Tsaʼ quila pañimil ti jumpʼejl alʌ tejclum am bʌ yaʼ ti Galicia, tiʼ norestejlel España. Ochojon lon i joñon i chʌnticlel. Jumpʼejlʌch familia wen tijicñayonbʌlon. Ti jiñi bʌ ora, ñʌmʌl chaʼan juntiquil i yalobil jumpʼejl familia yom miʼ majlel ti convento. Ti lon c familia uxtiquil tsaʼ majliyon lojon.

Cheʼ bʌ an jaxto 13 c jabilel, tsaʼ majliyon ti jumpʼejl convento yaʼ ti Madrid i yaʼix an juntiquil c chich. Yaʼi maʼan tijicñʌyel. Maʼañic a wamigo, cojach maʼ xijqʼuel a mel oración i cheʼ jaʼel miʼ xiqʼuetob a jacʼ muʼ bʌ i yʌlob. Cheʼ ti sʌcʼan mi lon c tempʌntel yaʼ ti capilla chaʼan mi lon c ñaʼtan chaʼan bʌ Dios, anquese joñon orajach miʼ waʼ yʌjñel c pensar. Cheʼ jiñi, mi lon c chaʼlen cʼay i mi lon c majlel ti misa. Maʼañic mic yoque chʼʌmben i sujm muʼ bʌ i yʌjlel come miʼ luʼ mejlel ti latín, i wen ñajt mi cubin c bʌ ti Dios. Maʼan mi cʌjqʼuel lon c yoque pejcan lon c bʌ i cheʼ bʌ mic ñusan c chich, maʼañic mi lon c chaʼlen tʼan cojach mi lon c suben c bʌ: «Ave María purísima». Cojach media hora mi lon cʌjqʼuel lon c pejcan lon c bʌ cheʼ bʌ mi lon cujtel ti uchʼel. ¡Ñoj yʌñʌlʌch jiñi tijicñʌyel am bʌ ti cotot! C bajñel jach mi cubin c bʌ, tiʼ pejtelel ora mic chaʼlen uqʼuel.

Anquese maʼañic baʼ tsiʼ cubi c bʌ chaʼan lʌcʼʌl lon ti Dios, tsaʼʌch ochiyon bajcheʼ monja cheʼ an jaxto 17 c jabilel. Tsaʼ c mele jiñi come jiñʌch yom bʌ mic mel, pero tiʼ sujm tsaʼ caji j cʼajtiben c bʌ mi comʌch yoque sujtel bajcheʼ monja. ¡Jiñi yambʌ monjajob miʼ yʌlob chaʼan miʼ majlelob ti infierno jiñi maʼan bʌ miʼ ñopob chaʼan yomob sujtel bajcheʼ monja! Pero bej anto j cʼajtiya chaʼan mi ñoj comʌch sujtel bajcheʼ monja. Cujil chaʼan Jesucristo mach i bajñel jach tsaʼ ajñi, tsiʼ chaʼle cʌntesa yicʼot tsiʼ colta yambʌlob (Mateo 4:23-25). Cheʼ bʌ 20 c jabilel tsaʼ j qʼuele chaʼan maʼañic muʼ bʌ i yʌqʼueñon c ñaʼtan chaʼan com sujtel bajcheʼ monja. Tsaʼ bʌ yʌcʼʌ ti toj sajtel c pusicʼal jiñʌch cheʼ jiñi am bʌ tiʼ wenta jiñi monjajob, tiʼ subeyon chaʼan mi machʌch baʼ añic mic wen ñop chaʼan comʌch sujtel bajcheʼ monja, ñumen wen cheʼ muqʼuic loqʼuel majlel, jin chaʼan tsaʼ loqʼuiyon yaʼ ti convento. Mi cʌl tsiʼ bʌcʼña chaʼan mij qʼuextʌben i pensar yambʌlob.

Cheʼ bʌ ti chaʼ cʼotiyon ti cotot, maʼañic tsaʼ michʼayob jiñi c tatob, pero come maʼañic eʼtel yaʼ ti lon c tejclum, tsaʼ majliyon ti Alemania occidental, i yaʼix an jiñi chʼiton bʌ quijtsʼin. I jiñi quijtsʼin ochem ti jumpʼejl grupo baqui an jiñi chʼoyoloʼ bʌ ti España, yaʼ bʌ ti cʼotiyob ti chumtʌl yaʼi. Wen jach tsaʼ cubi c bʌ yicʼotob i wen tsaʼ j qʼuele cheʼ bʌ miʼ coltañob jiñi xtroñelob yicʼot chaʼan junlajal miʼ qʼuejlel jiñi xʼixicob. Ti wiʼil, tsaʼ ochiyon jaʼel ti jiñi grupo i tsaʼ ñujpuñi quicʼot juntiquil ochem bʌ yaʼ ti grupo. Mic puc jun tac i mi cotsan c bʌ ti jiñi marcha tac. An j cʼʌjñibal tsaʼ cubi c bʌ.

