Tsaʼ j quila pañimil ti San Juan Chancalaito, jumpʼejl alʌ tejclum am bʌ ti Chiapas (México). Jiñi c familia xchʼolobʌch, tilemob tiʼ pʼolbal jiñi mayajob. Jiñi c tatob tsiʼ cosayob 12 i yalobilob, joñon i joʼticlelon. Cheʼ bʌ alʌlon to, jiñi j querañob yicʼot joñon mi lon c pejcan Biblia yicʼot i testigojob Jehová. Pero maʼañic tsaʼ c jacʼʌ jiñi ticʼojel tac am bʌ ti Biblia.

 Cheʼ bʌ 13 c jabilel, muqʼuix c ñucʼ droga yicʼot mic chaʼlen xujchʼ. Tsaʼ j cʌyʌ cotot i baqui jach mic ñumel majlel. Cheʼ bʌ 16 c jabilel, tsaʼ cajiyon ti eʼtel baqui miʼ pʌjqʼuel marihuana. Ti jumpʼejl bʌ acʼʌlel, cheʼ bʌ añix jumpʼejl jab cajiyon tiʼ eʼtel yaʼi, cabʌl wiñicob wen jontoloʼ bʌ tsiʼ contrajiyon lojon cheʼ bʌ woli lon j cuch majlel cabʌl marihuana ti jumpʼejl lancha. Tsaʼ c choco c bʌ ti jaʼ, yaʼ tsaʼ jumucʼ ajñiyon i ti yanto bʌ ti yambʌ parte tsaʼ majliyon ti loqʼuel. Ti wiʼil, tsaʼ putsʼiyon majlel ti Estados Unidos.

 Yaʼ ti Estados Unidos tsaʼ c bej choño droga yicʼot tsaʼ cotsa c bʌ ti cabʌl wocol. Cheʼ bʌ añix 19 c jabilel, tsaʼ chujquiyon i tsaʼ pʌjyiyon majlel ti cárcel tiʼ caj xujchʼ yicʼot an majqui colel c tsʌnsan. Yaʼ ti cárcel tsaʼ c teme c bʌ yicʼot yambʌ jontolob i tsaʼ c bej mele chuqui jontol. Ti caj jiñi, tsaʼ chojquiyon majlel ti jumpʼejl cárcel ñumen cʌntʌbil bʌ yaʼ ti Lewisburg (Pennsylvania).

 Yaʼ ti Lewisburg tsaʼ ñumen asiyi c melbal. Come añix c tatuaje mach wocolic tsaʼ c teme c bʌ yicʼot yambʌ jontolob yaʼ ti cárcel. Ñumen jontol tsaʼ sujtiyon yicʼot mic wen cotsan c bʌ ti jatsʼ. Ti jumpʼejl bʌ qʼuin, tsaʼ j contraji lon c bʌ yaʼ tiʼ pat jiñi cárcel yicʼot yambʌ jontolob, tsaʼ lon j cʌñʌ teʼ chaʼan beisbol yicʼot yan tac bʌ muʼ bʌ i cʼʌjñel tiʼ melol ejercicio. Wen bʌbʌqʼuen tsaʼ ujti. Jiñi policíajob tsiʼ cʼʌñʌyob gas lacrimógeno chaʼan miʼ ñʌchʼchocoñob jiñi jatsʼ. Ti wiʼil, jiñi añoʼ bʌ i yeʼtel yaʼ ti cárcel tsiʼ yotsayoñob ti jumpʼejl ajñibʌl i chaʼan jach bʌ jiñi wen jontoloʼ bʌ. Ti ora mic michʼan yicʼot mic chaʼlen lecoj bʌ tʼan. Tiʼ caj chuqui jach mic chaʼlen jatsʼ. I mic wen mulan jiñi. Maʼan mi cubin c chʼijiyemlel.

 Joy ñupʼulon jach yaʼ baqui tsaʼ ajqʼuiyon. Jin chaʼan, tsaʼ caji c pejcan jiñi Biblia chaʼan mic ñusan qʼuin. Ti wiʼil, juntiquil xcʌntaya tsiʼ yʌqʼueyon jiñi libro Usted puede vivir para siempre en el paraíso en la Tierra. a Cheʼ tsaʼ c pejca majlel jiñi libro, tsaʼ caji j cʼajtesan pejtelel tsaʼ bʌ j cʌñʌ yicʼot jiñi Testigojob cheʼ bʌ alʌlon to. Tsaʼ c wen ñaʼta chaʼan cabʌl chuqui melbil c chaʼan tiʼ caj ora mic michʼan. Cheʼ jaʼel tsaʼ c ñaʼta c familia. An chaʼtiquil c chichob Testigojoʼ bʌ, jin chaʼan tsaʼ c ñaʼta: «Mi caj i tajob i cuxtʌlel mach bʌ añic miʼ jilel». Tsaʼ j cʼajtibe c bʌ: «¿I chucoch joñon maʼañic?». Ti jimbʌ ora tsaʼ j cʌlʌ chaʼan mi caj qʼuextan c melbal.

 Pero cujil chaʼan an majqui yom miʼ coltañon chaʼan mij qʼuextan c melbal. Jin chaʼan, tsaʼ c ñaxan mele jumpʼejl oración i tsaʼ j cʼajtibe Jehová chaʼan miʼ coltañon. Cheʼ jiñi, tsaʼ c choco majlel jumpʼejl carta yaʼ tiʼ sucursal jiñi i testigojob Jehová am bʌ ti Estados Unidos chaʼan mij cʼajtin jumpʼejl estudio loqʼuem bʌ ti Biblia. Jiñi sucursal tsiʼ sube hermanojob añoʼ bʌ ti jumpʼejl congregación chaʼan miʼ pejcañoñob. Ti jimbʌ ora cojach miʼ mejlel i julaʼtañon c familia. Jin chaʼan, juntiquil Testigo am bʌ ti jiñi congregación tsaʼ caji i chocbeñon majlel carta tac yicʼot jun tac loqʼuem bʌ ti Biblia tsaʼ bʌ i coltayon chaʼan miʼ mejlel qʼuextan c melbal.

