Tsaʼ quila pañimil ti La Ceiba (Honduras). Jiñi c tatob joʼtiquilob i yalobil, chʌntiquil alʌ chʼoc i joñon jiñi ijtsʼiñʌl bʌ. I cojach joñon jiñi xcojc bʌ tsaʼ quila pañimil. Chumulon lojon ti jumpʼejl barrio wen bʌbʌqʼuen bʌ i wen pʼumpʼuñon lojon. Tsaʼ caji ti ñumen tsʌtsʼan jiñi lon c wocol cheʼ bʌ jiñi c papá tsaʼ yajli tiʼ jol otot, yaʼ tiʼ yeʼtel, i tsaʼ chʌmi. I chʌmpʼejl jaxto c jabilel.

 Jiñi c mamá tsiʼ chaʼle wersa i cʌntañon lojon, pero mach wen añic i taqʼuin chaʼan miʼ mʌn lon c pislel. Come maʼañic lon c mosil tsaʼ c wen ñusa lojon tsʌñal, ñumento cheʼ mucʼ jaʼal.

 Xucʼu xucʼul tsaʼ caji j cʌn majlel jiñi lenguaje de señas hondureño (LESHO), i cheʼ bajcheʼ jiñi tsaʼ mejli c ñochtañob yambʌ xcojcob. Pero jiñi c mamá yicʼot c chichob mach yujilobic señas. Cheʼ bʌ an chuqui yom i subeñoñob cojach miʼ ñijcañob i ñiʼ i wut yicʼot miʼ cʼʌñob jiñi señas muʼ bʌ lon j cʼʌn yaʼ ti lon cotot. Pero jiñi c mamá wen utsʼatʌch tsiʼ cʌntayon. Anquese mach wen yujilic señas, tsaʼʌch mejli i subeñon baqui bʌ i wocolel jiñi ñucʼ cʼujts yicʼot tiʼ wen japol lembal. Mi cʌqʼuen wocolix i yʌlʌ c mamá cheʼ bʌ tsiʼ coltayon chaʼan maʼañic mic yajlel tiʼ melol iliyi.

 Cheʼ bʌ chutonto jiñi c mamá miʼ pʌyon majlel ti misa. Pero maʼañic mic yoque chʼʌmben i sujm woliʼ bʌ i yʌjlel come maʼañic majqui miʼ tsictesʌbeñon. Jin chaʼan cheʼ bʌ an 10 c jabilel tsaʼ j cʌyʌ majlel ti iglesia. Pero comʌch j cʌn Dios.

 Ti 1999, cheʼ bʌ añix 23 c jabilel, tsaʼ j cʌñʌ juntiquil xʼixic chʼoyol bʌ ti Estados Unidos ochem bʌ ti jumpʼejl iglesia evangélica. Tsiʼ cʌntesayon tiʼ chaʼan bʌ Biblia yicʼot tsiʼ cʌntesayon ti señas americano. Tsaʼ c wen mulaj jiñi tsaʼ bʌ cʌñʌ i tsaʼ ochiyon bajcheʼ pastor. Jin chaʼan, tsaʼ majliyon ti Puerto Rico chaʼan mic chʼʌm j cʌntesʌntel ti jumpʼejl escuela chaʼan bʌ ñopbalʌl baqui miʼ chajpʌntelob jiñi xcojcob. Cheʼ bʌ tiʼ chaʼ sujtiyon ti La Ceiba ti 2002, tsaʼ c mele jumpʼejl iglesia i chaʼan jiñi xcojcob baqui tsiʼ coltayoñob jiñi camigojob, yaʼan Patricia jaʼel tsaʼ bʌ ñujpuñi quicʼot ti wiʼil.

 Come joñoñʌch jiñi pastor ti jiñi iglesia tsaʼ c chaʼle cʌntesa ti señas hondureño, i mij cʼʌn dibujo tac loqʼuem bʌ ti Biblia o mic mel tac escenificación chaʼan jiñi xcojcob miʼ chʼʌmbeñob i sujm. Cheʼ jaʼel, tsaʼ c julaʼta jiñi xcojcob mach bʌ wen ñajtic chumulob chaʼan mij coltañob tiʼ wocol yicʼot chaʼan mic ñuqʼuesʌbeñob i pusicʼal. Tsajñon ti Estados Unidos yicʼot ti Zambia bajcheʼ misionero. Pero mach wen cujilic chuqui miʼ yʌl jiñi Biblia, cojach mic bele al jiñi tsaʼ bʌ i subeyoñob o tsaʼ bʌ c chʼʌmbe i sujm ti jiñi dibujo tac. Chaʼ joñon jach jiñi wen am bʌ i cʼajtiya tac i maʼañic mic wen tajben i jacʼbal.

