Cheʼ bʌ tsaʼ quila pañimil, jiñi c familia chumul lʌcʼʌl ti Leipzig, yaʼ ti República Democrática Alemana ti wajali, mach wen ñajtic an ti Polonia yicʼot ti República Checa. Cheʼ bʌ 6 c jabilel tsaʼ majliyon lon ti Brasil tiʼ caj i yeʼtel c papá, i ti wiʼil tsaʼ majliyon lon ti Ecuador.

Cheʼ bʌ 14 c jabilel, jiñi c papá c mamá tsiʼ chocoyoñob sujtel ti Alemania i tsiʼ yotsayoñob ti clase ti jumpʼejl internado. Come wen ñajtix añob tic tojlel, maʼañix majqui i wentajon. Joñon mic ñaʼtan chuqui com c mel i mach c wentajic mi jiñi yambʌlob maʼañic miʼ mulañob.

Cheʼ bʌ 17 c jabilel, jiñi c papá c mamá tsaʼ chaʼ sujtiyob ti Alemania, i tsaʼ jumucʼ chumleyon quicʼotob. Pero come tsaʼix ñʌmʼayon ti bajñel chumtʌl, wocol tsaʼ cubi chaʼan mic jacʼbeñob i tʼan. Jin chaʼan, cheʼ bʌ 18 c jabilel tsaʼ loqʼuiyon majlel ti cotot.

Tsaʼ caji j cʼajtiben c bʌ chucoch cuxulon. Jin chaʼan tsaʼ ochiyon ti grupo tac yicʼot organización tac chaʼan mic sʌclan j coltʌntel, pero maʼañic tsaʼ c taja. Jin chaʼan tsaʼ c ñaʼta chaʼan mij cʌn ñumel ili utsʼatax bʌ Pañimil cheʼ bʌ maxto i jisayob jiñi lac piʼʌlob.

Tsaʼ c mʌñʌ jumpʼejl c motocicleta i tsaʼ majliyon ti África. Pero come tsaʼ caji ti asiyel jiñi c moto tsaʼ chaʼ sujtiyon majlel ti Europa. Cheʼ bʌ tsaʼix c tojʼesa, tsaʼ majliyon ti jumpʼejl playa ti Portugal. I yaʼi tsaʼ c ñaʼta chaʼan ñumen wen cheʼ mij cʌy jiñi c moto i mic chʼʌm jumpʼejl barco chaʼan mic chaʼlen xʌmbal ñumel tiʼ pejtelel pañimil.

Tsaʼ c taja yambʌ xcolelob muʼ bʌ caj i cʼaxelob yaʼ ti océano Atlántico. I juntiquil jiñʌch Laurie, tsaʼ bʌ c pʌyʌ ti quijñam. Tsaʼ majliyon lojon cʼʌlʌl ti islas del Caribe i tsaʼ jumucʼ cʌyleyon lojon ti Puerto Rico, ti wiʼil tsaʼ chaʼ sujtiyon lon ti Europa. Laurie yicʼot joñon tsaʼ caji lon c sʌclan jumpʼejl alʌ barco chaʼan mic sujtesan lojon ti cotot. Uxpʼejl uw tsaʼ lon c sʌcla, pero tsaʼ lon c jumucʼ cʌyʌ come tsaʼ pʌjyiyon bajcheʼ soldado ti Alemania.

Cheʼ bʌ anto tsʼitaʼ yom chaʼan mic pʌjyel ochel ti soldado, tsaʼ lon c mʌñʌ jumpʼejl alʌ barco i tsaʼ caji lon c tojʼesan chaʼan mic sujtesan lojon ti cotot come yaʼʌch mi caj lon c chumtʌl cheʼ bʌ mi caj lon j cʌn ñumel jiñi pañimil. Quince uw tsaʼ ajñiyon bajcheʼ soldado ti jiñi Marina, i ti jimbʌ ora tsaʼ ñujpuñiyon lojon. Cheʼ bʌ tsaʼix loqʼuiyon ti jiñi Marina, pero cheʼ bʌ anto tsʼitaʼ yom chaʼan mi cujtesan lojon jiñi barco, jiñi i testigojob Jehová tsiʼ pejcayon lojon i tsaʼ cajiyon lojon ti estudio.

Ti ñaxan, tsaʼ c ñaʼta chaʼan maʼañic chuqui yom mic wen tojʼesan tij cuxtʌlel, come ñujpuñemon quicʼot quijñam yicʼot tsaʼix j cʌyʌ jiñi cʼujts (Efesios 5:5). Cheʼ jaʼel, tsaʼ c ñaʼta chaʼan weñʌch woli j cʼʌn j cuxtʌlel cheʼ mij cʌn ñumel jiñi utsʼatax bʌ i melbal tac Dios.

Pero tiʼ sujm yomto mic tojʼesan bajcheʼ yilalon. Mic wen qʼuel c bʌ ti ñuc i mach c wentajic yambʌlob, mic wen chañʼesan c bʌ tiʼ tojlel yambʌlob yicʼot chaʼan pejtelel chuqui an c mele. Joñon jach jiñi ñumen ñuc bʌ j cʼʌjñibal mi cubin.

