Maʼañic. Joñon lojon bajcheʼ i testigojob Jehová xñoptʼañon lojon, pero maʼañic mic sub lon c bʌ ti protestante.

 Cabʌl miʼ ñaʼtañob chaʼan jiñi iglesia tac cʌmbil bʌ bajcheʼ protestante jiñobʌch tsaʼ bʌ i cʌyʌ i ñopob i cʌntesa tac jiñi Iglesia Católica Romana. Anquese i sujmʌch chaʼan joñon lojon jaʼel bajcheʼ i testigojob Jehová an cabʌl i cʌntesa tac jiñi Iglesia Católica maʼañic bʌ mi lon c ñop, pero mach joñonic lojon jiñi protestante. Laʼ laj qʼuel chaʼchajp chucoch:

1.   Cabʌl i cʌntesa tac protestante miʼ contrajin muʼ bʌ i yʌl jiñi Biblia. Jumpʼejl ejemplo, jiñi Biblia maʼañic mi yʌl chaʼan uxtiquil jiñi Dios, mi yʌl chaʼan «juntiquil jach Dios» (1 Timoteo 2:5; Juan 14:28). Cheʼ jaʼel, jiñi Biblia maʼañic mi yʌl chaʼan Dios miʼ yʌqʼuen i toj i mul ti cʼajc tiʼ pejtelel ora jiñi jontoloʼ bʌ, cojach mi yʌl chaʼan an jumpʼejl jisʌntel tiʼ pejtelel ora (Salmo 37:9, Traducción del Nuevo Mundo [TNM]; 2 Tesalonicenses 1:9, TNM).

2.   Com bʌ lojon mach jiñic chaʼan mic tojʼesan lojon jiñi Iglesia Católica mi jiñic to yambʌ ñopbalʌl. Jiñi com bʌ lon c mel jiñʌch cheʼ mi lon c sub jiñi wen tʼan chaʼan bʌ i Yumʌntel Dios yicʼot mi lon j coltan yambʌ quixtañujob chaʼan miʼ ñopob jiñi wen tʼan (Mateo 24:14; 28:19, 20). Mach comic c tojʼesan lojon mi jumpʼejlic to ñopbalʌl. Jiñi muʼ bʌ i ñʌchʼtan lon c tʼan, com lon c pʌsben i sujmlel bʌ tiʼ tojlel Dios yicʼot i Tʼan (Colosenses 1:​9, 10; 2 Timoteo 2:​24, 25).