 Ti jumpʼejl bʌ qʼuin uxtiquil xʼixicob yaʼ tic iglesia tsaʼ caji i yʌlob mach bʌ i sujmic tic tojlel. Tsiʼ yʌlʌyob chaʼan mic wen jap lembal yicʼot chaʼan muʼ bi c lotin quijñam. Ili tsaʼʌch i wen yʌqʼueñob c chʼijiyemlel. Mach jalic tsaʼ ñumi, Patricia yicʼot joñon tsaʼ j cʌyʌ lojon jiñi iglesia.

 Jiñi i testigojob Jehová mach junsujtel jach an i julaʼtayon lojon, pero maʼañic baqui tsaʼ lon c jacʼbe chuqui miʼ subeñon lojon. Pero cheʼ bʌ tsaʼ lon cʌyʌ jiñi iglesia, Patricia tsiʼ jacʼʌ i chʼʌm jumpʼejl estudio yicʼot jumpʼejl xñujpuñel i testigojoʼ bʌ Jehová, Thomas yicʼot Liccy. Tsaʼ bʌ i yʌcʼʌ ti toj sajtel c pusicʼal jin cheʼ mach xcojcobic, pero yujilob señas. Patricia wolix ti estudio, i mach jalic tsaʼ ñumi tsaʼ caji c tech jaʼel.

 Chaʼpʼejl uxpʼejl uw tsaʼ j cʼʌñʌ lojon jiñi video ti lenguaje de señas americano chaʼan mic pejcan lojon jiñi Biblia. Ti jimbʌ ora chaʼtiquil lon camiga tsaʼ caji i yʌlob chaʼan jiñi i testigojob Jehová miʼ jacʼbeñob i tʼan juntiquil wiñic, i tiʼ caj jiñi tsaʼ j cʌyʌ lojon estudio. Thomas tsiʼ pʌsbeyon chaʼan maʼañic miʼ jacʼbeñob i tʼan juntiquil wiñic pero maʼañic tsaʼ c jacʼbe.

 Cheʼ bʌ maxto wen añic ora tsaʼ j cʌyʌ lojon estudio, Patricia tsaʼ caji i yubin cʌlʌx chʼijiyemlel i tsiʼ cʼajtibe Dios chaʼan jiñi i testigojob Jehová miʼ chaʼ julaʼtañob. Mach jalic tsaʼ ñumi juntiquil i testigo bʌ Jehová yaʼ bʌ chumul ti lon c tʼejl tsajñi i julaʼtan Patricia, i tiʼ sube Patricia chaʼan mi caj i suben Liccy chaʼan miʼ chaʼ julaʼtan. Liccy wen chuqui tsaʼ bʌ i mele. Tsajñi i julaʼtan ti jujumpʼejl semana chaʼan miʼ ñuqʼuesʌben i pusicʼal yicʼot chaʼan miʼ bej cʌntesan chuqui miʼ yʌl jiñi Biblia. Pero joñon anto cabʌl mach bʌ weñic mij qʼuel chuqui muʼ bʌ i yʌl jiñi i testigojob Jehová.

 Ti 2012, jiñi i testigojob Jehová tsiʼ chajpayob ñuc bʌ subtʼan chaʼan miʼ pʌsob jiñi video ¿Muʼ ba a mulan a cʌmben i sujmlel?, ti lenguaje de señas hondureño. Liccy tsiʼ pʌsbeyon lojon jiñi video, i cheʼ bʌ tsaʼ j qʼuele toj sajtel pusicʼal come jiñi tsaʼ bʌ c sube jiñi lac piʼʌlob chaʼan jiñi infierno yicʼot chaʼan anto chuqui cuxul miʼ cʌytʌl lac chaʼan cheʼ bʌ mi lac chʌmel maʼañic miʼ yʌl jiñi Biblia.

