Toʼol tʼan jach bʌ: Jiñi i testigojob Jehová maʼañic miʼ melob jiñi Navidad come maʼañic miʼ ñopob Jesús.

 Isujmʌch bʌ: Xñoptʼañon lojon yicʼot cujil lojon chaʼan cojach ti Cristo mi’ mejlel ti tajtʌl jiñi coltʌntel (Hechos 4:12).

 Toʼol tʼan jach bʌ: Miʼ tʼoxob jiñi familia tac cheʼ bʌ miʼ cʌntesañob jiñi wiñicob xʼixicob tiʼ ñopbal chaʼan maʼañic miʼ melob jiñi Navidad.

 Isujmʌch bʌ: Mic wen cʼojoʼtan lojon jiñi familia yicʼot mij cʼʌn lojon jiñi Biblia chaʼan mij coltan lojon jiñi familia tac chaʼan wen miʼ chumtʌlob.

 Toʼol tʼan jach bʌ: Maʼañic miʼ yubiñob i «tijicñʌyel am bʌ i chaʼan jiñi navidad», maʼañic miʼ tʼoxbeñob i bʌ chuqui añob i chaʼan, maʼañic miʼ tajob i ñʌchʼtʌlel yicʼot mach temelic añob ti jiñi bʌ ora.

 Isujmʌch bʌ: Mic chaʼlen lojon wersa chaʼan ñʌchʼʌl mi cajñel lojon yicʼot chaʼan mi cʌcʼ lojon chuqui an lon chaʼan tiʼ pejtelel jabil (Proverbios 11:25; Romanos 12:18). Jumpʼejl ejemplo, maʼañic mi lon j cʼajtin taqʼuin yaʼ ti lon c tempa bʌ yicʼot maʼañic mij cʼajtin lon c tojol cheʼ bʌ mic chaʼlen lojon subtʼan, come mic jacʼ lojon jiñi mandar tsaʼ bʌ yʌlʌ Jesús: «A majtan jach tsaʼ aqʼuentiyetla. I majtan jach mi laʼ wʌqʼueñob jaʼel» (Mateo 10:8). Cheʼ jaʼel, mic sub lojon chaʼan cojach jiñi i Yumʌntel Dios mi’ yʌqʼueñonla lac pijtaya chaʼan mi caj lac taj jiñi lac ñʌchʼtʌlel (Mateo 10:7).

•   Jesús tsiʼ yʌlʌ chaʼan miʼ cʼajtesʌntel cheʼ bʌ tsaʼ chʌmi, pero maʼañic tsiʼ yʌlʌ chaʼan miʼ cʼajtesʌntel cheʼ baqui ora tsiʼ yila pañimil (Lucas 22:19, 20).

•   Jiñi apóstolob i chaʼan Jesús yicʼot jiñi ñaxam bʌ xñoptʼañob maʼañic tsiʼ meleyob jiñi Navidad. Jiñi Diccionario del cristianismo mi yʌl chaʼan jiñi Navidad «tsaʼ tejchi ti mejlel yaʼ ti Roma cheʼ ti jabil 330» cheʼ bʌ tsajñix Cristo yicʼot cheʼ bʌ ñumeñix ti chaʼpʼejl siglo i chʌmel jiñi cojix bʌ apóstol.

•   Maʼañic chuqui miʼ mejlel ti cʼʌjñel ti pʌstʌl chaʼan Jesús tsaʼ yila pañimil ti 25 i chaʼan diciembre; cheʼ jaʼel, jiñi Biblia maʼañic mi yʌl chuqui ti tsic tsaʼ yila pañimil.

•   Mi lon c ñaʼtan chaʼan mach weñic miʼ qʼuel Dios jiñi Navidad come tilem jach ti costumbre tac yicʼot ti qʼuiñijel tac i chaʼan jach bʌ ili pañimil (2 Corintios 6:17).

 Anquese jiñi quixtañujob yujilobix chaʼan jiñi Navidad mach loqʼuemic ti Biblia yicʼot chaʼan tilem jach tiʼ chaʼan bʌ pañimil, pero cabʌl wiñicob xʼixicob maʼañic miʼ qʼuelob ti ñuc jiñi, i miʼ melob jiñi Navidad yicʼot miʼ mulañob i mel cheʼ bajcheʼ miʼ melob yañoʼ bʌ.

 Jiñi Biblia mi’ subeñonla chaʼan mi laj cʼʌn jiñi lac ñaʼtʌbal chaʼan mi lac wen ñaʼtan chuqui mi caj lac mel (Romanos 12:1, 2). Cheʼ jaʼel, miʼ cʌntesañonla chaʼan mi laj qʼuel ti ñuc jiñi i sujmlel (Juan 4:23, 24). Ili mach yomic yʌl chaʼan mach lon c wentajic chuqui mi’ yʌlob jiñi quixtañujob ti lon c tojlel, pero maʼañic mic lon ñusan ti pʼis jiñi principio tac loqʼuem bʌ ti Biblia chaʼan jach mij qʼuel lojon muʼ bʌ i melob yañoʼ bʌ.

 Isujmʌch chaʼan joñon lojon maʼañic mi lon c mel jiñi Navidad, pero libre an ti jujuntiquil chaʼan miʼ ñaʼtan chuqui jiñi muʼ bʌ caj i mel. Cheʼ bajcheʼ tsaʼix cʌlʌ lojon, maʼañic majqui mi lon c wersa xicʼ chaʼan maʼañic miʼ mel jiñi Navidad.