¿IBU igar nabbiragwadi? Buggidar dulemar ibmar wisgubidamaladi. Sun be we ibmarmar wisgubimogaled:

• ¿Bule nue Bab Dummad anmargi binsamadibe?

• ¿Ibagwengi anmar bar wile iddodii guosurdibe, geb guerramar bergubalodibe?

• ¿Igi anmar burgwisar gusdae?

• ¿Burgwarmalad yoogidse gannar durgumalodibe?

• ¿Igi anmar Bab Dummadse godsale nabir anmar iddogega?

• ¿Igi anmar nabir yeer iddodii gusale?

¿Bia be nabir we ibmar wisgusale? Miliba gardamar we ibmargi sunmagmalad niggad. Deginigwale, emarbi we igarsig odurdagsurmarbalid. Abar we gardamar gebe onolesale binsaed nuegan ugnanaiyob daglegoed, auggi ar ibagan isse nanaoed gine dagledagoed binsaed nuegan ugnasuli. Degsoggu gannar ogwalege dagledagoed, gwabbid anar onolegodibe.

Auggi unnila garda maddagwen gagganginsuli we igargi sunmagnaid. Jesucristo Bab Dummadse godsagua sogsad: “Be gaya burba napiragwadid” (Juan 17:17, Bab Dummad Jesucristoba Igar Mesisad Garda [CUK]). Emi iba gine Bab Gaya Burba Bibliaye bileged. We garda gine soglenaid, igi Biblia gindina gagganginsuli we igar siggi sunmaglenai.

IBIGA WE IBMAR WISGULEBIE. Anmar belabelad negisgus naid gine gudiid, bar ibmar nuegan imaglesurgusad. Dulemarga negaggar gusdibe buggidar Bab igargi sunmagmalad sogdamalad Bab Dummad sogedba ibmar gusye.

WEYOB BIBLIA GINE SOGLENAI. Bab Dummad ibmar isgana guegala imagmasulid. Job 34:10 gine soged: “¡Diggasur nai Bab Dummad nabbiragwad gine ibmar isgana imaggedi, geb Dule Bela Gangued Niggad gine diggasur nai ibmar inniggi imagsuli guedi!”. Bab Dummad sogmaid dulemarga yoogidse ibmar nuegan imaggoye. Aa gala Jesús anmar odurdasad anmar wegi Bab Dummadse goloye: “Anmar-Bab-nibneggi-maid [. . .]. Na be-neg-dakmaid anmarse dage. Be ibmar na be-sogedba igi nibneggi imaklege, deyob we-napneggi imaked be imakmo” (Mateo 6:9, 10, CUK). Bab Dummad nue anmargi binsama soggua belabelad anmar ular wilesad, anmar bendaggega (Juan 3: 16).

Génesis 1:26-28; Santiago 1:13, geb 1 Pedro 5:6, 7, wis absogo.

IBIGA WE IBMAR WISGULEBIE. Neggweburmar nabo abinabin urwemalad niggadbali buggidar mergu dulemar burgwemamaid. Geb belagwable anmar wile iddodiidbimarmogad.

WEYOB BIBLIA GINE SOGLENAI. Bab Dummad sogmaid, ibagwengi bela negdirbimaggar urwed berguoye. Bab Dummad e Reino negdagmai gudele dulemar bar “urwed durdaggosurmalad”. Bur urwed anale, “es nugar suigana obinyemaloe ibmar nabba imuedgala” (Isaías 2:4). Ugginbali, Bab Dummad imagbaloed mer bar anmar wile iddodii guega, geb imagbaloed ibmar nueganbii imaglegega. Bibliagi anmarga soglenaid: “Bab Dummad we-dulemarga bela ibyanis elioed. We-dulemar bar burgosurmalad. Bab Dummad boed ega obelobaloed, degine, bukib-itoged ega obergubaloed. Deginbali, we-dulemar nunmaked bar itogosurmarbalid, ar ade bela ibmar-iduarmalad [emi ibagi ibmar isgana gunaidi geb wile iddolleged niggadi] bergusad” (Apocalipsis 21:3, 4, CUK).

Salmo 37:10, 11; 46:9, geb Miqueas 4:1-4, wis absogo.

IBIGA WE IBMAR WISGULEBIE. Buggidar Bab igargi emar odurdagmaladi, sogdamalad dule burgwisar e burba gudidaye. Abar sogmarbalid burgwarmaladi nabir dulemar oaggalomarye, sogdamarbalid Bab Dummadi dule isganamar odurdagye soo gwabunyegwissidgi.

WEYOB BIBLIA GINE SOGLENAI. Anmar burgwisale bar gudigussurdaed. Eclesiastés 9:5 gine sognaid: “Burgwarmalad dina, bibbisaar ibmar wissurmamaid”. Ar burgwarmalad ibmar wissurmar soggua, ibmar iddosurmarbar soggua, geb ibmar imagsurmarbar soggua geg dulemar oaggalomalad, geg dulemar bendagmarbalid (Salmo 146:3, 4).

Génesis 3:19 geb Eclesiastés 9:6, 10, wis absogo.

IBIGA WE IBMAR WISGULEBIE. Anmar burgwebi sulidbiid, bur anmar na gwenadganbo yeer iddodii sabied. Ar agala geg iddollesulid anmar gwenadgan burgwismalad anmar iedisulir.

