Jiñi i sujm bʌ xñoptʼañonla mi lac chaʼlen wersa chaʼan maʼañic chuqui yicʼot maʼañic majqui miʼ mʌctañonla chaʼan mi lac chʼujutesan Jehová. Cujil lojon chaʼan jiñʌch a wom bʌ jaʼel, i Jehová miʼ wen qʼuel ti ñuc jiñi a xucʼtʌlel (pejcan 1 Crónicas 28:9). ¿Chuqui tac miʼ mejlel i yʌcʼ ti wocol jiñi a xucʼtʌlel ti Dios? ¿I chuqui miʼ mejlel a mel?

1. ¿Chuqui tac miʼ mejlel i melob jiñi yambʌlob chaʼan miʼ yʌcʼob ti wocol lac xucʼtʌlel ti Jehová?

An lac piʼʌlob muʼ bʌ caj i chaʼleñob wersa chaʼan mi laj cʌy lac melben i yeʼtel (troñel) Jehová. ¿Majquiyob? Jumpʼejl ejemplo, jiñʌch jiñi am bʌ i cʌyʌyob i sujmlel i wʌle woli (choncol) i yʌlob lot tac tiʼ contra i yorganización Dios chaʼan mi laj cʌy lac ñop Jehová. Iliyob cʌmbilob bajcheʼ apóstatajob. Cheʼ jaʼel, an añoʼ bʌ i yeʼtel ti ñopbalʌl tac muʼ bʌ i pucob lot tac ti laj contra chaʼan jiñi maʼañic bʌ miʼ wen cʌntañob i bʌ miʼ cʌyob jiñi i sujmlel. Añʌch i wocolel cheʼ mi lac ñop laj coltan i sujmlel tiʼ tojlel jiñi muʼ bʌ i contrajibeñob i tejclum Dios, mach yomic mi lac pejcʌbeñob i libro o chuqui tac miʼ tsʼijbuñob letsel ti internet, i mach yomic mi la cochel ti jiñi página añoʼ bʌ i chaʼan ti internet mi yomic mi laj qʼuelbeñob i video tac. Jesús tsiʼ tajayob ti tʼan jiñi muʼ bʌ i ñopob i cʼuñʼesan lac xucʼtʌlel ti Jehová cheʼ bʌ tsiʼ yʌlʌ: «Laʼto ajñicob. Xpotsʼoʼ bʌ xpʌs bij. Mi juntiquil xpotsʼ miʼ pʌsben bij yambʌ xpotsʼ tiʼ chaʼticlelob mi caj i yajlelob ti tocol bʌ lum» (Mateo 15:14).

2. ¿Bajcheʼ mi lac pʌs ti chuqui mi lac yajcan lac mel mi xucʼulonla ti Jehová o maʼañic?

Come mi laj cʼuxbin Jehová, mach la comic la cotsan lac bʌ tiʼ chaʼan bʌ jiñi ñopbalʌl tac mach bʌ i sujmic. Mi jiñic la queʼtel, mi jiñic jiñi organización baqui ochemonla, maʼañic chuqui yom mi lac mel ochem bʌ tiʼ chaʼan bʌ jiñi ñopbalʌl tac mach bʌ i sujmic. Jehová miʼ suben jiñi i tejclum: «Loqʼuenla yaʼi», yom i yʌl, yaʼ ti Ñuc bʌ Babilonia (Apocalipsis 18:2, 4).

 LAʼ LAC ÑUMEN ÑAʼTAN

3. Cʌntan a bʌ tiʼ tojlel jiñi lot bʌ xcʌntesajob

¿Chuqui yom mi lac mel mi tsaʼ lac taja la cubin mach bʌ weñic tiʼ tojlel jiñi i yorganización Jehová? Pejcanla Proverbios 14:15 i tem alʌla iliyi:

• ¿Chucoch mach yomic mi lac ñop pejtelel muʼ bʌ la cubin?

Pejcanla 2 Juan 9-11, i tem alʌla iliyi:

• ¿Bajcheʼ yilal yomonla tiʼ tojlel jiñi apóstatajob?

• Anquese maʼañic mi lac ñoj pejcañob jiñi apóstatajob, ¿pero baqui tac miʼ mejlel lac ñʌchʼtan jiñi i cʌntesajob?

• ¿Bajcheʼ yubil mi caj i yubin i bʌ Jehová maʼ wʌl mi tsaʼ lac ñʌchʼta muʼ bʌ i yʌjlel tiʼ tojlel yicʼot tiʼ tojlel i yorganización?

4. Yom xucʼulet ti Dios mi juntiquil hermano miʼ chaʼlen mulil

Mi tsaʼ la cubi chaʼan juntiquil hermano tsiʼ mele jumpʼejl tsʌts bʌ mulil, ¿chuqui an ti lac wenta mi lac mel? Qʼuele jumpʼejl principio muʼ bʌ lac taj yaʼ ti Mandar tsaʼ bʌ i yʌqʼue Dios jiñi israelitajob ti wajali. Pejcanla Levítico 5:1.

Cheʼ bajcheʼ miʼ yʌl ili versículo, mi tsaʼ la cubi chaʼan an majqui tsiʼ mele jumpʼejl tsʌts bʌ mulil, yom mi lac suben jiñi ancianojob. Pero chaʼan mi lac mel jiñi, yom mi lac ñaxan suben jiñi tsaʼ bʌ i chaʼle mulil chaʼan yom miʼ pejcan jiñi ancianojob i miʼ sub i mul. Mi maʼañic miʼ mel, chaʼan lac xucʼtʌlel ti Jehová, muqʼuix i mejlel lac suben jiñi ancianojob. ¿Chucoch cheʼ mi lac mel bajcheʼ iliyi woli lac pʌsben laj cʼuxbiya yicʼot lac xucʼtʌlel...

• Jehová?

• jiñi tsaʼ bʌ i chaʼle mulil?

• jiñi congregación?

 5. Ñajtʼesan a bʌ ti jiñi Ñuc bʌ Babilonia

 TSAʼ BɅ LAJ CɅÑɅ

Mi la com chaʼan xucʼulonla ti Jehová, mach yomic mi lac ñochtañob jiñi muʼ bʌ i ñop i lotiñoñobla.

¿Chuqui tsaʼ cʌñʌ?

• ¿Chucoch mach yomic mi lac ñʌchʼtan muʼ bʌ i yʌlob jiñi apóstatajob?

• Mi tsaʼ cʼoti laj qʼuel chaʼan juntiquil hermano tsiʼ chaʼle tsʌts bʌ mulil, ¿chuqui yom mi lac mel?

• ¿Chuqui yom mi lac mel chaʼan mi lac junyajl loqʼuel ti jiñi ñopbalʌl tac mach bʌ isujmic?