CɅNTESɅNTEL 25
¿Chuqui yom Dios chaʼañonla?
Jiñi Biblia miʼ yʌl chaʼan mach jalic cuxulonla yicʼot chaʼan cabʌl mi lac ñusan wocol (Job 14:1). Pero ¿cheʼ ba yom Dios chaʼan mi lac chumtʌl bajcheʼ iliyi? Mi mach cheʼiqui, ¿chuqui yom chaʼañonla? ¿Muʼ ba caj i tsʼʌctiyel ti jumpʼejl bʌ qʼuin? Qʼuele jiñi utsʼatax bʌ i jacʼbal miʼ yʌcʼ jiñi Biblia.
1. ¿Bajcheʼ yilal yom Dios chaʼan mi lac chumtʌl?
Jehová yom chaʼan wen mi lac chumtʌl. Cheʼ tsiʼ mele (pʌtʌ) Adán yicʼot Eva, tsiʼ yʌcʼʌyob ti chumtʌl ti jumpʼejl paraíso wen utsʼatax bʌ: Yaʼ ti pʌcʼʌbʌl Edén. Yaʼi «Dios tsiʼ yʌqʼueyob i yutslel i tʼan [...] tsiʼ subeyob: ‹Laʼ pʼojliquetla. Butʼula jini pañimil. Cʼʌñʌla›» (Génesis 1:28). Jehová yom chaʼan miʼ yʌcʼob i yalobil, chaʼan miʼ sujtesañob tiʼ pejtelel Pañimil ti jumpʼejl paraíso yicʼot chaʼan miʼ cʌntañob jiñi añimal tac. Yom bʌ tsiʼ yʌlʌ jiñʌch cheʼ cʼocʼ mi la cajñel ti lac pejtelel yicʼot chaʼan mi lac chumtʌl tiʼ pejtelel ora.
Anquese mach cheʼic chumulonla ili ora a cheʼ bajcheʼ tsiʼ yʌlʌ Dios, pero mucʼʌch i caj ti tsʼʌctiyel (Isaías 46:10, 11). Bej yom chaʼan jiñi muʼ bʌ i jacʼbeñob i tʼan miʼ chumtʌlob tiʼ pejtelel ora ti jumpʼejl Paraíso (pejcan Apocalipsis 21:3, 4).
2. ¿Bajcheʼ miʼ mejlel lac chumtʌl ti tijicña ti ili ora?
Jehová tsiʼ meleyonla chaʼan mi lac mulan laj cʌn yicʼot chaʼan mi lac chʼujutesan (pejcan Mateo 5:3-6). Dios yom chaʼan mi lac sujtel tiʼ yamigo, chaʼan mi lac chaʼlen xʌmbal «tiʼ bijlel», chaʼan mi laj cʼuxbin yicʼot chaʼan mi lac melben i yeʼtel (troñel) tiʼ pejtelel lac pusicʼal (Deuteronomio 10:12; Santiago 2:23). Mi mucʼʌch lac mel pejtelel iliyi, tijicña mi caj la cubin lac bʌ anquese an lac wocol tac. Cheʼ mi lac chʼujutesan Jehová miʼ yʌqʼuen i sujmlel laj cuxtʌlel come woli (choncol) laj cʼʌn laj cuxtʌlel cheʼ bajcheʼ yom.
LAʼ LAC ÑUMEN ÑAʼTAN
Laʼ laj qʼuel bajcheʼ cʼamel tsiʼ pʌsʌ i cʼuxbiya Jehová cheʼ bʌ tsiʼ mele ili Pañimil chaʼañonla i chuqui miʼ pʌsbeñonla jiñi Biblia chaʼan baqui bʌ i sujmlel laj cuxtʌlel.
3. Jehová yom chaʼan wen mi lac chumtʌl
Qʼuelela jiñi VIDEO i tem alʌla iliyi:
-
¿Chucoch tsiʼ mele Dios ili utsʼatax bʌ Pañimil?
Jiñi Biblia miʼ yʌl chaʼan Dios «tsiʼ yotsa tiʼ pusicʼal jiñi quixtañujob chaʼan miʼ mulañob chumtʌl tiʼ pejtelel ora» (Eclesiastés 3:11, TNM). Tem alʌla iliyi:
-
Cheʼ bajcheʼ miʼ yʌl ili texto, ¿chuqui yom Jehová chaʼañonla?