 Cheʼ ñumeñix jumpʼejl semana tsaʼ majliyon tiʼ Yotlel tempa bʌ chaʼan mic pejcan Thomas. Tsaʼ c sube chaʼan com j coltan jiñi xcojcob chaʼan miʼ cʌñob jiñi i sujmlel am bʌ ti Biblia, pero maʼañic mic sujtel tiʼ testigo Jehová. Tsaʼ bʌ c ñaʼta jiñʌch chaʼan com c mel yambʌ iglesia i chaʼan jiñi xcojcob. Thomas tiʼ subeyon chaʼan weñʌch chuqui woli bʌ c ñaʼtan i cheʼ jiñi tiʼ pʌsbeyon muʼ bʌ i yʌl Efesios 4:5, baqui miʼ yʌl chaʼan jiñi i sujm bʌ xñoptʼañob temel yom miʼ yajñelob.

 Thomas tsiʼ yʌqʼueyon jaʼel jiñi video Los testigos de Jehová: una historia de fe viva. Parte 1: Salen de la oscuridad, am bʌ ti lenguaje de señas americano. Ti jiñi video miʼ yʌl chaʼan junmojt wiñicob tsiʼ wen tsajiyob jiñi Biblia chaʼan jiñi cʌntesa tac muʼ bʌ i yʌl. Cheʼ bʌ woli j qʼuel majlel jiñi video, joñoñʌch tsaʼ cubi c bʌ jiñi junmojt wiñicob come wolʌch c sʌclʌben i sujmlel jaʼel. Jiñi video tsiʼ qʼuexta c pensar come tsaʼ j qʼuele chaʼan muʼ bʌ i pʌsob jiñi i testigojob Jehová chuculʌch tiʼ Tʼan Dios. Jin chaʼan, tsaʼ chaʼ cajiyon ti estudio i ti 2014 Patricia yicʼot joñon tsaʼ lon c chʼʌmʌjaʼ, i tsaʼ sujtiyon lojon bajcheʼ i testigo Jehová.

 Mic mulan muʼ bʌ i mel jiñi i testigojob Jehová come miʼ jacʼob jiñi principio tac am bʌ ti Biblia. Wen utsʼatax tiʼ qʼuelol bajcheʼ miʼ chʼʌmob i bʌ yicʼot miʼ pejcañob i bʌ. Jiñi i testigojob Jehová wen utsob yicʼot miʼ coltañob i bʌ. Temel añob yicʼot junlajal chuqui muʼ bʌ i subob tiʼ subtʼan anquese chumulob ti yambʌ tejclum o yʌñʌlob i tʼan.

 Mic wen mulan j cʌn muʼ bʌ i yʌl jiñi Biblia. I cʌmbil c chaʼan chaʼan Dios jiñʌch Mach bʌ añic i pʼisol i pʼʌtʌlel i chaʼan jiñʌch jiñi Rey tiʼ petol Pañimil. Jehová miʼ cʼuxbin jiñi xcojcob yicʼot jiñi mach bʌ xcojcobic. Wen tijicña mi cubin cheʼ bʌ miʼ cʼuxbiñon Dios. An j cʌñʌ jaʼel chaʼan ili Lum mi caj i sujtel ti jumpʼejl i tʼojol jax bʌ Paraíso i chaʼan maʼañix miʼ cajel cʼamʌjel yicʼot chaʼan mi caj lac chumtʌl tiʼ pejtelel ora. ¡Comix chaʼan miʼ cʼotel jiñi qʼuin!

 Patricia yicʼot joñon mic wen mulan lon c suben jiñi xcojcob i chaʼan bʌ Dios. Ili ora mi cʌqʼuen lojon estudio chaʼtiquil wiñic yicʼot juntiquil xʼixic am bʌ ti lon c iglesia ti wajali. Pero wʌle cujilix chuqui yom bʌ mic sub i mach lajalic bajcheʼ wajali cheʼ bʌ añon bajcheʼ pastor. Tsaʼ c tajbe i jacʼbal jiñi j cʼajtiya tac cheʼ bʌ tsaʼ caji c pejcan jiñi Biblia yicʼot i testigojob Jehová.