 Tsaʼ c bej chaʼle wersa, jin chaʼan tsaʼ c ñaʼta j cʌy jiñi piʼʌlob jontoloʼ bʌ. Jiñi i yum aj jontolob yaʼan ti jin jach bʌ ajñibʌl, jin chaʼan ti jumpʼejl bʌ qʼuin tsaʼ c pejca i tsaʼ c sube chaʼan com c sujtel tiʼ testigo Jehová. Toj sajtel c pusicʼal cheʼ bʌ tsiʼ subeyon: «Mi ti isujm woli a wʌl, mele. Mach comic c mʌctan i chaʼan bʌ Dios. Pero mi a wom jach a cʌyon lojon, a wujilix chuqui miʼ yujtel».

 Cheʼ bʌ ñumeñix chaʼpʼejl jab, jiñi xcʌntayajob tsiʼ qʼueleyob chaʼan jiñic melbal woliʼ qʼuextʌyel majlel. Jin chaʼan, tsiʼ pʌsbeyoñob i yutslel. Jumpʼejl ejemplo, maʼañix mij cʌjchel ti cadena chaʼan mic pʌjyel majlel ti baño. Juntiquil xcʌntaya tsaʼto i subeyon chaʼan mic bej chaʼlen wersa qʼuextan c melbal. Cheʼ jaʼel, jiñi añoʼ bʌ i yeʼtel yaʼ ti cárcel tsiʼ pʌyʌyoñob majlel ti yambʌ ajñibʌl baqui maʼañix mic wen cʌntʌntel i yaʼ tsaʼ tsʼʌctiyi jiñi jabil chaʼan mic yajñel ti cárcel. Cheʼ ti 2004, cheʼ bʌ tsaʼix ajñiyon 10 jab ti cárcel, tsaʼ loqʼuiyon i tsaʼ chaʼ sujtiyon ti México ti jumpʼejl autobús i chaʼan jiñi cárcel.

 Cheʼ bʌ wʌʼix añon ti México, tsaʼ c taja jumpʼejl i Yotlel Tempa bʌ. Jiñi c pislel tsaʼ bʌ j cʼʌñʌ yaʼ ti cárcel jiñʌch tsaʼ j cʼʌñʌ cheʼ bʌ cojax to tsajñiyon ti tempa bʌ, maʼañic yambʌ c pislel wem bʌ ti qʼuelol. Anquese an bajcheʼ quilalon, jiñi Testigojob tsiʼ pʌsbeyoñob i yutslel. Cheʼ tsaʼ j qʼuele bajcheʼ yilalob, tsaʼ cubi chaʼan añon yicʼot isujm bʌ xñoptʼañob (Juan 13:35). Ti jin jach bʌ qʼuin, jiñi ancianojob tsiʼ chajpayob chaʼan mi cʌqʼuentel estudio. Cheʼ bʌ ñumeñix jumpʼejl jab, cheʼ ti 3 i chaʼan septiembre ti 2005, tsaʼ c chʼʌmʌjaʼ bajcheʼ i testigo Jehová.

 Cheʼ ti enero i chaʼan 2007, tsaʼ caji c melben i yeʼtel Jehová tiʼ pejtelel ora, ili yom i yʌl chaʼan ti jujumpʼejl uw 70 ora mij cʌntesan i chaʼan bʌ Biblia jiñi yambʌ quixtañujob. Cheʼ ti 2011, tsajñiyon ti jiñi Cʌntesʌntel loqʼuem bʌ ti Biblia chaʼan i Bajñel to bʌ Wiñicob (wʌle jiñʌch jiñi Cʌntesʌntel chaʼan xSubtʼañob chaʼan bʌ i Yumʌntel Dios). Ili cʌntesʌntel tsiʼ wen coltayon chaʼan mic mel ti wen jiñi queʼtel yaʼ ti congregación.

 Ti 2013 tsaʼ ñujpuñiyon quicʼot Pilar. Cheʼ bʌ mic suben bajcheʼ yilal c melbal ti wajali, mucʼ jach i subeñon chaʼan wocol ti ñopol mi cheʼ c melbal bajcheʼ jiñi. Maʼañix mic chʌn mel bajcheʼ ti wajali. Mic ñop lojon chaʼan jiñi c melbal ti ili ora miʼ pʌs chaʼan jiñi Biblia añʌch i pʼʌtʌlel chaʼan miʼ qʼuextan lac pensar (Romanos 12:2).

 Cheʼ bʌ mic pejcan muʼ bʌ i yʌl Lucas 19:10 miʼ cubin chaʼan woli i tajon tiʼ tʼan. Jesús tsiʼ yʌlʌ chaʼan tsaʼ tili i sʌclan yicʼot i coltan jiñi sajtem bʌ. Mach sajtemoñix mi cubin. Maʼañix mic chʌn ticʼlan quixtañujob. Wocolix i yʌlʌ jiñi Biblia, wʌle mij cʼʌn j cuxtʌlel chaʼan mic mel chuqui wen. Mic pejcan ti wen jiñi quixtañujob, pero jiñi ñumen ñuc bʌ jiñʌch cheʼ utsʼat añon yicʼot jiñi tsaʼ bʌ i Meleyon, Jehová.