WEYOB BIBLIA GINE SOGLENAI. Buggidar dulemar burgwismalad gannar odurgulemaloed. Ar Jesús iduaggwa sogsad “dulemar neguangi mamaidi, ebinsalemalagala [. . .] nodamaloe” (Juan 5:28, 29). Nabbaneg neg yeer daglegedga gunoniggoed, igi gebe sagla gued Bab Dummad abesana aa yobi. Dulemar odurgulemaloedi neg yeer daglegedgi nabir gudigusmalaled (Lucas 23:43). Yoogidse negnugusale dulemar bar uelegosulid, geb bela dulemar Babba ibsamaladi sadegu gudisamaloed. Biblia gine soglenaid: “Dule nuegan damaladdi, Bab-Dummad ega yar ukoye sogsadgi Degi sadegu mai gumaloed” (Salmo 37:29, Bab-Dummad-Nug-Odummoged Namaked-Garda).

Job 14:14, 15; Lucas 7:11-17, geb Hechos 24:15, wis absogo.

IBIGA WE IBMAR WISGULEBIE. Bela dulemar Bab igar wismaladi Bab Dummadse goledbimalad. Deginigwale, buggidar dulemar binsadamalad Bab Dummad gwen e iddomasurye.

WEYOB BIBLIA GINE SOGLENAI. Jesús sogsad anmar Bab Dummadse gollalile mer gannargannar ibmar sogoye. Weyob sogsad: “Ar Bab Dummadse be gollarmalale, melle gannar-gannar ibmar be sogo” (Mateo 6: 7, CUK). Anmar abesundibe Bab Dummad anmar iddogedi, ese anmar gollalir, e sogedba anmar ese goler gebed. Deyob imaggegala anmar wisgugweler gebed ibu ibmar Bab Dummad abege, geb sorbali e ibmar abegedbali anmar ese goler gebed. Bibliagi 1 Juan 5:14 [CUK], gine sognaid: “Ar anmar e-sogedba ese ibmar egichidele, we Bab Dummad anmar-itoged”.

Salmo 65:2; Juan 14:6, 14, geb 1 Juan 3:22, wis absogo.

IBIGA WE IBMAR WISGULEBIE. Buggidar dulemar binsadamalad mani nigguedi, nug nigga guedi, yeer dagle guedi, we ibmar yeer iddogegala e imaggoye. Degsoggua, we ibmar amigedgi alamaggar damalad, auggi amba yeer iddo gunonisurdamalad.

WEYOB BIBLIA GINE SOGLENAI. Jesús sogsad ‘dulemar mag na iddomaladi Bab igar durdagged abelege, aamar yeer iddomaladye’ (Mateo 5:3). Bab igar durdaggedi, geb Bab Dummad ibmar imaggoed durdagbalidi bur igar nuedid. Degsoggu we ibmar durdaggedgi anmar alamagnairbii unnila anmar yeer iddodii guoed. We igargi Biblia gine sunmaglenaid. We ibmar nabbiragwad durdaggedi anmar bendaggoed, mag anmar dagge guega biddi ibmar bur nue abelegedi geb biddi bur dogdar abelesulidi. Anmar binsaed soggwen susoggalile, Bibliagi ibmar nabbiragwad soglemaid sega anmar idaggele, geb anmar aa bali ibmar imagbalile we bur nued gudiguedgala anmar imaggoed (Lucas 11:28).

Proverbios 3:5, 6, 13-18 geb 1 Timoteo 6:9, 10, wis absogo.

 We gine anmar wis issesaar sogsad igi Biblia gine soglenai, ibmar sognergwagi sunmaglesadsig. ¿Be nabbi wisgubie? Ar be ‘Bab igar durdagbimogale’ be nabbi we ibmar wisgubimogoed. Sun be egisdibaliled, ar Bab Dummad anmargi binsamaile, ¿ibigala gwen negisgunaid nudagsuli, geb wileged osulosurbali? Sun be wisgubibaliled ¿igi nabir be neguya nued sedigusale? Biblia bela we ibmarmargi sunmagnaid, geb buggidar ibmar bamalad gine sunmagnabalid.

Bibliagi we ibmargi sunmaglenai inigwale, dulemar Biblia absobisurdamalad. Binsadamalad Biblia doggus mullugu narmaggar maye absogega, geb aggu iddoledabaliddeye. ¿Dule wargwen be bendagged be abege, be wisguega Bibliagi ibu ibmargi sunmaglenai? Jehovági sunmagmalad nabir be bendasmaladed be Biblia durdaggega.

Bibliagi dulemar odurdaggegala ebumalad garda nugadi, ¿Biblia gine nue igi soglenai? We garda imaglesad dulemar arbaed yaisur nigmalad, ibigwensur Biblia durdagmarmogaga. Jehovági sunmagmalad be neggi nabir Bibliagi be odurdagmarbalid, begi mani gaosurmalad. Jehovági sunmagged wargwen, iddoged irba nabir be negse Bibliagi be odurdagnaed, sulirdi be ega sogoed bia be odurdagged be abege. Millónba mergu dulemar deyob Biblia durdagmamaid. Buggidar dulemar Biblia durdasale sogdedamalad emidi an Bab igar nabbiragwad durdasye.

Be Biblia durdagmogale, be dagsamolaged Biblia gine bur Bab igar sunsoged mai. Unnila anmar isedba ibmar imagleged dobgudii guosulid, geb unnila anmar ina isgana imaglemalad dobgudii guosurbalid. Bur ibmar nued abiddodii gue anmar imagged, igar nigga gudi sae anmar imagbalid geb weligwar iddodii gue anmar imagbalid. Jesús sogsad: “Bemar igar-napiragwad wisgunonimaloed, degine, igar-napiragwad iskuedgi bemar-ollorsanonikoed” (Juan 8: 32, CUK).