Ti wiʼil, mach tijicñayix tsaʼ caji cubin c bʌ. Tsaʼ j qʼuele chaʼan jiñi lac piʼʌlob maʼan miʼ melob bajcheʼ miʼ poj alob. Maʼan tsaʼ c ñumen mulaj cheʼ ti jabil 1971, junmojt xcolelob tsiʼ puluyob jiñi consulado i chaʼan España am bʌ yaʼ ti Fráncfort come maʼañic miʼ mulañob chuqui mach bʌ weñic am bʌ i mele. Jin chaʼan maʼan tsaʼ c mulaj cheʼ bajcheʼ tsiʼ meleyob.

Cheʼ bʌ tiʼ yila pañimil jiñi ñaxam bʌ lon calobil, tsaʼ c sube jiñi c ñoxiʼal chaʼan maʼix mi caj c majlel ti jiñi tempa bʌ tac muʼ bʌ i melob. Yoque c bajñel tsaʼ cubi c bʌ, mi juntiquilic jiñi lon camigojob tsiʼ julaʼtayon lojon cheʼ bʌ tsiʼ yila pañimil jiñi lon calobil. Tsaʼ j cʼajtibe c bʌ baqui bʌ i sujmlel jiñi laj cuxtʌlel. ¿Anto ba i sujmlel cheʼ mi lac ñop lac tojʼesan ili pañimil?

Ti 1976, jumpʼejl xñujpuñel testigojoʼ bʌ chʼoyoloʼ bʌ ti España tsaʼ cʼotiyob ti cotot i tsiʼ cʌybeyoñob jun tac loqʼuem bʌ ti Biblia. Cheʼ bʌ ti chaʼ sujtiyob ti cotot, tsaʼ j cʼajtibeyob chucoch mi lac wen ilan wocol yicʼot mi lac toʼol ticʼlʌntel. Yicʼot jiñi Biblia tsiʼ jacʼʌyob jiñi j cʼajtiya tac. I ti ora tsaʼ c jacʼʌ jumpʼejl estudio.

Ti ñaxan, chaʼan jach com j cʌn woli bʌ c pʌsbentel, pero tsaʼ qʼuextʌyi c ñaʼtʌbal cheʼ bʌ jiñi c ñoxiʼal yicʼot joñon tsaʼ c teche lon majlel ti jiñi tempa bʌ muʼ bʌ i mel jiñi Testigojob. Ti jimbʌ ora chaʼtiquilix lon calobil, jiñi Testigojob miʼ tilel i pʌyoñob lon chaʼan mi lon c majlel ti tempa bʌ. I miʼ coltañoñob lon chaʼan mi lon j cʌntan jiñi lon calobilob ti jiñi tempa bʌ. Tsaʼ wen ñʌmʼa quicʼotob

Anquese añʌchix chuqui cujil bej añʌxto jiñi j cʼajtiya tac. Cheʼ bʌ tsajñi c julaʼtan c familia yaʼ ti España, an juntiquil c tío sacerdote bʌ tsaʼ bʌ i wersa subeyon chaʼan mij cʌy jiñi estudio, pero jiñi yambʌ Testigojob yaʼ bʌ chumulob yaʼi tsiʼ coltayoñob jaʼel. Cheʼ bajcheʼ tsiʼ meleyob jiñi Testigojob añoʼ bʌ ti Alemania, tiʼ cʼʌñʌyob jiñi Biblia jaʼel chaʼan miʼ jacʼob j cʼajtiya. Cheʼ bʌ ti chaʼ sujtiyon majlel ti Alemania, tic chaʼ chʼʌmʌ jiñi c estudio. Anquese jiñi c ñoxiʼal maʼañix tsaʼ bej caji, joñon tsaʼʌch. Ti 1978 tic chʼʌmʌ jaʼ i tsaʼ sujtiyon bajcheʼ testigo.

Cheʼ bʌ tsaʼ cʼoti c chʼʌmben i sujm muʼ bʌ i yʌl jiñi Biblia, tsaʼ i yʌqʼue i sujmlel j cuxtʌlel. Jumpʼejl ejemplo, yaʼ ti 1 Pedro 3:1-4 miʼ yʌl chaʼan jiñi ijñamʌl yom miʼ chuc i bʌ tiʼ tojlel i ñoxiʼal, yom miʼ qʼuel ti ñuc yom miʼ pʌs i ñʌchʼtʌlel, come «jiñʌch ñumen ñuc bʌ i cʼʌjñibal miʼ qʼuel Dios». Ili principio yicʼot yan tac bʌ an i coltayon chaʼan mic tsʼʌctesan ti wen jiñi queʼtel bajcheʼ ijñamʌl yicʼot bajcheʼ ñaʼʌl.

Añix ñumen 35 jab tsaʼ ochiyon bajcheʼ testigo. Tijicñayon mic melben i yeʼtel Dios, i cheʼ jaʼel chaʼan ochemon ti jiñi i familia Jehová am bʌ tiʼ pejtelel pañimil. An joʼtiquil calobil pero chʌntiquil testigojob jaʼel.