4. Maʼañic qʼuextʌyem chuqui yom bʌ Jehová chaʼañonla
Pejcanla Salmo 37:11, 29 yicʼot Isaías 55:11, i tem alʌla iliyi:
-
¿Bajcheʼ la cujil chaʼan maʼañic qʼuextʌyem chuqui yom Jehová chaʼañonla?
Jumpʼejl otot jejmeñix bʌ miʼ mejlel ti chaʼ tojʼesʌntel. Lajal miʼ yujtel yicʼot ili Pañimil: Jiñi wiñicob tsaʼix i wen jisayob, pero Dios mi caj i chaʼ tojʼesan chaʼan miʼ chumtañob jiñi muʼ bʌ i cʼuxbiñob.
5. Cheʼ mi lac chʼujutesan Jehová miʼ yʌqʼuen i sujmlel laj cuxtʌlel
Cheʼ mi laj cʌn chucoch tsiʼ meleyonla Jehová miʼ yʌqʼueñonla lac tijicñʌyel. Qʼuelela jiñi VIDEO i tem alʌla iliyi:
-
¿Bajcheʼ tsiʼ colta Terumi cheʼ tsiʼ cʌñʌ baqui bʌ i sujmlel jiñi i cuxtʌlel?
Pejcanla Eclesiastés 12:13 i tem alʌla iliyi:
-
Cheʼ mi lac ñaʼtan pejtelel chuqui an i mele Jehová chaʼañonla, ¿bajcheʼ miʼ mejlel lac pʌs chaʼan mi la cʌqʼuen wocolix i yʌlʌ?
AN MUʼ BɅ I CʼAJTIBEÑOÑOBLA: «¿Chucoch wʌʼañonla ti pañimil? ¿Baqui bʌ i sujmlel jiñi laj cuxtʌlel?».
-
¿Bajcheʼ mi caj a jacʼ?
TSAʼ BɅ LAJ CɅÑɅ
Jehová yom chaʼan tijicña mi lac chumtʌl tiʼ pejtelel ora ila ti Pañimil cheʼ sujtemix ti jumpʼejl paraíso. Ili ora miʼ mejlel lac tajben i sujmlel laj cuxtʌlel jaʼel cheʼ mi lac chʼujutesan Jehová tiʼ pejtelel lac pusicʼal.
¿Chuqui tsaʼ cʌñʌ?
-
¿Chuqui yom tsiʼ yʌlʌ Jehová cheʼ bʌ tsiʼ mele Adán yicʼot Eva?
-
¿Bajcheʼ la cujil chaʼan maʼañic qʼuextʌyem chuqui yom bʌ Jehová chaʼañonla?
-
¿Chuqui mi caj i coltañet chaʼan tijicña maʼ chumtʌl?
CɅÑɅ YAN TAC BɅ
Qʼuele chucoch miʼ mejlel la cʌl chaʼan ti wajali añʌch jiñi pʌcʼʌbʌl Edén.
«Jiñi pʌcʼʌbʌl Edén, ¿jumpʼejl jach ba cuento?» (Lac Tsictesʌbentel, 1 i chaʼan enero, 2011)
Qʼuele chucoch mi lon c ñop chaʼan jiñi Pañimil maʼañic mi caj i jilel.
Qʼuele baqui bʌ jiñi i sujmlel laj cuxtʌlel miʼ yʌl jiñi Biblia.
«¿Baqui bʌ jiñi i sujmlel laj cuxtʌlel?» (Tema am bʌ ti jw.org)
Qʼuele bajcheʼ juntiquil wiñic tsaʼ cʼoti i qʼuel chaʼan anto chuqui yom tiʼ cuxtʌlel cheʼ bʌ tsiʼ lon ñaʼta chaʼan luʼ añix i chaʼan.
a Ti jiñi yambʌ cʌntesʌntel mi caj laj qʼuel chuqui tsaʼ ujti.
Miʼ mejlel a qʼuel jaʼel iliyi
CʼAJTIYA TAC MUʼ BɅ I ÑUMEN MEJLEL
¿Bajcheʼ yilal jiñi estudio loqʼuem bʌ ti Biblia muʼ bʌ i yʌcʼob jiñi i testigojob Jehová?
Ti jiñi estudio muʼ bʌ i yʌcʼob jiñi i testigojob Jehová maʼ mejlel a cʼʌn baqui jach bʌ Biblia. Miʼ mejlel a pʌy pejtelel a familia o jiñi a wamigojob.
