utsʼatax bʌ qʼuin muʼ to bʌ caj i tilel. Jiñi Biblia mi yʌl: «Mi caj i yʌqʼuentelob jiñi pañimil jiñi tojoʼ bʌ. Mi caj i yajñelob tiʼ pejtelel ora» (Salmo 37:29).

Qʼuele jaʼel Job 14:14, 15; Lucas 7:11-17 yicʼot Hechos 24:15.

¿CHUCOCH MI LAC MEL ILI CʼAJTIYA? Come miʼ chaʼleñob oración tiʼ pejtelel jiñi añoʼ bʌ ti ñopbalʌl tac. Pero cabʌl miʼ ñaʼtañob chaʼan maʼañic miʼ jacʼbentelob jiñi oración muʼ bʌ i melob.

MUʼ BΛ I CΛNTESAÑONLA JIÑI BIBLIA. Jesús tsiʼ yʌlʌ chaʼan mach yomic cheʼ jin jach mi lac chʌn al lajal bʌ tʼan cheʼ bʌ mi lac mel jiñi oración. Tsiʼ yʌlʌ: «Cheʼ mi laʼ chaʼlen oración, mach mi laʼ chʌn taj lajal bʌ tʼan» (Mateo 6:7). Mi la com chaʼan Dios miʼ ñʌchʼtan lac oración yom mi lac pejcan cheʼ bajcheʼ miʼ mulan. Jin chaʼan, yom mi laj cʌn chuqui yom Dios chaʼan mi laj cʼajtiben cheʼ bʌ mi lac pejcan ti oración. Yaʼ ti 1 Juan 5:14 mi yʌl chaʼan «miʼ yubibeñonla chuqui jach mi laj cʼajtiben cheʼ bajcheʼ yom i pusicʼal».

Qʼuele jaʼel Salmo 65:2; Juan 14:6, 14 yicʼot 1 Juan 3:22.

¿CHUCOCH MI LAC MEL ILI CʼAJTIYA? Come cabʌl quixtañujob miʼ ñaʼtañob chaʼan miʼ yʌqʼueñob i tijicñʌyel jiñi taqʼuin, cheʼ wen cʌmbilob o cheʼ wen i tʼojol jax miʼ qʼuejlelob. Pero maʼañic miʼ tajob i tijicñʌyel cheʼ añob i chaʼan jiñi.

MUʼ BΛ I CΛNTESAÑONLA JIÑI BIBLIA. Jesús tsiʼ pʌsʌ chuqui miʼ mejlel yʌqʼueñonla lac tijicñʌyel cheʼ bʌ tsiʼ yʌlʌ: «Ñumen tijicñayob muʼ bʌ i yubibeñob i tʼan Dios muʼ bʌ i jacʼob» (Lucas 11:28). Mi caj lac taj lac tijicñʌyel tiʼ sujmlel mi mucʼʌch lac chaʼlen wersa lac sʌclan jiñi wen am bʌ i cʼʌjñibal lac chaʼan: Jiñi tiquin tiʼ chaʼan tiʼ cʌñol jiñi i sujmlel i chaʼan bʌ Dios yicʼot jiñi albil bʌ i chaʼan ti lac tojlel. Jiñi i sujmlel yaʼʌch an ti Biblia, i miʼ coltañonla chaʼan mi lac ñaʼtan jiñi añʌch bʌ i cʼʌjñibal yicʼot jiñi mach bʌ añic i cʼʌjñibal. Cheʼ bʌ mi laj cʼʌn jiñi Biblia chaʼan mi lac ñaʼtan jiñi com bʌ lac mel, ñumen an i sujmlel jiñi laj cuxtʌlel (Lucas 11:28).

Qʼuele jaʼel Proverbios 3:5, 6, 13-18 yicʼot 1 Timoteo 6:9, 10.

 Tsaʼix lac tsʼitaʼ qʼuele i jacʼbal jiñi 6 cʼajtiya muʼ bʌ yʌcʼ jiñi Biblia. ¿A wom to ba a ñumen cʌn majlel? A womʌch a ñumen cʌn majlel mi maʼ mulan a ‹wubiben i tʼan Dios yicʼot mi a wom a jacʼben› i tʼan. Tajol maʼ cʼajtiben a bʌ, ¿chucoch mi yʌcʼ ti ujtel Dios jontolil yicʼot ilaya wocol mi mucʼʌch i qʼuelonla ti ñuc? O tajol a wom a ñaʼtan bajcheʼ maʼ mejlel ti ajñel ti tijicña a wicʼot a familia. Jiñi Biblia mi yʌqʼuen i jacʼbal ili cʼajtiya yicʼot yan tac bʌ.

Pero an cabʌlob maʼañic bʌ miʼ mulan i sʌclʌbeñob i jacʼbal yaʼ ti Biblia. Come miʼ qʼuelob bajcheʼ jumpʼejl libro wen on bʌ i wocol bʌ ti chʼʌmbentel isujm. ¿Muʼ ba a mulan coltʌntel chaʼan maʼ tajben i jacʼbal yaʼ ti Biblia? Jiñi i testigojob Jehová an chaʼchajp muʼ bʌ i cʼʌñob ti coltaya.

Jiñi ñaxam bʌ jiñʌch jiñi libro ¿Chuqui miʼ cʌntesañonla tiʼ sujmlel jiñi Biblia?, ili melbil chaʼan miʼ coltʌntel jiñi quixtañujob, cheʼ bajcheʼ jiñi mucʼoʼ bʌ tiʼ eʼtel tiʼ pejtelel ora, chaʼan miʼ yʌqʼuentel i jacʼbal jiñi cʼajtiya tac am bʌ i cʼʌjñibal muʼ bʌ yʌl jiñi Biblia. I chaʼchajplel jiñʌch jumpʼejl estudio loqʼuem bʌ ti Biblia mach bʌ tojbilic muʼ bʌ mejlel a wʌqʼuentel ti a wotot. Juntiquil i testigo Jehová chajpʌbil bʌ chaʼan mi yʌcʼ jiñi estudio miʼ mejlel ti majlel yaʼ ti a wotot o yaʼʌch baqui a wom chaʼan miʼ tsʼitaʼ pejcan jiñi Biblia yicʼotet ti jujumpʼejl semana. Millón quixtañujob an i tajayob i wenlel ti jiñi estudio, i cabʌl jiñi tsaʼ bʌ yubiyob i tijicñʌyel cheʼ bʌ tsiʼ cʌñʌyob jiñi i sujmlel.

Miʼ mejlel a cʌn jaʼel chaʼan wen ñucʌch i cʼʌjñibal jiñi i sujmlel am bʌ ti Biblia. Come miʼ coltañonla chaʼan mi lac taj lac tijicñʌyel, lac pijtaya, chaʼan mi laj cʌy jiñi magia yicʼot yambʌ tac muʼ bʌ yʌcʼonla ti bʌqʼuen. Jesús tsiʼ yʌlʌ: «Mi caj laʼ cʌn i sujmlel c tʼan. I sujmlel c tʼan mi caj i yʌqʼuetla ti colel» (Juan 8:32).