Ti jumpʼejl bʌ qʼuin tsaʼ c pejca jiñi i Cʌntesa Jesús yaʼ ti Wits (Mateo, capítulo 5 cʼʌlʌl ti 7). Ti ñaxan toj sajtel c pusicʼal cheʼ tsaʼ j qʼuele chaʼan Jesús tsiʼ yʌlʌ chaʼan jiñi tijicñayoʼ bʌ jiñobʌch jiñi añoʼ bʌ i wiʼñal yicʼot i tiquin tiʼ (Mateo 5:6). Pero tsaʼ caji j cʼajtiben c bʌ bajcheʼqui tijicñayob jiñi añoʼ bʌ i wiʼñal yicʼot i tiquin tiʼ. Cheʼ bʌ tsaʼ caji j cʌn muʼ bʌ i yʌl jiñi Biblia tsaʼ cʼoti j qʼuel chaʼan ti lac pejtelel i cʼʌjñibalʌch lac chaʼan Dios, i chaʼan miʼ mejlel laj cʌn, yomʌch mi lac ñaxan chʼʌmben i sujm chaʼan i cʼʌjñibal lac chaʼan. Cheʼʌch bajcheʼ tsiʼ yʌlʌ Jesús: «Tijicñayob jiñi muʼ bʌ i ñaʼtañob chaʼan i cʼʌjñibalʌch i chaʼañob Dios» (Mateo 5:3).

Laurie yicʼot joñon tsaʼ c teche lon estudio ti Alemania, pero tsaʼ majliyon lojon ti Francia, i cheʼ jiñi ti Italia. Baqui jach añob jiñi Testigojob. Tsaʼ bʌ c wen mulaj jiñʌch cheʼ miʼ wen cʼuxbiñob i bʌ yicʼot wen temelob. Jumpʼejlobʌch familia tiʼ pejtelel pañimil (Juan 13:34, 35). Ti wiʼil tsaʼ lon c chʼʌmʌ jaʼ.

Anquese Testigojoñix, yomʌch mic bej tojʼesan jiñi c melbal. Laurie yicʼot joñon tsaʼ lon cʌlʌ chaʼan mi lon c tech xʌmbal ti barco ti África i mi lon j cʼaxtan jiñi océano Atlántico, jinto mi lon j cʼotel ti Estados Unidos. Cheʼ bʌ añon lojon tiʼ yojlil jiñi jaʼ, c bajñel jach quicʼot quijñam yicʼot ti jumpʼejl alʌ barco, tsaʼ cʼoti j qʼuel chaʼan cheʼ jach ya alʌ wistʌlonla, pero jiñi tsaʼ bʌ i meleyonla wen ñucʌch. Come yaʼ tiʼ yojlil jiñi jaʼ maʼañic chuqui miʼ mejlel lac wen mel, tsaʼ c wen tajbe i yorajlel chaʼan mic pejcan jiñi Biblia. Tsaʼ bʌ c ñumen ñaʼta jiñʌch bajcheʼ tsaʼ chumle Jesús. Anquese juntiquilʌch toj bʌ wiñic yicʼot an wen tac bʌ i melbal, maʼañic baʼ ora tsiʼ qʼuele i bʌ ti ñuc. Ñumen ñuc bʌ tsiʼ qʼuele jiñʌch cheʼ miʼ mel chuqui yom i Tat.

Cheʼ bʌ tsaʼ c wen ñaʼta tiʼ tojlel Jesús, tsaʼ cʼoti j qʼuel chaʼan mach i colobal jach yom bʌ mi cʌqʼuen Jehová, jiñʌch yom bʌ mic ñumen acʼ ti ñuc tij cuxtʌlel (Mateo 6:33). Cheʼ bʌ tsaʼ cʼotiyon lon ti Estados Unidos, maʼañic baʼ ora tsaʼ chʌn letsiyon lojon ti barco chaʼan mij cʌn lon ñumel jiñi pañimil, tsaʼ caji c ñumen melben lojon i yeʼtel Jehová.

Ti ñaxan, cheʼ bʌ joñon jaxto mic bajñel ñaʼtan c bʌ, mach wen cujilic mi weñʌch mi caj i loqʼuel jiñi muʼ bʌ c ñaʼtan c mel. Pero wʌle tsaʼix c taja jiñi ñumen wem bʌ coltʌntel muʼ bʌ i tojʼesañon tij cuxtʌlel (Isaías 48:17, 18). Cheʼ jaʼel, tsaʼix c taja muʼ bʌ i yʌqʼuen i sujmlel j cuxtʌlel: Jiñʌch cheʼ mic chʼujutesan Dios i mij coltan yambʌ lac piʼʌlob chaʼan miʼ cʌñob.

Wocolix i yʌlʌ jiñi ticʼojel tac am bʌ ti Biblia, ñumen weñix chumulon quicʼot Laurie. Cheʼ jaʼel, an juntiquil lon quixicʼal tsaʼix bʌ i cʌñʌ Jehová yicʼot miʼ cʼuxbin. Jumpʼejlʌch bendición tsaʼ bʌ i yʌqʼueyon lon Jehová.

Maʼañic mi cʌl chaʼan maʼañic baʼ wis ñusʌbil lon c chaʼan wocol. Pero Jehová maʼañic baʼ ora an i cʌyʌyon lojon i mi caj lon c chʌn chaʼlen wersa yicʼot mi caj lon c chʌn ñop Jehová (Proverbios 3:5, 6).