Kletiɛn kpö ꞊plɛ ˈö ˗wo wo ˗zokë pë ˗nu ˈwo ˗gban ˗zlanwɔkɔdhi ˈgüwɔn ˗nu ˗bha, ˗an ˈˈpiʋ̈, Biblö ˗yö ˗an ˗wɔn ꞊blɛɛ. ˗Wo ˈnën ˈwo ˗tɔ “˗maankëmɛn ˗nu waa mɛn zii ˗kɔ ꞊löö ˗nu.” (Fidhipö 1:1) Mɛn ˗nu ˈwo bhë, ˗wo ꞊va ˗zlanwokɔdhi ˈˈpɛpɛ ˈgü. ˗Mën ˈö mɛn zii ˗kɔ ꞊löö ˗nu ˈwo˗ ˗kë yi ˗dhɛ?

˗Wo mɛn zii ˗nu ˗takun. Mɛn zii ˗kɔ ꞊löö ˗nu ˗wo kë wlüünën ˈka oo ɛɛnˈˈ mɛn ˈkpii˗ ˗nu ˈka oo, ˗Zlan ˗dhɔ ˗yö ˗an ꞊gban ˗kë. ˗Wo ꞊mɔɔn˗ ˗bha kö ˗wo wo ˗zoyö ˗an ˗dhɛ. ˗Wo yö ˗kë ˗së ˈka. ˗Wo wo ˗zokë yö ˈbha ˗nu ˈwo ˗gban ˗zlanwokɔdhi ˈgüwɔn ˗nu ˗bha, ˗an ˈˈpiʋ̈. ˗A kë ˈˈdhʋ̈ ˗sü ˗yö mɛn zii ˗nu ˗takun kö ˗wo wo ˈˈtʋ̈ŋ kë mɛn ꞊klaŋ kë ˗sü waa mɛn ˗maankësü ˗yö ˗nu ˈgü.

˗Wo wo ˗de ˗nu yökësü ˗dhɛ. Mɛn zii ˗kɔ ꞊löö ˈbha ˗nu ˗bha yö ˈnën ˈtɔ˗ ˗yɛɛ ˗zɔn mɛn ˗nu ˗dhɛ ˗sü ˗bhɔkwëë ˗nu ˗ta. ˗A mɛn ˈbha ˗nu ˗wo wo ˗zokë ˈˈtan ˈˈwɩ˗ ˗sü ˗nu, waa ˈwëëga ˈwɔn ˗nu ˈˈpiʋ̈. A mɛn ˈbha ˗nu ˈzü ˗wo ˈsëëdhɛ ˗nu ˗gblü yi ˗ta ˈö ˈwo ˗zlanwopödhɛ ˗nu ˗zɔn yi ˗dhɛ. ˗Wo wo ˗kɔ ˗da ˈpö ˗Bhɔkwëëkëgükɔ baaˈˈ ˗sü ˗nu ˈgü. Mɛn zii ˗nu ꞊mɔɔn˗ ˗bha kö ˗wa pö ˗an ˗dhɛ ꞊dhɛ ˗wo mɛn ˈˈgbʋʋ˗ ˗nu ˗takun. ˗Yö ˈˈʋʋ yö ˈwo˗ dɔ mɛn zii ˗kɔ ꞊löö ˗nu ˗kɔ ˈka, ˗wo wo ˗de ˗nu ˗an ˗dhɛ zuʋ̈gblüdhi ˈka. ˗A ˈwɔn ˈgü mɛn ꞊gban ˗yö ˗an ꞊bhlëë ˗ya.—1 Timote 3:13.

˗Wo ˈwɔnzuan ˗së ˗zɔn mɛn ˈˈwɛɛ ˗nu ˗dhɛ. ˗Wo ˗wo ˗kɔ ˗yɛ mɛn zii ˗kɔ ꞊löö ˗nu ˗bha ˗an ˗bha ˈˈklʋʋsë ˗nu ˗wɔn ˈgü. ˗An ˗bha yö ˈwo˗ kë ˗bhɔkwëë ˗nu ˗ta, ˗yö yi ˗bha ˗zoyödhe ˗gɛn ˗gban. ˗Wa kë ˗zlanwopösü ˈˈdhiʋ̈, ˗yö ˗zlanwopösü ˗dhɔ ꞊dede ˗da yi ˈgü. Mɛn zii ˗kɔ ꞊löö ˗nu waa mɛn zii ˗nu ˗wa yö kë wo ˈˈkwëë, ˗yö ˗zlanwokɔdhigümɛn ˗nu zuʋ̈gblüdhi ˈö nu ˗dhikodhɛ ˈka. (Efɛzö 4:16) ˗A ˈˈtʋ̈ŋ ˗ya wo, ˗wo ꞊mɔɔn˗ ˗bha kö ˗wo kë ˈpö mɛn zii ˈka.

• Mɛn zii ˗kɔ ꞊löö ˗nu ˗bha ˈˈklʋʋsë ˈbhaa ˗nu ˈwo ˗tɔ ˗mën?

• Mɛn zii ˗kɔ ꞊löö ˗nu ˗wo ˗zlanwokɔdhigümɛn ˗nu ˗takun ˗kɔ ˗kë ꞊dhɛ?